مازدا متفائل جدا وواقعي في نفس الوقت .. قال ممكن يصل براحة الدور التاني في البطولة الأفريقية كيف؟ الطبيعي يخسر من ساحل العاج ودي الواقعية والمنطقي يفوز علي بوركينافاسو وأنقولا وده التفاؤل يعني مازدا ضامن الفوز عليهم .. انا طبعا ماعارف مازدا جاب الثقة دي من وين ؟ ولابناها علي ياتو أساس .. وذكرني هنا بقصة مدرب معروف في واحدة من الولايات ومافي داعي لذكر الأسماء كان قبل أي كورة بلم اللاعبين (بشرح خطة اللعب) .. ويقول ليهم الكورة لما تصل فلان يمررها لفلان وفلان يلعبها للجناح علان وعلان يعكسها لفلتكان وفلتكان يجيبها قون يلا قوموا خشو .. إتخيل لي دي الطريقة الوحيدة الممكن يلعب بيها مازدا ويغلب أنقولا وبوركينا فاسو ويتأهل للدور التاني .. وليه الدور التاني بالطريقة دي ممكن يصل النهائي براحة ويشيل الكاس عشان كده إستغربت لما لقيت حدود طموحو الدور التاني .. الكورة مجنونة ودي مابختلفو عليها إتنين .. لو مامجنونة ماكان اليونان شالت بطولة أمم أوروبا في 2004 .. الفرق شنو بينا وبين اليونان؟ اليونان لمادخلت البطولة لاكانت علي البال ولا في الخاطر .. أحسن زول رشحها تكون ضيف خفيف علي البطولة وتغادر من غير مايحسوا بيها (عكلتو) وكل مايغلبو مباراة يتذكروا أنهم أصحاب حضارة قديمة (الإغريقية) يضربوا الفريق التاني لغاية ماشالوا الكاس وكتبوا تاريخ جديد لليونان في كرة القدم . شنو البمنع إننا نفوز بالبطولة للمرة التانية ونلعب علي جنون الكورة ونبدأ بساحل العاج نغلبها يوم إفتتاح المجموعة وبعد ماكنا جايين ضيوف خفاف علي البطولة وماشين من ماغير مايحسو بينا نخلي العالم كله يراقبنا ويشوف الفريق الضرب ساحل العاج ده منو وهو شنو ذاتو ؟ ونجبرهم يزوروا المواقع ويبحثوا عن تاريخنا في الكورة وفي الدنيا حايلقونا برضو أصحاب حضارة (نوبية) وفي الكورة عندنا تاريخ علي مستوي القارة وشلنا البطولة سنة ( 70) . بعدين منو الكان بتوقع مصر تشيل البطولة تلاتة مرات ورا بعض عملوها الفراعنة وحققوا إنجاز تاريخي وبرضو في البطولة الأولي ماكانو مرشحين لكن شالوها ومشت معاهم مرتين تاني .. خليك من ده منو الكان بتخيل إنهم مايصلو النهائيات معانا؟ في النهاية نحن وصلنا وهم طلعو بدري .. خلي ده كلو منو الكان خاتي المنتخب الأسباني يفوز ببطولتين الأولي قارية (أمم أوروبا) والتانية بطل العالم .. صاح دوري قوي وأندية قوية وعظيمة زي الريال والبارسا لكن غابوا سنين طويلة عن منصات التتويج الدولية لغاية ماجو لموها كلها في سنة واحدة .. وبعدين نحن بحساب القارات أحسن من إنجلترا لو مازيها.. إنجلترا وين ليها سنين مافي الحسابات مرات تدخل النهائيات ومرات بره .. عندهم دوري قوي لكن منتخبهم تعبان ومشكلتهم قريبة لي مشكلتنا اللاعبين الأجانب مالين الدوري ومامديين فرصة للإنجليز أولاد البلد يلعبوا أساسيين في الأندية .. مشكلة كبيرة عندهم كل مرة المنتخب يطلع من كأس العالم أو أمم أوروبا يهيجوا ويقولوا ماعايزين أجانب في الدوري أو يحددوهم خمسة لي ستة لاعبين يعني خمسة أجانب وستة محليين لغاية هسي الموضوع داير وعايزين يصلوا لي حل عشان كده الصعب شنو ؟ ممكن تمشي معانا من البداية لغاية النهاية ده بحساب المجنونة ... لكن بحساب الواقع مازدا بحلم وبطمن نفسو ومابعيد يكون زينا لاعب علي الصدفة .. أويكون صدق كلام بعض المحللين إنه الحل الوحيد في بوركينا فاسو وأنقولا عشان يصل الدور التاني .. لو سألوني حاأقول مامتفائل لامع أنقولا ولابوركينا فاسو ولو سألوني أمنيتك شنو للسودان في البطولة .. أقول نجيب قون يغلبونا عشرة بس نجيب قون علي الأقل يكتبوا لينا في تاريخ البطولة عندنا لاعب جاب قون . hassan faroog [[email protected]]
