هذه الحلقة نخصصها لنوعين من الناس «ناس شِبكة وناس بره الشبكة» النوع الأول لو شبك فيك يحلك الله، زول شِبكة يعنى بتاع شِبك من نوعية ما تكتحنا. والنوعية الثانية البره الشبكة او خارج الموضوع (Off Point) الناس البرة الموضوع تلقاهم دخلوا في مواضيع وتحمسوا لها واجتهدوا فيها ولكن مجهودهم طلع فشوش لانهم لم يركزوا - زي المريخابي لما الهلال غلب المريخ أربعة بدل يركب بص الثورة ركب بص «العيلفون». أ/ الناس الشِبكة: ديل يتلصقوا فيك زي الحسكنيت تفتش للمخارجة ما تلقاها، أمثلة: 1- واحد شِبكة في بيت بكاء لمح إمرأة متوسطة العمر وقيافة مشى عليها وقلدها وقعد يبكي معاها اتفكت منه يا الله قالت ليه البكاء دا ما حقنا انا جيت اعزي بس، قال ليها ما مشكلة انتي الماتو ليك شوية؟. 2- ود الريح قال الزول الشِبكة قال لي بنت الجيران: كان قصدي احب اختك مادام الريدة وقعت فيك بختك قالت ليه (سوري انا مخطوبة). 3- في بلد افريقية فقيرة عندهم طيارتين، الوزير قال للحاكم حقو نشوف بلد كبير زي امريكا تستعمرنا عشان نبني البلد واقتصادنا يتصلح، الحاكم قال ليه كيف نخلى زي امريكا تستعمرنا، قال ليه طيارة واحدة تهاجم امريكا، الحاكم قال ليه لو انتصرت طيارتنا؟. 4- واحد شِبكة ماشي في الشارع لقى واحد صاحبه قال ليه كيف ياعلى شكلك اتغير خالص، الثاني قال ليه انا ما على، قال ليه كمان غيرت اسمك؟. 5- العزابة جاهم ضيف ثقيل قال يقعد معاهم يومين قعد معاهم شهرين ما لقوا طريقة يتخلصوا منه، يوم قاعدين الضيف شاف ليه عقرب قام ضربها قتلها، بس شبكوه ليك كيف تقتل عقربنا نحن مربنها ونسمن فيها انت زول ما بتنفع معانا شيل شنطتك وإتخارج. ب/ الناس البرة الشبكة: 1- القاضي قال لي صاحب الخيال المتهم، عندك حاجة تدافع بيها عن نفسك قال ليه أبداً العسكري شال عكازي وسكيني. 2- والد الخطيبة قال للشاب شغال شنو؟ قال ليه طبيب أطفال قال ليه مش كان أحسن تكمل تعليمك. 3- اثنين من اصحاب الخيال الاول قال للثاني (هل يوم الجمعة يوافق آخر الشهر) الثاني قال ليه (كان ضغتنا عليه يمكن يوافق). 4- صاحب خيال قال لدكتور تتصور يا دكتور أي حتة في جسمي اهبشها بي اصبعي (توجعني) الدكتور اكتشف انه اصبعه مجروح. 5- لص مسلح سرق بنك بعد ان هدد كل الموظفين وهو خارج وشايل الفلوس لقى زبون في الصالة قال ليه انت شفتني قال ليه ايوة شفتك (طاخ) أداه طلقة كتله وهو قرب الباب شاف راجل وزوجته قال للراجل شفتوني، قال ليه انا ما شفتك لكن اكيد مرتي دي بتكون شافتك. 6- حداد استحم سلسلة ظهره صدت. 7- اثنين عوانس عملوا إعلان في الجريدة تزوج واحدة واخد الثانية مجاناً. 8- في رمضان والدنيا سخنة شديد في واحد صائم إتصل ببرنامج ما يطلبه المستمعون قالوا ليه تحب تسمع إيه، قال ليهم مقطع من أذان المغرب. 9- في واحد عزم صاحبه وضبح ليه عتوت، الضيف كان بياكل بشراهة، صاحبه قال ليه شايفك بتاكل بشراهة أم العتوت دي زمان نطحتك ولا شنو؟، قال ليه وانت شفقان عليه، ام العتوت دي رضعتك ولا شنو. 10- الاستاذ قال للتلميذ المطر بيصب في ياتو فصل، قال ليه فصل سنة ثالثة لانه ما معروش. 11- الاب: سأسافر يا ابني لمدة اسبوع عايزك تتحمل المسؤولية في غيابي وتكون راجل البيت. الابن: جداً يا ابوي بس ارجوك تعال بسرعة لان غسيل العدة في البرد دا صعب!. 12- الولد: يا ابوي انت مش وعدتني تديني 100 جنيه اذا نجحت، الاب: نعم. الابن: ابشر فقد وفرت لك ال100 جنيه!. 13- الزوجة: انت بتهتم بمباراة كرة القدم اكثر منى والدليل على ذلك انك لا تتذكر يوم زواجنا. الزوج: انا متذكر تاريخ زواجنا جداً فقد تزوجنا في اليوم الثاني لمباراة هلال مريخ التى فاز فيها الهلال على المريخ 2 / صفر. 14- ضابط شرطة قال للشحات: كيف تكون في الصباح عامل انك اعمى تستدر عطف الناس والآن بتقرأ في الجريدة؟ الشحات: ابداً والله ما قاعد اقرأ قاعد اتفرج على الصور!. 15- قال سائق السيارة للفلاح الذي يسحب حماراً من منكما الحمار؟ رد الفلاح: الحمار هو الذي لا يفرق بينى وبين الحمار!. 16- أُدخل لص مزيف نقود السجن وفي الزنزانة سأله احد المساجين ما هى جريمتك قال ليه كنت انافس الحكومة واطبع نقود وابيعها ارخص منها. 17- الطفل قال لصديقه ابوى بقدر يرفع ثلاثة اشخاص باصبع واحد فقط، الطفل الثاني: لازم ابوك بطل رفع اثقال. الطفل: لا ابوى عامل اسانسير. 18- الاول: كان عندي كلب بميز الرجل الشريف من اللص. الثاني: واين ذهب هذا الكلب؟. الاول: بعته لانه عضاني. 19- الميكانيكي للزبون انا شايف مشكلة بطارية سيارتك اكبر مما توقعت لان بطاريتك يا سيدي في حاجة الى سيارة جديدة!. 20- الاول: انا جدودي اصحاب عقول راجحة، الثاني: لكن ليه حرموك من الميراث؟. خاتمة: الله يكفيكم شر الشِبكة والناس الشِبكة ودائماً موبايلاتكم وذاكرتكم تكون داخل الشبكة وما محتاجين لشاحن. مع تحياتي