المباراة هامة .. المباراة عادية .. هامة وعادية .. حدد؟ الإتنين .. المريخ هو الأفضل والأقرب للفوز بنتيجة المباراة .. كيف؟ لأنه أكثر إستقرارا .. بمعني؟ بمعني الهلال مليان مشاكل .. وين ومنو القال الكلام ده؟ ده شيء معروف .. حدد؟ مشكلة هيثم مصطفي مع المدرب وإدارة الكرة .. ومشكلة بعض روابط المشجعين مع الإدارة .. بإختصار الجو في النادي والفريق والمدرجات مولع نار .. وفي المريخ؟ مرتاحين ولا مشكلة ماعندهم .. إستقرار فني وإداري ومجلس الإدارة مركز معاهم .. وفي وعود بحوافز ضخمة في حال حققوا الإنتصار .. بإختصار كل عوامل الإنتصار متوفرة عندهم .. معني كلامك ده الهلال مغلوب .. مغلوب ؟ انا قلت المريخ أقرب للفوز ولم أحدد أن الهلال خاسر النتيجة .. يعني في أمل الهلال ينتصر؟ أكيد .. كيف؟ بنظرية الإحتمالات كله ممكن .. وأبعد من الإحتمالات في حاجة إسمها جنون الكرة .. دي كلها ممكن تلعب لصالح الهلال .. ماملاحظ إنك متحامل علي الهلال شديد .. كيف؟ بحسابات تانية .. الهلال رغم كل المشاكل المعروفة زي ماقلت .. هو متصدر منافسة الدوري المحلي .. وهو الأفضل في تحقيق نتائج خارجية من خلال مشاركته في البطولة الأفريقية .. بمعني ؟ بمعني الفريق لم يتأثر والدليل إنه الأفضل حتي ماقبل مباراة اليوم .. مع ملاحظة حتي لو حدثت الهزيمة ماتنسي إنه الدوري لسه في البداية الأسابيع الأولي والفارق لن يتجاوز النقطتين يعني ممكن تعويضها خاصة إنه الدوري ساخن من البداية والمستويات متقاربة والندية كبيرة والحسابات إختلفت وشفنا معاناة الهلال والمريخ داخل الأرض ووسط الجمهور . كلامك مقنع .. لكن الكفة مازالت لصالح المريخ وبحساباتك المباراة في صالح المريخ .. كيف؟ أقول ليك .. الفارق نقطة واحدة بين الهلال المتصدر والمريخ التاني .. ومستوي الهلال ما أفضل من المريخ من ناحية أداء نفس معاناة المريخ بعانيها الهلال .. لكن المريخ زي ماقلت متفوق في الإستقرار الفني والإداري يعني مافي لاعب عنده مشكلة .. إدارة الكرة مستقرة .. مجلس الإدارة مستقر والجهاز الفني مستقر يعني ماسمعنا ريكاردو مثلا طلع قال راي سلبي في لاعب وحتي ماقاله عن نجم الدين قاله لأنه أخطأ في الملعب وحديثه ماعمل مشكلة في الإعلام ولا مع اللاعب بالعكس لقي ترحيب كبير من الأوساط المريخية لأن العقوبة تربوية ومالية ودي برضه بتدي شيء من الإنضباط لو إتنفذت . أقول ليك حاجة الهلال لو لعب كورة وركز في المباراة وأهم حاجة التركيز ورمي نجومه كل المشاكل المحاصرة الفريق خارج الملعب ممكن أؤكد ليك إنه غالب غالب بنسبة مليون في المية .. لكن المشكلة زي ماقلت ليك في التركيز .. ودي مسؤولية منو؟ مسؤولية غارزيتو وخالد بخيت وهيثم مصطفي .. عرفنا غارزيتو وخالد بخيت واحد مدرب والتاني مدير الكرة هيثم مصطفي دخلوا شنو؟ كيف بالعكس هيثم في تقديري أهم من خالد وغارزيتو لأسباب .. يازول الزول ده مالاعب أسباب شنو واهمية شنو؟ دقيقة أصبر شوية .. هيثم مالاعب .. لكن كابتن الفريق ومعروف تأثيره الكبير علي اللاعبين وإمتلاكه لمفاتيح التعامل معاهم محليين وأجانب وكلنا شفنا بعد عودته الأولي سادومبا لما أحرز هدف إتجه له مباشرة في مقاعد البدلاء وحياه وده دليل علي عمق العلاقة بينه واللاعبين رغم ماكان يقال إنه مابحب اللاعبين الأجانب وبقيف ضدهم . لو إتفق الثلاثة (غارزيتو خالد وهيثم ) وحتي لو إشتغل كل واحد بطريقته في الإتجاه ده ودخل اللاعبين في أجواء المباراة بتركيز كبير ممكن الهلال ينتصر .. مابحلكم برضه المريخ الأقرب ... نشوف . ونشوف كلنا النتيجة بعد صافر النهاية hassan faroog [[email protected]]
