شهدت الأوساط الأدبية الفنية والثقافية في السودان في الآونة الأخيرة مهرجان تكريم الشاعر المبدع الراحل المقيم إسماعيل حسن ، وذلك بمناسبة مرور 25 عاما على رحيله النبيل وهو ما يزال في قمة عطائه للوطن والشعب ، تابعت كما تابع الملايين من أبناء وطني تلك الفقرات والأهازيج الجميلة التي نظمها المجلس القومي للفنون وا لآداب بقاعة الصداقة والمسرح القومي بأمدرمان وغيرها من الأماكن الخالدة في ذاكرة الشعب السوداني خلود الشاعر الكبير إسماعيل حسن . وأجد لزاما علي أن أتقدم بالشكر لكل من ساهم في إنجاح ذلك التكريم كما أشكر الفنان المبدع عثمان حسين " أطال الله في عمره ومتعه بالصحة والعافية " وأشكر كثيرا إخوتي حمد الريح ، محمد ميرغني ، عبدالقادر سالم ، شرحبيل أحمد ، التور الجيلاني ، عثمان اليمني ، عثمان مصطفى ، تماسيح الحمداب ولكل الأحباء وعموم أهل السودان . رحل إسماعيل حسن المولود عام 1929 والمتوفى 1982-18-2 ، أي أكثر من خمسة عقود من العطاء المتواصل تاركا ثروة فنية لا تقدر بثمن ، رحل عن زوجته الوفية فتحية إبراهيم حميدة وأولاده وبناته أحلام ، أماني ، غادة ، مهيرة ، وليد ، الشريف ، عبدالجليل وأبوالقاسم ، في ذلك اليوم المهيب صمت البلبل الذي غرد عن الشدو ، لفظ أنفاسه في هدوء ليس من صفاته ، وكما قال شريف طمبل " كان إسماعيل فارسا مقاتلا جسورا شجاعا " . نعم كان إسماعيل سيد الساحات ، عظيم الصوت جهيره وبمثلما كان أبا حنينا كان كالغضنفر ، كان إنسانا رقيق المشاعر ، في جوانحه جرح كل الطيبين ومن أحزانهم صنع أفراحهم ومن عذاباتهم نثر الآمال بالغد الآتي على صهوة جواد بألوان الأحلام الوردية ، وعنى لصبرهم ، ومن إنحناءاتهم مجد العطاء ، ومن غرسهم في الجروف غنى لسنابل الحياة ، أولئك هم أهله ، ملح الأرض صناع الحياة ، كل الكادحين أهله ، وكل البسطاء أهله . بلادي أمان ، بلادي حنان وناسها حنان يكفكفوا دمعة المفجوع يبدوا الغير على ذاتهم يقسموا اللقمة بيناتهم ويدوا الزاد حتى إن كان مصيرهم الجوع يحبوا الدار يموتوا عشان حقوق الجار ويخوضوا النار عشان فد دمعة وكيف الحال لو شافوها شايلة دموع ديل اهلي اسياد قلبي والإحساس محل قبلت القاهم معايا معايا زي ضلي لو ما جيت من زي ديل كان اسفاي وا ماساتي تصور كيف يكون الحال يقول عبدالرحمن الزومة : لا يختلف اثنان فى أن شاعر الشمال الراحل الأستاذ اسماعيل حسن هو من الشخصيات النادرة والفذة بل ويمكن القول أنه شخصية (لا تتكرر) فهذا الرجل والشخصية الخالدة قد (حفر) لنفسه مكانة مميزة فى وجدان الشعب للدرجة التى استحق بها وعن جدارة لقب (شاعر الشعب). لقد تغلغلت روح الشاعر (اسماعين) فى خلايا الشعب وصار من الصعب فصل تلك الروح وانتزاعها من المكانة التى تربعت عليها فوق القمة وهو المفهوم الذى عبر عنه الشاعر (ود بادى) فى مرثيته الرائعة فى الشاعر الراحل والتى مطلعها (أرم الدمعة فوق الدمعتين يا عين وبعد الليلة حابساها الدموع لى مين) حيث وصف الشاعر اسماعيل حسن كأحسن وأبلغ ما يكون الوصف اذ جاء فى تلك القصيدة : واتمددت فوق النيل من الشلال وللشلال. لقد رسم الشاعر الراحل اسماعيل حسن لنفسه خطاً خاصاً به وخرج به من الدنيا وهو سائر فيه منفرداً لم يستطع أحد أن ينافسه فيه فهو