بسم الله الرحمن الرحيم في السلك لو اتكلمنا عن قون العجب سته سنين مابكمل كلامنا بالرموت كنترول ! والله من المحل ده لو رسلت زول بطش يسأل عشرين مره عن الوصف حتي يصل كوره من هنا ياعجب ؟ والله بالبلوتوث مابتصل ده قون مرسل (اس ام اس ) او ( ام ام اس ) اسمو (K A A ) King Agab Arts فنون الملك عجب زي ال G M H صالة غردون للموسيقي; وزي B M W حفظك الله يا ملك وصدق صلاح بن الباديه عندما غني كيف الامير يساوي الملك ****ده بعيد يازول اها امس استضاف برنامج الرياضه الهلالي الاستاذ خالد عز الدين ياربي الهلالي دي للبرنامج ولا لي خالد ؟؟؟؟ المهم قعدوا اتنين اهله رضا وخالد ولسان الحال يقول وحدنا انت وانا خالد قال مامعناهو انو ابو الهل ماشغال بالممتاز لانو سبق لله تحقيقه كثيرا يعني الهلال قاصد يتغلب من المريخ وقاصد يتغلب من اهلي شندي مع العلم بانو المريخ واهلي شندي ديل بالذات البوجع الهلال غلبهم ليهو وقال الهلال يصب الاهتمام علي البطوله الافريقيه ده الكلام ياخالد المنحاز سبق للهلال ان فاز به كثيرا علي شاكلة شاتها الماسوره دقت في الماسوره ورجعت للماسوره وحسبوها قون وجاب تلاته نقاط كانت كفيله بفوزكم بكأس المنحاز وليكم حق ياخالد تهتموا بالبطوله الافريقيه عشان ماعندكم ببح كل مره شالو هو ( بفتح الهاء ) لكن ياخالد لو جادين في الفوز بالبطوله الافريقيه اسألوا مجرب ومابنبخل عليكم بالمشوره واعطائكم الطريقه اسأل مجرب وما تسأل طبيب اها المجرب ديل نحنا لكن ياخالد المدافع المحترف الشفناهو امام التحرير ده ما بوديكم لي قدام وما كل الفرق كالا وبالطريقه دي مابتجيبوا الترابه اعترفوا بانجاز المجرب اولا ثم اسألوهوا مابقصر معاكم خلي بالك المجرب ديل نحنا مليانين تجارب شئ افريقيه وشئ عربيه شئ اقليميه دوليه وشئ قاريه وشئ جويه داخليه بتاعت جوبا بالمناسبه بعد اعلان الدوله الجديده كأس جوبا الجوي حايرفع لدرجة دولي موش من دوله اخري !!!! اتجوجوي ايها الناس سؤال رضا كان عن مستوي الهلال في الممتاز وكلام خالد كان بعيدا عن السؤال ورضا مشي الكلام لكن الاتنين كانت واجعاهم العلامه الكامله وواجعهما فرق السته نقاط ده فضل لينا اهلي الخرطوم ياخد كوتته وبعد داك زي ماقال لي مريخابي من كريمه قال بعد نقفل الدوره الاولي تلطاشر فريق ياخدوا المعلوم حقوا الاتحاد يعمل منتخب من فرق الممتاز يقابل المريخ يمكن يطلع ليهو بي نقطه الحكايه دي ذكرتني واحد صاحبي زمااااااان بنطق الميم نون وبخيل جدا يقوم زول يقابلوا يقول ليهو عليك الله اديني قرش يرد عليك بسرعه ولا منينه يقصد بها ولا مليمه يكون بياكل في تسالي تقول ليهو اديني معاك يقول ليك ولا حته عشان كده فرق الممتاز دي كلها اي زول بدون فرز الكبار والصغار الدورتين لو قالوا لينا ادونا نقطه بنقول ليهم ولا منينه ولا حته ولا نقطه مووووووووووووووتوا ياناس العمده الفاتح المقبول له موقف يحفظه له التاريخ مع الحكام لا اتمني تكراره لكن بما نشاهده من هذا الجهاز لا نستبعد الحكم بتاع كورتنا ضد النسور يخيل لي هو نفسه من حكم كورتنا بتاعت التمشيطيه تخيل ساااااااي ورجل الخط الاول المدعو وليد يخيل لي هو نفسه رجل الخط الذي اشار للحكم بطرد ايداهور في مباراة كادوقلي يخيل لي تخيل ساااااااي قريبا علي شاشة سينما افريقيا اللمبي تمانيه قيقه اصبروا حبه ايها الناس الاستقرار الانضباط الحساب ولد ايها الناس ولا منينه ولا حته ولا نقطه عجب يا مجنون سلك كهربا ننساك كيف وموسي الزومه حردان وشباب من اجل المريخ كسلوا من العضويه والي لقاء سلك babikir maki [[email protected]]
