بسم الله الرحمن الرحيم في السلك • قبل ما نتكلم عن المعلومه الجغرافيه لازم نعرف ماهي الجغرافيا اولا • طبعا كتير من ناس اليومين دي ما بعرفوا جغرافيا يعني شنو • ما سمعوا بيها • قروا في المدارس حاجات تانيه • مسكننا • ملبسنا • العالم من حولنا • الكواكب وحسن ظننا • طشينا اظننا • انت وانا • مامرت عليهم حاجه اسمها جغرافيا • عشان كده لازم نوريهم جغرافيا يعني شنو • عشان يتابعوا الموضوع معانا • الجغرافيا علم • يعني ذلك العلم بدراسة المناخات والتضاريس والحدود السياسيه للدول والسكان • ويتناول ذلك العلم الامور بدقه شديده • مثلا اذا تناول جغرافية السودان • فانه يحدثنا عن الخريطه العامه للسودان • ويخبرنا بان السودان مثل الحوض • اطرافه مرتفعه • وينساب للداخل • وجيرانه كتاااااااااااااااار ( دي واحده من مشاكلنا ) • لا تفصل بينه وبينهم اي حدود طبيعيه ( وده المجهجهنا ) • ثم يدلف للحديث عن المناخ • ويخبرنا بان السودان يقع بين خطي عرض 30 :3 و 38 شمالا • وان رحلة الشمس فيه خلال العام ماشي جاي • يعني بتتعامد علي اي نقطه فيهو ثلاثه مرات في السنه (موش ليهو حق الفنان يقول شمسك بقت شمسين ) • اسي دي الله يسألكم ده حر شمس واحده ! • المهم • يحدثنا ذلك العلم عن ان تجاه حركه الجاذبيه شمال خط الاستواء يكون عكس اتجاهها عند خط الاستواء • ويحدثنا عن المناخات • يبدأ من الاستوائي ويمر بالسافنا , هي سافنا واحده ! سافناتين , اي شئ عندنا اتنين , من الشريكين وانت نازل • ثم شبه الصحراوي • والصحراوي • ونباتات كل مناخ • وصفاتها • ونعاتها • يكلمنا عن النيل ومنابعه • فكتوريا وتانا • والعوائق التي تعترضه • يبدأ من نباتات السدود حتي يصل للشلالات • ناس السبلوقه • ويكلمنا عن جبل مره ومناخاته الاستثنائيه • يحدثنا عن كل صغيره وكبيره في السودان • مصائد الاسماك • المعادن • يورينا مكان الدهب ( ويجروا ناس الضهب ) • البترول ( والحكومه بي محلو ما بتكلم زول ) • المحاصيل النقديه • وحرف السكان واماكن تجمعاتهم والكثافه السكانيه • ويحدثنا عن الخيران والوديان واشهر ( الكباري ) • وعرقيات السكان واصولهم الساميه والحاميه • رحلات الرعي والثروات الحيوانيه • الغابات الطبيعيه • وعوامل التعريه • يكلمنا عن الاماكن السياحيه في البلد • الشلال والدندر واركويت • يورينا اشهر البنايات • استاد المريخ • علم الجغرافيا ده علم خشمو خفيف • اي شئ بفتو طوالي • الله يعيدوا للمدارس • اها • الليله دايرين نتكلم عن موريشيوص • هي دوله تقع في نص المحيط • جزيره ساااااااي • يعني زي جزيرة التمساح عندنا • عدد سكانها شويه شديد • مساحتها ما فايته امبده اظنها • تعتمد علي شوية زراعه وحبة معادن وكم شبكه صيد اسماك كده وحق الصارقيل ماعندهم • السكان فيها طبقتين • طبقة الحكام ( ده كلام ده ) • وطبقة عامة الناس • بلد فقيره جدا • مستوي الدخل فيهو متدني خالص • اي شئ فيها رخيص جدا بالنسبه للاجانب • يعني بي دولار تشتري اي شئ • قال ليك بخمسه دولار وزير داخليتهم يبيع ليك الوزاره بي منصبها • قال ليك واحد سوداني متضهب بره البلد دي عشرين سنه • آخر المطاف مشي موريشيوص • قال يستقر هناك • قابل ليهو موريشيوصيه زي الغزال • وبت ناس موريشيوصيين اصيلين • قال اخير من قعاد ساي • خطبها • قال ليك في الشيله وده ليهم بنطلون جينز • موريشيوص كلها تزغرد لي اسي • ووزيرة الرعايه الاجتماعيه الموريشيوصيه لما سمعت بالشيله فيها بنطلون جينز • جات حضرت الشيله • واتصورت مع البنطلون • قال ليك العريس في فتح الخشم مرق دولار واااااااااااااااااااااااااحد • ام العروس قربت تقوم شغل بتها وتتطلق من ابو العروس وتتم الشغل لي رقبتها الحلوه دي • ناس فقراء شديييييييييييييييييييييييييييييييييد • اسلام قالت لي موريشيوص دي ياتو بلد ؟ • قلت ليها دي بلد الحكام الجايين يحكموا كورة الصفاقسي • قالت لي اوعه بس تكون في ايراداتها الخارجيه تعتمد علي التحكيم ! • قلت غايتو يا بتي بعد الكوره الجايه دي لو سمعنا بان مرتبات المعلمين في موريشيوص تم صرفها لهم يبقي الكلام واااااااااااااااااااااااااااااااااااااااضح • وماداير درس عصر سلك كهربا ننساك كيف والرتينزه لسه مدوره خلت الصفاقسي يخسر من التاكا كسلاالتونسي في كاس السودان حق تونس ! والي لقاء سلك babikir maki [[email protected]]
