وهل منكم من دخل الي عيادة الحكيم وهو رابط الجأش؟ ماظنيته في ولا امه ولدته ما اجي واحد عامل عنتر وشايل ليه سيف عشر واتجوعر بعجرفة فاضية ساكت وهو عامل فيها الود راجل (ها خاف قاللوكم الحِكَّيِّم كمان بِخوِّف) اها يا جماعة الخير قولو يوم الجمعة كان اليوم الموعود وشاهد ومشهود للركبة تلك المشؤومة ولم ادري لم تذكرت تلك القصة والتي كنّا نقرأها في كتاب المطالعة الاولية اياميها ديك وملخصها كالاتي: (ابوك مسعود والعصفور فوق العود) بالله لو في حد من زمنّا داك اشرح لينا مشكوراً جداً ماهي العلاقة بين مسعود والعود والدود وموجود كمان مضّن في قطعة المطالعة وياترى هل كان اولئلك الأُوَل الذين تولوا وضع مناهجنا يودوننا ان نتعايش مع العيدان والديدان بعدين مسعود داك زاته منو؟..تانياً هل فيكم واحد تعلم شي من عمنا طه القرشي المسكين داك والذي بهدلنا معاه مره في المستشفى ومره في البيت ومره ماعارفين مشى وين والعجيب بسببه دقونا دق العيش الواحد داك وكمان مش دق براه معاه كوراك وشتايم ياخي يا مدرس ماكفاك تهبت فينا وورمتنا ورم الكوراك والنبز لزومن شنو كمان غايتو ما عارف مدرسين زمانا داك محظوظين ما حضروا لاحقوق انسان ولا حقوق قرود زاتها اقومو مرات ادقوك ساي كده عشان واحد تلميذ ود لزينه عمل غلط اقوم اللفندي إلِم في الفصل جلد وهو مستمتع بكواريكنا ولا هماه زول سادي اما في حكايات المطالعه دي اعتقد ان اعماننا الطيبين ديك يرمون الي تعلمينا بان نحافظ على صحتنا واتباع الطرق الصحيحة للاكل والشرب والي النظافة التي تعد واحدة من اركان الايمان هذا والله اعلم ان كنت محقاً ام لا لكن الذي اعرفه اننا نمتلك جيوش من الناموس والنمل والذباب والجراثيم المعدية وغير المعدية ما يجعلها تخترق اعتى حصون معده.. ماعلينا يوم الجمعة حاولت ان اتناوم وانس مواعيد الركبه البقت زي راكوبة ود العيش (ابوي) ام رقراق ديك لكن اين لك المفر يا تارك الصلاة؟ ان عسجد لك بالمرصاد ودي كمان بت زي ناظرة المدرسة ما بترحم وهذا ليس بالامر الغريب عليها فهي من اصلاب مديرات مدرسة ولها تطول المديرة وامكن كمان وزيرة التعليم العالي زاتو..عسجوده لخمتني برشوه حتى انس حكاية الحكيم وابر الركب والكوراك الافتراضي طبعاً عشان ما اتبشع معاكم يا حياكم الله اصله انا ياسادتي تربال تاه في شوارع الخرطوم وبىّ خوف موروث من الحكما اعتقد ان سبب ذلك ثقافة التطعيم والمشهورة بالقِراحة ولا علم لي حتى اليوم مامعنى هذه الكلمة هل هي تعني الجراحة؟ اظن ذلك هو الاقرب للمعنى ولو كشفت لكم عن ذراعي الايسر لرأيتم العجب العجاب !!شي كده متل ذلك الاخدود العظيم (وشم بس) يعني كده عيالي لو طفشت في يوم من الايام وحابين ادو وصف لابوهم اهو يمكنهم ان يقولوا عنده راس مقودس ووشم بضراعه الشمال مع ركبة شغالة بزيت فرامل في المنطقة الصناعية.. نرجع لعسجد بنتي الكبرى..البت دي عندها همة لدرجة الهوس ومن لا يعرف يظن ان بها وسواس قهري ولكنه الخوف على ابيها وكل بت ابوها بعجبها حتى لو كان اصله ككو..حبيبتي التي مني تمتلك عندها مسؤلية ان وزعت على العالم لكفته هذه الخصلة جعلت لها شخصية دقيقة اظن ان اختيارها لدراسة الصيدلة كان الانسب لطبيعتها فالصيدلة علم يقوم على الدقة والمسؤلية وإلا سوف تضيع ارواح بريئة بسبب اهمال او خطأ وعندنا بقية من حديث عن يوم الابرة وخلعتها وجرسة زولكم الفصيّح ده.. انتظروا قريب.... عثمان يوسف خليل عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.