بسم الله الرحمن الرحيم في السلك • صقور الجديان شرفوا السودان • اليومين دي ماشاء الله • ماااااشه معانا • اول امس صغار الجديان طيروها لي غانا من راسها • وجوه غانا • وامس الكبار غاروا • زادوا الرصيد تلاته نقاط • بالطريقه دي ماشين كويس • ولسه • لما تجربة الاشبال الجديده تظهر ثمارها • ببقي عندنا كلام تاني • مع اي زول • ونحيا ونشوف صقور الجديان • وعلم السودان • ونسمع السلام الجمهوري • الكلام ده كلو في كأس العالم • قايلنوا بعيد • غانا التي تعادلنا معها في غانا لعبت في كاس العالم • وغانا التي هزمناها جوه غانا شالت كاس العالم • انتوا قايلين كاس العالم شنو ؟ • مجرد بطوله دوليه جويه • والنوع ده بنعرف ليهو كويس • نحنا كسودان شلنا كأس افريقيا سنة سبعين • وكمريخ شلنا مانديلا سنة تسعه وتمنين • يبقي لدي السوودان رصيد جيد من البطولات الدوليه الجويه • بالرغم من ان بطولة سنه سبعين ماكانت جويه • كانت دوليه سااااي • المهم ماشين كويس • الله يسألكم امس شفتوا العجب ؟ • ده شنو ده ؟ • ده يسموهوا شنو ده ؟ • سمعنا بي صناعة اللعب • لكن زراعة الكلي دي جديده ياعجب • شفتوا الباص الجدعو العجب لي كاريكا في الشوط التاني ؟؟؟؟؟؟ • ده صناعة لعب ؟ • ده زراعة كلي عدييييييييييل كده • عجب مقبل علي بهاء • يلعب باص لكاريكا الذي يقف خلف العجب بامتار كتيره ؟ • عندك مرايات موتر يا عجب ؟ • لو ماعندك مرايات موتر ورينا شفت كاريكا كيف ولعبت ليهو باص بالمقاس ده ؟ • غايتو ياناس ماتستبعدوا لو ناس جزيرة امس اللعبوا ضدنا ديل اشتكونا • يشتكونا لي مجلس الامن عدييييييييييل • يقولوا لمجلس الامن السودان ملعب مفاعل نووي طوييييييييييييييييييييييييل • يجدع فيها محل ماداير • ومن محل ماداير • ثوار ليبيا لو لقوا جديع العجب ده عمك كان انتهي ليهو اسبوعين • الثوار يختوا العجب في بنغازي • العجب يختها ليك في مصراته • عمك اتلفت عليها • يلقاها رجعت طرابلس • العجب مابقرصها • بتمشي لافه • غايتو الثوار لو ختوها للعجب في اجدابيا • العجب بختها لي عمك في سرت • يا ارض احفظي العجب العليك • الف مبروك • اها • ناس جنوب افريقيا اشتكوا ولا لسه ياخالد عزالدين ؟ • محمد عبدالماجد • راجع المنتديات • يمكن تلقي نص الشكوي الجنوب افريقيه في الحضري • الحضري الفقري • روشا • بيع وتم علي فليكس جيبوا ليكم ساكوها زي الناس • امس بنتفرج في كورة بري • فليكس دخل • بعد خمسه دقائق شات كوره براااااااهو • اتعوق ومرق • قلت لي اسلام الزول ده اتعوق ومافي زول ضربو • قالت لي المواسير القديمه بتضرب براها • ياناس • ميشو ده موش قال مهند الطاهر مصاب ؟ • عاد وينها الاصابه ؟ • هووووووووووووووي يا ميشو • كفيلك الموسم ده مهند • الكفيل القديم السنه دي هو زاتو داير البكفلو • تاني كان مدرب صحي صحي • خت مهندنا بره • اصابة فيلكس دي قالوا دايره يونيون وتي وضبه • وسباك ماهر • تسجيلات الكسر • براها بتنكسر • المهم • لو مشينا بالطريقه دي ستتحقق مقولة الريس • كأس العالم بقطر حانشارك فيهو عشان نشيلوا سلك كهربا ننساك كيف وناس فيلكس في البلد والي لقاء سلك babikir maki [[email protected]]
