كلمة طلع بدري عندها حسابات وفلسفة ، ممكن تمشي لواحد في منزله بدون مواعيد ، ويقولوا ليك طلع بدري ، أو تمشي بمواعيد وتلقي طلع بدري ، حتي في الشغل في واحدين بتاعين (لولوة) بطلعوا بدري .. وبدري في فقه الحكومة تعني (البكور) ، عند الحكومة إيجابية وعند المواطن سلبية ، وفي الخروج البدري إيجابيات لاشك في ذلك ، وأشهر ماقيل فيه من الشيخ فرح ودتكتوك عندما قال ( ياايد البدري قومي بدري وازرعي بدري وحشي بدري .. أحصدي بدري شوفي كان تنقدري) ، وبيني وبينكم في طلوع بدري بكون مصحوب بوجع وألم ومرات حزن ، لو طالع علي المستشفي ، أو طالع علي المقابر ، طالعة ليك قطعة أرض ماقادر تدفع قروش رسومها ، طلعت عينك من صاحب البيت ، طلعت روحك من قروش المدارس والروضة والاقساط ومصاريف اليوم ، وحق العلاج والمرتب البقي مابقعد لغاية ماتختوا في جيبك ، مش تنتظر لغاية يوم خمسة ( ده كان زمان) . وفي طلوع بدري مامقبول ومامنطقي ومامعقول ، زي طلوع المريخ من دور 64 في دوري أبطال اوروبا أقصد أفريقيا ، الظاهر ثقافة (عالمي لاتكلمني ) خلت الواحد يكتب ويعيش وهم دوري ابطال اوروبا ويتخيل المريخ في مواجهة بايرن ميونخ الألماني في نهائي الكأس ، مش كمبالا سيتي في التمهيدي. طلوع بدريييي ، غير إنه مامنطقي ومامقبول ومامعقول ، موجع ومفزغ ومخجل ، لا أود التقليل من قيمة الفريق اليوغندي، فهو قد سعي للتأهل من المباراة الأولي وناله عن جدارة وإستحقاق ، فالمريخ لديه (المال) و(جمال) ولاعبين ومدرب بالدورلار الحار ، فريق يتدرب في أستاد عالمي ولاعبين ساكنين في بيوت وفنادق أقلها خمسة نجوم ، أي لاعب بعربية ، والأجانب زي ماقال عبدالصمد من المطار إستلموا عربياتهم . طلع بدري مع إنه عسكر في الدوحة ولعب مع البايرن الألماني وزينت الروسي وريد بول النمساوي والوحدات ( في إعداد ياإخوانا أكتر من كده) ، طلع بدري مع إنه نجح حسب التصريحات الرسمية في إقامة معسكر (مجان) ومباريات (مجان) ، ورجع السودان ربحان كم ألف دولار ( تقول لي شنو وتقولي منو؟) ، وأهم حاجة ماننسي (البصين) عالمي لاتكلمني ، مش الفريق طارق عثمان الطاهر قال مامعناه إنه الرئيس عجبته البصات وقال المريخ ماأقل من العالمي ، وقرر وإشتري والمريخ بدل خاطف لونين بقي خاطف (بصين) . طلع بدري ، المريخ طلع بدري من التمهيدي ، العيب طبعا مافي التمهيدي ، العيب في البدري ، بعدين في سر وعلاقة غريبة بين المريخ و(البدري) ، في فترة المدرب المصري حسام (البدري) المريخ برضه طلع (بدري) لكن ( ماأبدر) من (البدري) الحالي ، كان من دور ال(32) ممكن نقول عليها بدري شوية. وبدريييييييييي المريخ طلع .. ولاتكلمني لو سمحت ، فقد سكتت شهر زاد عن الكلام المباح ، حاجة كده زي الحلم . بدري بدري ، معاكم سلامة ، إلي اللقاء في الموسم القادم مع حكاية جديدة من ألف ليلة وليلة ، إحتمال يكون فيها برشلونة او ريال مدريد منو العارف .. لاتكلمني. [email protected]
