بسم الله الرحمن الرحيم في السلك وداعا بعثتنا الظافره المنتصره انشاء الله بعثه ماشه لتصحيح الاوضاع ماشة لكي تتأدب الكره وتعود لرشدها الكبير كبير كل امنياتنا وتمنياتنا وخالص الدعء يرافق البعثه لابنعرف مطر لا بنؤمن بالدجل لا بنعرف اليأس بالمناسبه حكاية مابنعرف اليأس دي قالوا ناس كابس برضو مقتنعين بيها كان حفل الوداع جميل السعودي بدأ العوده لمستوي الهداف الذي يجب ان يكون عليه يعني قونين زي ديل يا سعودي هناك ويموت الف حاسد ومليون شامت البلد دي زاتها تفضي شويه من زحمتها دي ايها الناس قوموا بواجبكم علي اكمل وجه ودعوا لنا مراسم استقبالكم عينكم ما تشوف الا النور الجماعه ايام سيكافا قالوا توسكر الكيني حمام شايفهم مع توسكر يكابسوا للتعادل ده حالتو توسكر من المطار لي الكلاكله للاستاد بالمناسبه مفاجأة الزعيم كبيييييييييييييييييييييره الزعيم التيم والزعيم الصحيفه وفي الاتنين ربحانين الصفوه وده غير حوض السباحه الاكتمل المسخن يجينا في رمضان يبرد شويه بس يجيب معاهو (مايوه ) للسباحه انتوا قايلنوا ترعه جايين بالعراريق والسراويل ؟ الواحد يخت العراقي جمب الترعه ويعصروا بحجر عشان الهواء مايشيلوا في حوض سباحتنا لا عراقي لا حجر في غرف لبس وحمامات وبشاكير غايتو الداير يجي حوض سباحتنا الا يعمل كورس مكثف ويجيب معاهو كتلوج ياناس دعواتكم لنصرة الزعيم بعد الباقيات الصالحات طوالي والباقي علي الله الجماعه قالوا حانين علينا ونحنا بطل الممتاز وهم ورانا حانين بالحا ! قال لي نحنا اكتر منكم قلت ليهو نحنا الاكتر بازيد من الضعف بي تلاته قال لي عرفت كيف ؟ قلت ليهو شوف الاصوات الساندت معتصم جعفر والاصوات الساندت الارباب 43 20 فرق السما من الارض ياناس مالقيتوا مفتاح تفتحوا الباب ويرجع الارباب ؟ خلاص شوفوا ليكم شافع ينط الحيطه غايتو بعد الارباب ده مجلسكم ببقي زي مجلس ريفي وين كده ماعارف بوكس 78 واحد يودي ظابط المجلس ويعمل الكشه ويلم العوائد ويرحل ناس الحله للمناسبات ويودي العيان المستشفي في اقرب بندر ايها الناس العقيد وصل هناك وحجز في الفندق وقال كلو تمام وطالما العقيد في التشكيله تشكيلة البعثه طبعا يبقي التأهل مسألة وكت ليس الا اللهم انصرنا علي الحاسدين قبل المنافسين آمين وتتحقق مفاجأة الزعيم الصحيفه بنصف القيمه وتبقت مفاجأة الزعيم التيم للمجموعات بي حقنا سلك كهربا ما بننساك كلو كلو والي لقاء سلك babikir maki [[email protected]]
