الشارع نفس الشارع ياهو شارع ابوروف...الشارع يبدأ بصناعة المراكب على الشاطىء ..والدكاكين خاصة على ماأذكر سيد الحلبى وحنكل العجلاتى وعمك ابراهيم جزلان والسر بتاع الفول وأدم طرشى ،وهذا الدكان كان يعج بأظرف ظرفاء ابوروف عبد الكريم الزبير والفنان ود السواراب صلاح محمد عيسى (آى ..كان بجى من ودنوباوى). وبداية اللفة معدية شمبات قبل الكبرى وكشك الفاضل خضر مواجه الجامع ،وبالمناسبة عتيق فى نفس الشارع،والفارس الاديب الطيب السراج ايضا. وخلاص وصل سوق الشجرة آل ابوسمرة وآل محمود الفكى ومصطفى جيش والنور عنقره والجبل الشامخ شيخ حجاز مدثر ،وسوق الشجرة عمرانه بزنك اللحم والخضار ،وعمك عطا العجلاتى والخرسانى ،وبشرى الحلاق ،وعوض كرار (ومالى قلبى الاسروه) محجوب عثمان ،وهاشم ميرغنى وخالو الظريف (خالد حاج البشير) ،والعازف الماهر ودنفر وحسن برس والطاهر أب كبجه ،وحاج الشيخ ودياب وتندل وعمنا شيخ الجزارين شيخ الذاكرين وحبيب الله وحبيب الشيخ قريب الله عمنا بابكر والسر ودبشريه التقى الورع وعمنا ابو الصوفية عبد الرحمن بازروطه ،وماأنسى قرصة عمنا اسكندرانى وهم من كبار طاقم الترماى ،وانا فى هذه اللحظة فى ود البنا بين شارع على نقد الله ودكان النعيم بكراوى ،ومقابل الاقرع ،وأضانى فى العمود وشايل العمود لأبوى فى السوق ،وبسمع خلاص الترماى خشى ود البنا والساعة بقت ثلاثة ولازم اسوق معاى عمنا عمر البنا عشان أسلمو لصالون الاديب الاريب على محمود تنقارى العمرابى. وفى السكه من ود البنا الى ود أرو المحطة قصاد بيت خالد أبو الروس وعمنا عبد القادر الزين قبل عبد اللطيف الضو ،والشارع ماشى يمين نقطه البوليس،قبل طلمبة شل على سكر(رحمه الله) والترماى حقى ماتودرو،وبوفيه ود السليم،والعشا كان عنده بقرشين،وكباية اللبن الشب المشلخه بعشرة قروش والسلن دبله من عمك باسطه ادينى بين. وخلاص الترماى وصل مكى ود عروسه وفات دكان عربى البارودى وخاشى فوراوى ونادى الاروستقراط وكهربة عامر ،وخلاص شارف السوق ،عمك فضل الله الساعاتى مواجه عبد الكريم العجلاتى والخرسانى وأرونت وأبونخله فى نفس الشارع ،وحاج نقد الله على اليمين .وقبل التوخى نزلت بعمى عمر والعمود الاربعة فرد ،وخاشى بالملجة والصياغ وعلى خليل وجارو عودو والأمين عبد الرحمن والتبيداب وناس مله وحسن عبد الباسط وود كوكو وديل ياهم الصياغ ،صياغ ام درمان الماخمج،وخاشى بأبومرين ونجيب كباشى وعلى يمين سوق الطواقى.(الله يرحم الكتيابى ويسامح النميرى).وفى الشارع ده النية والروب الرايق وحاجة خديجة وبت الحناوى والتومة.قبل ما أسلم أبوى العمود لازم اسلم عمنا عمر البنا لعمنا على محمود التنقارى (وهو بالمناسبة شاعر الفلاتيه حكر، إلا كيف لا أعشق جمالك لعثمان حسين). وبداية الشارع شارع الشوام قبل حسين اليمانى بتاع الدمام ومرسى بتاع العرديب، يوجد دكان عمنا على محمود وهو من الصوالين العامرة بالادب وأهل الفن ،فى هذا الصالون شايف انا حدباى وعتيق وأبوصلاح وعائشة الفلاتيه ومنى الخير وعوض جبريل وعطا محمود.وبالمناسبة دكان على محمود تنقارى وهو جار عمنا عبد العليم نسيب الشاعر عبد الرحمن الريح ،وجنبو طوالى عباس الحداد(أأمن وأنظف من يبيع عسل وسمن فى السودان وفى أم درمان)،والدكان عامر بالأدباء والشعراء ،والسنوسى يبايع ،وفجاة ظهر من شارع الخضرجيه عمنا ميرغنى المأمون الوسيم بعراقيهو الساكوبيس ،فهو بالمناسبة مشلخ ووسيم جدا جدا. وشارع الخضار ده فيهو قنديل والتوم عمر ومبارك صافى الدين وعمر التوم ،وفى الشارع ده متوكل لاعب الهلال الجزار وعمر ابوزيد وابراهيم سعيد ومنصور وأطول وأظرف جزار الريح ود أم زميم ،ولسع شايل العامود وأكيد العمود برد ،وانا ماشى لأبوى فى زنكى التشاشة مواجه قصيرية عبد القادر وسالم خال العيال . على الشمال عبد القادر خال العيال ومعاهو العبادى وعلى مأذكر كان معاهم حسن العسكرى(ناس أبارو) وبعده دكان الخليفة على نقد الله ومواجه سالم أظرف ظرفاء امدرمان سوار على نميرى.