سودارس : القيادة: والله جد: كتبها مسهد باعتصام القيادة فات عليّ تدوين اسمه .. بقلم: د. عبدالله علي إبراهيم

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

القيادة: والله جد: كتبها مسهد باعتصام القيادة فات عليّ تدوين اسمه .. بقلم: د. عبدالله علي إبراهيم

سودانيل نشر في سودانيل يوم 14 - 10 - 2019

(قرأت الكلمة التالية لأحدهم في قروب ما. وهي عن ذكرى اعتصام القيادة التي تلاحق الكاتب. واستحسنتها. وودت أن اقرأ المزيد عن ما يسمى اليوم العاقب للواقعة. وأطلعتني الكلمة على صناعة الجيل للتاريخ لن يحتاج بعدها إلى لعن تاريخ من سبقوه في السكة. بل لربما تلطف، وقد عارك التاريخ رحباً وجبراً، مع ثوريين سبقوه إلى الإيمان. بل لربما رأى الأكتاف الأنيقة التي وقف من فوقها في القيادة.
وهي تلك الأكتاف التي قال شاعر جيلنا عبد الله شابو عنها:
سيكتب فوق الشواهد من بعدنا
بأنَّا عشقنا طويلا
وأنَّا كتبنا بدم الشغاف
ما لم يقل شاعر بعدنا
وأنّا برغم الجفاف
ملأنا البراري العجاف صهيلاً صهيلا
وإنا مشينا إلى حتفنا
رعيلاً يباري رعيلا
وإنا وقفنا بوجه الردى
وقوفاً جميلا
سيكتب فوق الشواهد من بعدنا
بأنا كذبنا قليلا
وانَّا انحينا قليلا
لتمض الرياح إلى حتفها
وأنَّا سقطنا سقوطاً نبيلا
وقلت يوما عن هذا المقطع: "وأنا آه آه ،أنا آه ,آه من الصهيل الشهيد"
وتجد أدناه كلمة مسهد بالقيادة انقلها كما هي:

✵ بصراحة ي جماعة انا لسة م قادر اطلع من الاعتصام طوالي بجيني احساس انو نحن لسة في القيادة ... الصباح بصحي مخلوع وبتخايل لي صوت القطر (وفي ناس كتار هنا عارفين حكايتي مع القطر شنو) ولا اتخيل مخاطبة لمحمد خليفة وحسن بكري قبل الشمس تطلع .....وحكاية الشاي ياخال.. الشاي بي جاي
✵ كل م اغمض دقيقة بالنهار بسمع صوت موكب جاي وهتاف بعيد واصحي وانا بهتف .... المغرب وجوطة الافطار علي صوت الاذان ونشيد العلم وهتافات المدنية ......
✵ لحدي الان براقب الساعة 9 مساء بالدقيقة عشان الوقفة علي ارواح الشهداء قدام البحرية ...وكل م يجيني تلفون من رقم غريب بتخيلو دا واحدي من ناس المواكب عايزا يقول لي انا جمب خيمتكم عايز اسلم عليك ......
✵ بالليل بجيني احساس اني عايز اتفقد المتاريس عشان اشوف الحاصل شنو والوضع الامني كيف .....
✵ لحدي الان الفترة من 2 صباحا ولحدي م الشمس تطلع بتوقع هجوم لفض الاعتصام ذي م كان بحصل في الايام الاوائل والمشكلة قبل يومين سمعتا صوت زخيرة طوالي جريت لحدي الباب متوقع دا هجوم في ترس شارع النيل طلع دا ضرب نار في عرس جمبنا واكتشفتا اني في البيت م في القيادة ....
✵ ... الجمبي طوالي هتف بصراحة حسيت اني في القيادة واتذكرتا لمن كنا بنعمل الحركة دي ونردد نشيد العلم كل نص ساعة في ايام الاعتصام الاوائل عشان نقول للامنجية نحن صاحيين وجاهزيين ....
✵ ياخ حتي لمن نحاول ننسي وتكون قاعد في مكان يجي واحد يسلم عليك ويقول ليك اتقابلنا في القيادة ....
كانت ومازالت وستبقي ال58 يوم القضيناها في القيادة هي المسيطرة علي كل ملامح حياتنا القادمة
المجد للشهداء.
والله جد. ...

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

انقر هنا لقراءة الخبر من مصدره.