فى مجال الشعر الغنائى ذلك البلبل الغريد الذى يطرب النفوس ويستفزها لتتمايل (حتى الثمالة) عشقاً وصبابة وهو فى شعر الملاحم الوطنية ذلك الفارس الذى لا يشق له غبار يتغنى بالوطن وللوطن : (وا أسفاى وا مأساتى وا ذلى اذا ما كنت سودانى وأهل الحارة ما أهلى). انه شاعر الرعاة وشاعر المزارعين وشاعر الطبيعة والتاريخ و(كلونكاكول أبو الصلاح يابا ويا جبلاً يطل فوق السحابا). انه شاعر النيل و الليل و (الرواويس) حيث يسافر معهم على ظهر مراكبهم الشراعية فى رحلة الصعود أعلى النهر من (دنقلا) الى كريمة والعودة حيث كان الوحيد الذى ينقل لنا أغانى وأهازيج (الرواويس) فمن غير هذا الشاعر الفحل يكون قادراً على مخاطبة النيل وكسب ثقته حتى يطمئن اليه النيل ويبوح له بأسراره ويتمكن من كشف أسرار النيل والليل كما قال ود بادى : منو البقدر يساهر الليل يجيب ليكم حكاياته؟ طلوع القمرة ولما تغيب ينوم النيل متوشح بى عباياته. حاليا تتداول الأوساط الفنية والقانونية موضوع ورثة الراحل المقيم إسماعيل حسن فيما كتبه من أغاني قام بتلحينها عدد كبير من عمالقة الغناء والطرب في السودان ، وعلى رأسهم الفنان محمد وردي ، وقرأ الناس التصريحات التي أدلت بها د. مهيرة إبنة الشاعر إسماعيل حسن والتي تلقى مني كل الدعم والتأييد ، اللهم إني قد بلغت فاشهد. فى رثاء الراحل اسماعيل حسن كتب الشاعر د. محمد بادى ارمي الدمعة فوق الدمعتين ياعين بعد الليلة حابسها الدموع لي مين نزيف الدنيا من حد البلد غربي ونزيف الدنيا لاحد البلد شرقي وجوم عامة الليالي العامره كل الدنيا خاتة الخمسة فوق اتنين رحيلك وجعة يا سماعين رحيلك نجعة من دار الفرح والزين رحيلك طعنة في لهات الحبى دريفين رحيلك وقفة فوق درب العليك باكين فيها نهاية المشوار وحد الفرحة والامال وحد الفال وحد الزين ارمي الدمعة فوق الدمعتين ياعين ويعد الليلة حابسها الدموع لمين بعد نزلت سكاكين القدر مسنونة ديل فوق ديل وشربت من بكرينا المعتق حالتو ياالداسنو من السيل وياالمحزون وحرابنا متكلات قدامو فوق مشنكسات الخيل وياالداخرنو من زمن الحساب شفعنا رابطين الحجر بالتيل وفجاءة يجينا من طرف السماء مريسيل ينعب فوق كلنكاكول غراب هابيل ويبقي رحيل رحيل كل الغيوم الهامعة متواسرات رحيل كل الشهور العامرة بالخيرات رحيل الطينة من طرف الجزر يومات رحيل الخضرة قدام منجل الهدام جفاف وممات رحيل البادية فوق برقا وراء نجيمات رحيلك مو رحيل أفراد رحيل اجيال رحيل بلدا تمام وكمال يا العرشت فوق نخل السواقي الشال واتمددت فوق النيل من الشلال وللشلال وياالهاجرت فوق ريش الرهو رحال تظل مرسوم علي باب الليالي سؤال بعد عشعشت في خاطر الغبش موال واتبللت من الموية بين السعفة والبلال بعد عرقك برق في ترابنا حد ما شال واتمددت غادي وجاي يمين وشمال بعد الحال منو البقدر يجيب غربال يغربل روحك المدسوسة في الاجيال وفي نفس الدغش مبثوثة في الشتلة ونداها السال بعد الحال منو البقدر يطاول حرفك المعقود علي برقا حرير وهلال مسطر فوق رقاب البرد فوق الصخرة والتمثال بعد الحال رحيلك ياالمشرشر في مداخل الدنيا كالاوصال رحيلك هزه في العقدة ومجامع الروح كما الزلزال ارمي الدمعة فوق الدمعتين ياعين بعد اليلة حابساها الدموع لمين كتير