هلالابي فرحان شديد..الفرح ظاهر في سنونو زي (الخضرة)..قال لي (الكرت) وصل؟. قلت ليه كرت شنو؟..المرة دي (كروتنا)..زي موية رمضان وصلت من بدري.
زمن صلاح ادريس نقعد ننتظر (الكروت) زي السيرة.
الكرت جا ..ما جا ..جا ..لمن جاتنا عقدة (كروت).
الكرت تقول (عريس) ..وقت يصل نضبح ليه عديل كدا.
هسع الحمدلله كروت المحترفين الاربعة كلها وصلت (شغل نضيف).. كرتو وصل - السيراليوني كرتو وصل - السنغالي سليمانو سيسيه كرتو وصل - المالي مامادو كرتو وصل.
استديو بس ...(قولوا ما شاءالله)..براكم بتسحروا نفسكم يا الهلالاب.
الكروت دي شكلها كدا فيها (هوبة).
قالوا ليك ديفيد سيمبو عندو جنس (كرت).
كرت يلعبو في الدوري الايطالي.
الكروت وصلت.
ما عندنا أي مشكلة...سيد اللبن لو دق لينا الباب نقول ليه : (الكروت وصلت)...مالك عاوز شنو؟ الليلة يا دوب يوم 22.
الولد لو قام من النوم يكورك ..نقول ليه يا ولد في شنو؟..الكروت وصلت ارقد نوم ، نوم نومك.
صلاح ادريس زمان كان بشتغل معانا على طريقة المسلسلات التركية.
اول حاجة تصل (الشنط).
تاني حاجة يصل الوكيل.
بعد الوكيل يصل (وفد المقدمة).
بعد وفد المقدمة يقوم يصل (فاكس).
الغريبة نحن أي (وصلة) في الوصلات دي كانت بتفرحنا ..وتشقنا ضحك.
من ثم يصل (اللاعب).
اللاعب لمن يصل التسجيلات بكون باقى ليها (15) دقيقة.
صلاح ادريس (شفت) كان بخمنا بالحاجات دي.
اتذكر داريوكان وقابيتو ..نومنا ..صحينا الصباح لقيناهم وقعوا في كشوفات الهلال.
جوا في انصاص ليالي وبرد...عربية الاسعاف ما بتجي في وقت زي دا.
زمان (السيستم) بكون في اخر يوم فاتح للصباح زي الحفلة..المهم اللاعب يصل قبل ما تشرق الشمس.
بعد اللاعب ما يوقع كان (كرتو) عاوز ليه (21) يوماً ..تقول بصل عن طريق بورتسودان عبر الميناء البحري.
اللاعب لمن اجراءات قيده في الهلال تكتمل تكون فترته في الهلال باقى منها (14) يوماً.
غايتو صلاح ادريس في (الكروت) كان متحاسب فينا.
ويا ريت لو وقفت على كدا ..تتخيلوا الهلال إلى الان بدفع في قروش كرت (يوسف محمد).
تقول كرت كاظم الساهر.
باري ديمبا ...جاب زوجتو للهلال عشان تستلم حقوقه ...وهو ذاتو جاء عشان يلعب في اهلي شندي.
ديل غنوا غنا من السودان.
المهم كنا متلتلين تلتلة شديدة في حكاية الكروت دي.
مجلس الهلال الان واضح انه شغال على (موية بيضا)..عشان كدا الكروت وصلت خلال 48 ساعة وبعضها وصل في يومو.
نحن زمان كنا فاكرين الكروت دي بتمر اول حاجة بي الجوازات ثم تذهب إلى ادارة الجنسية ..ثم الداخلية وترفع بعد هذا لوزارة الخارجية.
ثم تمشي ادارة السجون...ثم ادارة حماية الحياة البرية.
ثم ترجع للخارجية تاني ..الخارجية ترفع الموضوع للبرلمان ...البرلمان كالعادة عاوز ليه (21) يوماً اجتماعات عشان يقرر في الامر.
بعد كدا يرسلوا (الكرت) بي لوري تراب للسودان.
الكرت لمن يصل يكون روحو طلعت.
في ناس شفوت (الكرت) القافل عليه ما بفكوا ليك..بعرفوها ..تشمو قدحة.
المريخاب طبعاً كان بستغلوا الاوضاع ..وقت الكرت يتأخر شوية ..يقولوا ليك النادي الذي كان يلعب فيه المحترف ما موافق.
وناس مزمل ابوالقاسم يدوروا ليك في (الوكلاء)..كل يوم يطلعوا ليك (وكيل) جديد للاعب.
الموضوع لمن يصل للمحامي الفرنسي ..زي ما كان في قضية تسجيل كلتشي في الهلال.
هسع مجلس الهلال حسم ليك موضوع الكروت دي...اللاعب قبل ما يطلع من اكاديمية كورة القدم ..كرتو يصل.
المريخاب طبعاً حاولوا يشرعوا لينا المرة دي في (كرت) وارغو.
قالوا النادي الذي كان يلعب فيه وارغو..لم يخطر بانتقال وارغو للهلال ..وقالوا لينا النادي ذاتو ما موافق على الكلام دا.
قبل ما يتموا كلامهم ...كرت وارغو وصل.
اصحابكم ما عرفوا يمشوا وين؟...ما عرفوا يقولوا شيء؟.
