سودانا راجع لي وره عشرين سنه و "الساقية لسه مدوره"! عشرين سنه و "ساقيتنا لسه مدوره"؟! سأل الحكيم... أهلو الغبش... أهلو الحنان... إيه السبب؟؟ قالولو حكم المسخرة!! .... بالله كان مو مسخره كيف العوير أصبح مشير؟؟ و حكم البلد عشرين سنه... ما خلا نقطة دم حلال ما قطره!! ... بالله كان مومسخره لمالو كيزان كيف كتار وحكملو ناسن كيف كبار وكل كوز عوير... كان مدير... أو كان وزير... وعدوهو بى مليون مره!! ... بالله كان مو مسخره قسم بلد... خلاها بس كيمان بصل برضو الحكيم يسأل يقول يا أخوانا ورونا الحصل؟؟ بالله كيف سودانا داك الكان رخا وكل زول يشيل ما أصلو مليون ألف ميل يا أخوانا كيف أصبح عليل؟؟ قالولو حكم المسخره!! ... بالله كان مو مسخره وكتين خلاس دخل المحل والناس منفخا بالزعل تلقى الكويز فى كل محل يحلف بدين أيمانو داك ما أصلو ما بعرف خجل يحلف يقول... شوفو البلاد... بالله مش فوق لى زحل؟؟ بالله شفتو المسخره؟! ... بالله شوفوا لمسخره بلدن خلاس نشفت نشاف لا تشوف زرع... لا تشوف خدار... جفا الضرع... كسرو الفرع... الكان قبيل شايل النوار بالله كان مو المسخره حتى الجناين أصبحت من دون تره!! ... بالله كان مو مسخره وكت البلد ودرت ودار وقام فاتو خلوها الكبار ناس العلم... ناس الفهم... ناس حلو عقدن كيف كتار كان غالبن حل العقد؟! البايني زي شمس النهار بالله كان مو مسخره؟! ... بالله كان مو مسخره فاتو الكبار... وجوها الصغار... قالوها كلمات كيف كبار ناس "تهتدون".. وناس "سائحون".. وناس "ترجعون".. أوعك تصدق يا شباب أوعك تصدق شعبنا أوعك تصدق يا ولد والله كان صدق كمان طال إنتظارك لايوم "يبعثون" خليكا من المسخره!! ... بالله كان مو مسخره قام الوليد دخل القصر من باب موهط بى وره لا عمرو داقشو حجر دغش لا عمرو شاف الدردره لكنو ما ود "سيدي" داك طوالي قاعد فى الضره بالله شفتو المسخره؟! ... لكين شبابنا بنات وولاد حالفين حلف يبنو البلاد حالفين يمين ما يركعو لى كوز عوير... كان كان كبير... أو كان صغير... بس ركعتن شرطن تكون لى خالقن رب العباد ... حالف شبابنا بلا فرز يبني البلد ويزيدو عز وحلف الخليل... يومت يشوف خيرو الكتير والطين ينز.... والعازة تتقدل هناك.. شافت خليل.... بى ضراعو للشبال يهز قالت خلاس مسك الختام قالت حرام....يا ناس حرام تدوها للكيزان حرام وكان داك حصل... ما أصلو ده الموت الزؤام وكان داك حصل... والله تبقى المسخره وكان داك حصل... بالصح بنصبح مسخره!! 31/12/2012م Ibrahim Karsani [[email protected]]