من شاف ديارو العامرة هاجت فوق درب وداي كتير من عدا فوق درباً بلا يوادع بلا يناشد كبار القوم وياخد راي كتير ياعين كتير الغابوا ماحضروا وكتير الراحوا ما عادوا وكتير البمشوا منو جاي الا الناعي عمرو الناعي ما طاف البلاد من جم وتبكي طويرة الاحزان سنين وسنين مصيرة تساسق المسكينة بين الباسا والباساي ترفرف من سخاي لسخاي وتسال عن صدور مغسولة بالدوباي و تنزل فوق حلقات مجالس الشاي تقول الشيخ وفي الشاشاي تبل الريق من الدمع البيوشل من ارامل الحي وتشرق بالرحيح في الردحه و الووب احي وتمرق من محاري الناس تولول فيها جرس الصي وتصرخ فايقة ياجلابة اقيفوا لي وتسعل ضايقة ما شفتوه زولا لي تضيع فرخاتا في المجهول ويرحل من دريبا الضي آه آه ياطويرة الاحزان آه لو كان تعرفي البي جرحك انتي صاب الريش وجرحا لي مسافر في النسيج الحي دريبي بعيد وحزني فريد ومما رحل البلبل الغريد بسرح في عيون الناس بسأل ولوسؤالي يفيد كيف الدنيا تصبح دنيا والصيد يبقي ياهوالصيد؟ مين يقدر ينضم عقود منقوشة ترقد في حزوز الجيد ومين يضفر كلام الريد كلو جميل مصيرو يجي ومصيرو يفوت بلاتخليد كتاب الكون يظل مقفول بلا خاتمة بلا تمهيد وحتي النيل مصيرو يكون مجرد موية شاقة البيد منو البيقدر يجيب ليكم خباراتو رقصة موجو في الشاطئ رواويسو , حكاياتو رقاد القمرة جنب النجمة فوق رملا مراياتو ولما تغيب ينوم النيل موشح بعباياتو وزي ما النيل يضيع في الدلتا يتلاشي ويموت مشلول انحنا كمان تفيض امالنا تضيع تنشره في ساحل المجهول وا اسفاي وا اسفاي وا اسفاي علي حرفاً شمخ في الطول وكيف الليلة في بطن التراب مسبول حرام تبلينا يا ايام حرام تملينا شوق وهيام اتارينا بنشيل من حرفك الجواني يا سماعين ونقعد في حواشي الحضرة وانت تكب علينا غمام وماعارفين حروفك نازفة من شريان من دم القليب الاصلو مابريان لما شربنا لما طربنا واتلفتنا ما لقيناك يا انسان وشفنا روحيتك الشفافة ركبت هودج الاحزان محمل فوق جناج ملكين ودربو علي مشارف الواحد الديان قوايمو شقايق النخل الوقع حزنان مضفور بي سعف يابس مفرش بي كباد اماتنا والحبان مزمل بي حبال صبرا فقدناهو زمان مضلل بالدموع شرقان ........ عجيب ياهودج الاحزان مواسم الهجرة ما حانت ولا زمن الرحيل قد حان نسافر ليك وزادنا الشربه من بحر الحزن والاهه والحرمان وداك اليوم كان وداع الهودج المتهادي كان جامع رجلات الحضر والريف طيور السافل المحزونة جات بي ليله تاركةجناها للريج والمطر والزيف وروح ترهاقه والعباسي وروح أبواتنا وريحة الماضي كلها جات ملوك شايق .. وقف شاويش منكس بي حرابو واقف بي قفاهو تابعو شايل سيف وبعد الليلة كل بنية تلبس فوق صديره اكليل يكون مزروع فيهو قلب الشهيد وانت شهيدنا يا سماعين يا الله .. يا الله .. يا الله بعد ما شلت اسماعين وفات معاهو باقي كلام وباقي حنين يالله بعد الفجعة نظل شاكرين نظل واقفين علي بابك معاي طلبين يكون عبود مع ود توم كذا شاهدين قدام قبر الولي سماعين نظل واقفين يوم الليلة والباكر الي ماشئت يالله الي يوم الفصل والدين وداك اليوم يكون يومنا ونقالد شيخنا سماعين وداك اليوم يكون يومنا ونقالد شيخنا إسماعين وداك اليوم يكون يومنا ونقالد شيخنا إسماعي بمناسبة مرور 26 عاما على وفاته
