بسم الله الرحمن الرحيم في السلك • نحن في مرحلة حرجه ومحرجه وغريبه • خروجنا في هذه المرحله حدثا يجب ان لايمر مرور الكرام • ولكن يجب ان نتعامل معه بعقلانيه • وبحب للمريخ العقيده والالانتماء • ماهي الاسباب ؟ • هذا هو السؤال الاول • ومن بعده تأتي اسئله اخري • ولكي نجاوب اجابات مقنعه وحقيقيه ومفيده • يجب ان نستصحب معنا التاريخ القريب بكل امانه • ونسأل • ماهي اسباب خروجنا في السنين الماضيه ؟ • من شتي المراحل • حتي من دور المجموعات الذي وصلنا اليه دون هزيمه • الاجابه علي جميع الاسئله واحده وواضحه • الاستهتار • استهتار من بعض اللاعبين • احساس منهم بانهم كبار • كبار حتي علي المريخ • يحسون بان المريخ يحاتجهم • ولكنهم لايحتاجون للمريخ • كيف يحتاجون له واصبحوا بفضل المريخ من اصحاب العقارات والاموال • عرفوا درب البنوك وكيفية التعامل معها عن طريق المريخ • وانكروا عليه ذلك الفضل • واستنكروا فاستكبروا • النوع ده ياشباب ماحبابو • ولا بلزمنا • ولا يمكن ان يقدم لنا في المستقبل • كفايه • فليذهبوا عنا حيث يريدون • اما النوع الثاني • فهو النوع الذي لم يتطور طيلة سنوات بقائه في الكشف • ولن يتطور • لانهم لايملكون الطموح الذي يقودهم للتطور • وديل برضو ماحبابهم • وماحا يقدموا لينا • اما النوع الثالث فهم الذين يملكون الموهبه • ولكنهم تأثروا بالبرود الذي وجدوه في المريخ • اضحت علاقتهم بالفريق محدوده في فهم محدد • وسيله للسفر والترفيه • وصراف آلي كبير • وسبب للشهره والاشتهار • ديل العين الحمراء بتجيبهم • وقصة الحداد والقرد والعتوت خير ما يشرح كيف زي ديل ممكن يجي منهم • قالوا الحداد العندو كير بستعين بقرد عشان ينفخ ليهو الكير • بقوم يجيب قرد وعتوت • يربطهما جواره ويشتغل • ينفخ في الكير • تلاته يوم • في اليوم الرابع يقوم يخت رجلين العتوت القدام في ايدين الكير ويقول ليهو انفخ • طبعا العتوت ما بنفخ • الحداد يمسك الكير وينفخ • القرد يعاين ساااااي • الحداد يقول للعتوت انفخ • العتوت ماينفخ • الحداد يطلع السكين ويضبح العتوت • القرد يطير عيونو • الحداد يسلخ العتوت • القرد يعاين وقلبوا طاير • الحداد يلتفت علي القرد • القرد قلبوا يقرب يمرق بي بره • الحداد يشيل القرد يجيبوا جوار الكير • ويمسك السكين • يقول للقرد انفخ • القرد ينفخ لما الجمر يطير بهناك للحداد زاتو • عرفتوا كيف البجي منو بتجيبوا في الدرب ؟ • دايرين حداد شاطر يا ابو جريشه • وكير كبير • وفحم كتير • وبعد داك عينك ماتشوف الا النار • بصراحه نحنا شفوووووت • والمابشبهنا ماحبابو • والمابجي منو ينشطب ويدي الفرصه لي ناس هنو • ويكرم علي ماقدمه للمريخ • حب المريخ ياناس يجبرنا علي ان نكون قريبين من المريخ في هذه المرحله • مانغيب ابدا • وندي الفرصه لي ناس لم يأخذوا فرصه • بدل ندي الفرصه لي ناس كملوا الفرص • وما استفادوا من ولا فرصه • غياب عن التمارين يا شعب المريخ لا والف لا • مقاطعه للمباريات لا والف لا • المعسكر التاني داير يصيد في الماء العكر • عشان يلحق فرق الممتاز • فوتوا عليهم هذه الفرصه • هم يعلمون جيدا ان اي فريق غير كالا كانوا الليله في نيالا • لكن القسمه • وهي نفس القسمه المودياهم تونس • والكوره التانيه • واحد اتنين • وعد لحدي خمسه او سته سلك كهربا مابننساك اطلاقا والي لقاء سلك babikir maki [[email protected]]