اها يا ربي كرت وارغو دا وصل من (سوق الشجرة) في ابوروف.
المريخاب وقت لقوا (الكروت) كلها وصلت..عارفين عملوا شنو؟.
قبلوا ليك طوالي على أحمد بيتر.
قالوا احمد بيتر عندو اسم تاني...وخلوا ليك ناس العباسية يمشوا المحكمة.
وقت لقوا احمد بيتر براهو ما بحلهم ..قالوا تسجيل يونس حارس النيل الحصاحيصا في الهلال ذاتو ما صاح.
نحن عذرناهم ...جماعتكم ما لقوا طريقة في (الكروت) قبلوا على احمد بيتر.
احمد بيتر بحلكم.
كرت سيدي بيه طبعاً قاعد في الاتحاد ...(اعادة قيد) الموضوع ما عاوز ليه أي مراسلة أو طلب افادة.
يعني أي حاجة في السلام ...ما عندنا أي مشكلة.
يونس واحمد بيتر في (الرديف) ...خليناهم كدا عشان تقزقزوا بيهم.
عاوزين نشغل بيهم المريخاب.
المريخاب ديل لازم ينشغلوا بي حاجة ..ما بعرفوا يقعدوا ساي.
اها زولكم بعد الشرح دا ...لف ودور وتاني جاء وقال لي (الكرت) وصل؟.
قلت ليه يا زول ما قلنا ليك وصلوا.
رجع تاني وقال لي كرت الجزولي وصل.
قلت ليه الجزولي منو؟.
قال كرت صلاح ابراهيم الجزولي وصل.
قلت ليه دا كمان عملتوا ليه (كرت)..نجيب ليه كرت من وين من حديقة القرشي.
زولكم غضب ..اعتبر الكلام دا استخفاف بيه ..قال لي انا بتكلم عن (كرت) الجزولي وصل.
يا زول الجزولي ما عندو كرت ...الزول دا اتسجل بس بخطاب شطب من الخرطوم الوطني.
قال لي ...الجزولي دا موش محترف اجنبي.
قلت ليه قول ما شاءالله ..خلاص عاوزين تطقوا لينا ...الزول دا سوداني ..سوداني عديل ما زي ناس كلتشي وتراوري الجنسوهم بي (تلفون).
صاحبكم ما صدق..معقولة الجزولي دا (وطني)...انا بعد الضجة دي ..وزعل المريخاب ديل (وعنكبتهم) افتكرت الجزولي دا محترف اجنبي...بعدين انا شفت اهدافو في سيكافا ..قلت الاهداف دي ما اهداف سوداني.
يا ود الناس انت الجزولي دا موش شفتوا في سيكافا مع المنتخب ..كيف يعني يكون (اجنبي).
والله الجزولي دا مفروض تشوفوا ليه (كرت)...الزول دا ما ساهل ان شاءالله كرتو تجيبوه من (المجلس الوطني).
أو اقول ليك حاجة ..صلاح الجزولي دا مفروض تجيبوا (كرتو) من اتحاد المهن الموسيقية ..الزول دا (فنان).
فنان عديل كدا.
سكت ..ما قدرت اقول ليه شيء ..صاحبكم رغم انو في البداية كان ما فاهم إلا انه في النهاية (منطقني) ليك.
اعمل شنو؟...الايامات دي (المنطق) حايم زي القرين.
هسع (القرين) الدخلو في المنطق شنو؟.
موش مرات الزول وقت يشوف ليه قرين بقعد (يتمطّق).
دي العلاقة بين المنطق والقرين.
بعد ما اتجاوزت موضوع كرت صلاح الجزولي دا...زولكم قال لي صلاح الجزولي اصلو ما كان يخلوا حكايتو تمر ساكت.
يعملوا ليه شنو يعني يا ود الناس؟.
كيف يعملوا ليه شنو؟...على الاقل صلاح الجزولي دا كان يجيبوه بي (طيارة).
والطيارة تصل كمان الساعة اتنين صباحاً ...يعني (فجرًا).
إن شاءالله تنزل في شارع واحد.
أو تنزل في رأسك دا.
عشان ناس احمد الحاج وابراهيم الجيلي يتلتلوا شوية..مسجلين صلاح الجزولي وما عاوزين تمشوا المطار تستقبلوه الساعة اتنين صباحاً.
ناس المريخ ديل ذاتهم لو ما شافوا صلاح الجزولي وصل فجرًا لمطار الخرطوم ..الموضوع ما بقع ليهم.
إلا يجيهم من المطار.
نوع ديل بس تكافحهم الساعة اتنين (فجرًا)...زي وارغو.
اها لو عملنا النظرية دي ...المريخاب كانوا ح يعملوا شنو مع (عنكبة).
المريخاب طوالي كانوا مشوا بيه الميناء البري.
في الميناء البري خلي معاوية الجاك ومحمد النصري يمشوا يستقبلوه.
نحن لاعبنا صلاح الجزولي بنجيبوا بالطيارة ..وبعد ما يصل بالطيارة ح نقعد ننتظر (كرتو).
انتوا قايلين صلاح الجزولي دا لاعب ساهل.
فاكرنو (عنكبة).
قالوا ليك عنكبة وقت المريخ كان عاوز يسجلو قالوا ليه ما عندنا خانة في الهجوم.