د.عادل الصادق المكي الباب البجيب الريح "التيار" قناة الجزيرة سويتيهو أفرش و تخين انتو عندكم خيار وفقوس.... وعاصرين علي الفقوس.....قامت الثورة في تونس..وانتي ما قصرتي..نقلتيها لينا... وبقين نحن مصاقرنك ونتفرج...لحدي بن علي شتت... قامت برضو في مصر ..وانتي نفس الحكاية.... وقعدتي تحرشي في باقي الناس....قدر مافي اتنين اتلمو قدام قهوة وكوركو انتي.... قلتي لينا ... خلاص الرئيس الفلاني قاعد يستف في هدومو عشان يرحل... قبلتي علي ليبيا.... وطلقتي القرضاوي ينضم ويحرش.... القرضاوي يا الجزيرة يشكل محكمة من نفسو... ويصدر حكم من نفسو ويقول اقتلو القذافي ودمو في رقبتي؟؟؟؟..دا نضم دا عليكي الله..نقول القرضاوي اتحنفش وهاش وقال النضم دا.... انتي تنقوليهو لينا لشنو؟... لحدي ما خليتي امريكا وجماعتها قلبهم ياكلهم ويخافو... ويقولو خلاس الاسلاميين جونا.... وبقو يتلولو علي الثوار.......وبقينا نحن كل يوم سكيناهو من مصراتة..دخل الزواية حُشناهو في الزواية عقبنا علي راس لانوف...وكدي لينا شهرين... ونسمع نضمك نقول باكر دي الثواريصبحو في طرابلس....وناس النيتو.... قالو ليهم امشو اضربو ليبيا... ركبو طيارتهم... وطشو ...ووقعو في الناس ضرب.... قذافي علي ثوار... كل شي ماشي علي ضهر الواطا دي ضاق ايدهم....... وحسي شايفك عاصرة علي اليمن ،وعلي.... علي عبد الله صالح.... وطواااالي شابكنا انك قناة محايدة,,وبتنقلي النضم الصح والنضم الكضب ما عندك بيهو شغلة......داك الليلة جايبة ليكي نشيد مصوّر فيديو كِلب... ويقولو فيهو الشفع لعلي عبد الله صالح ارحل ارحل ارحل....ارحل يا الفعلتك يا التركتك .. بي شتيمتهم ليهو.... والنشيد دا والله خلاني اعاين ليكي وقلبي يحدسني واشك انو من انتاجك... وفي سري اقول(والله ناس القناة دي مستهبلين ساكت).... وتاني تعالي النسعلك..انتي قطر دي اصلو ما عندها اي عوجة....؟؟... والديمقراطية فيها مفروشة في الشوارع؟؟؟...واصلو مافي زول قطري كدي قاعد ينقنق...وداير الديمقراطية وداير يغيّر نظام الحكم زي باقي خلق الله؟... ومعارضة ساكت مافيها ؟ولا يوم واحد انتي من فتحتي ابوابك ما جيبتي لينا معارض قطري... يعني قطر دي يخربا عدمانة اسم المعارض؟.... اذا كان امريكا ام الديمقراطية وبريطانيا حبوبة الديمقراطية فيهن معارضة..قطر مافيها؟. ..وبعدين شابكانا الراي والراي اللاخر.... الراي الدايراهو انتي شبعانين فيهو..اما الراي اللاخر دا .... غايتو مرة مرة يجي زول ينضم وتبلعوهو نضمو.... في حزتو......وكل مرة المذيع واللا المذيعة تنهرو مسكين يتخلع والنضم يطير لو في راسو.. وبعدين البحرين دي سكتو خليتوها لي شنو؟...بعد ما دخلتا قوات درع الجزيرة... كضمتو وتاني ما جبتو طاريها....بعدين تكررو في شرايط المظاهرات وخصوصا الفي اليمن....كل ما اغمض وافتح والقى مظاهرات ليها اكتر من شهر.... في وشي ويكوركو فيها الجماعة... وانتو كاتبين تحتها مظاهرات في المدن اليمنية تنادي برحيل علي عبد الله صالح...!!!!....اها قولي علي عبد الله صالح شدد ورحل؟... اها انتي شن رأيك؟....وين تاني تلقي ليكي نضم تقعدي تلوكي فيهو......؟...قولي كل الرويسا ديل رحلو ...وخلو البلود دي كلها فااااضية تكركب؟... اها عندك لينا فهم تاني؟.... ان بقى عندك قوليهو من حسي... عشان نعرف راسنا من كرعينا....!!! والله يا قناة الجزيرة انا غايتو تب ما مطمن لك.... قفل الباب:- برغمِ النزيف الذي يعتريهِ .. برغمِ السهام الدفينةِ فيهِ .. يظلُّ القتيلُ على ما بهِ .. أجلَّ .. وأكبرَ .. من قاتليهِ ..