عصير جدول دماك مودوع صدق نفسك صبغ روحك بصوت الحق جهور مرفوع عشان صوتك طلع مسموع يكون أبسط جزاك الموت لأنك أقوى من كاتلك ,, كسيح كاتلك ,, ضعيف مفزوع ومافيش غير في ايدو سلاح ,, ودبابات وطيارات كلاشنكوف.. قنابل وسوط وهراوات وترسانات سيوف ودروع ده كل العندو,, بس منو الفؤاد منزوع ضعيف كاتلك ,, وعود أفزر سداهو السوس ,, رجف طقطق ده أعزل من جمال الحق وصدق الروح ودينو ضلال ظلم بالجملة بالمفتوح ودم دون حق هميل مسفوح طلع بى آهة من قلبا كبير مجروح يداوي جروحو بي نفسك واشراقة فؤاد مشروح اذا تنور هواك ما فار ,, وفاض حوشك سيول ثوار خريفك طير ام بشار مطر خدر صحاري الدار شهيدك عمد الأيام بموية النار ورف جناحو نوبة وطار يرقص صف من الأيكي على ايقاع خطا الأحرار ودفع الموجة والتيار كسر وادي وصاح شادي ورن جرس وغنى كنار يجاوبو الدوح بيفدي ثراكي ساعة البوح يوزع قلبو لى فقراكي لقمة حلال وسبحة ولوح ويفرد من دماه سفن ,, ومليون نوح شهيدك روحو مابتروح **** كفيف كاتلك مجهجه من عينيه الضو ضلام روحو وكسيح عقلو وضهاب رايو وعويش جوفو وخفيف قلبو وكفيف الروح **** طلع دمك صلب كاتلك علي عامود غضب اصرار في شر اعمالو لما اتضامنوا الأحرار وكروا عليه طلاب حق وقود الثورة طلع النار ده دمك ياشهيد الثورة يا نبرة أنين شعبك ويا طلة نهار غضبك وصوتك صاقعة في المليان مدججة بي غصون نصرك على الغاشم ,, في ايدو سلاح وطيارات ودبابات وبرضو ضعيف واعزل من سلاح الحق يسيخ في عرقو من خوفو اذا تمر النضال بتق صواري كفاح وريحة دم نبيل فواح وحينئذ نكون حصلنا آخر الشوط شهيدنا خلاس رقد مرتاح ودمو ينادي ,, حي على الفلاح والصاح هتاف الشهدا ,, دم الشهدا يبقى دليلنا ضو وضاح جموع تهتف دمنا لا انهدر لا راح دمانا سلاح دمانا صلاح دمانا سلاح دمانا فلاح دمانا سلاح دمانا الصاح دمانا سلاح وروح كاتلنا وين بتروح وين بتروح ووين بتروح بشير اسماعيل الأحد 30 يناير 2011