بسم الله الرحمن الرحيم في السلك *ايها الناس *نرجع لموضوع اوكراه *النظرة الثاقبه *والتخطيط السليم *ووضع هدف استراتيجي *والتنسيق في تنفيذ الخطط *والصبر علي كل ذلك *يؤدي الي نجاحات كبيره *برشلونه مثلا *صبر صبر ايوب علي ميسي *فكان نتاج صبره وتخطيطه ان كسب لاعبا مهولا قاده من انتصار الي انتصار *ميسي ناس برشلونه ساقوهوا يجرجر في كرعينو *الوقفه في تلتله *مصاب بداء عضال *توكلوا علي الواحد الاحد *وسنين اخضعوهوا للعلاج *لم يكلوا ولم يملوا *كان مقتنعين بان لكل مجتهد نصيب *انتهي العلاج *وتأهل ميسي *ونزل الملعب *اي كورة يلمسها ميسي *كانت تصفق لادارة فاهمه ذات نظرة فائقه الروعه *المبدع كان في قصة ميسي الاسطوره *الاداري الذي اوصي بتحمل نفقات علاج وتأهيل ميسي *لم يكن ميسي هو المبدع برغم ابداعه قدر ذاك الاداري *لذا ولذلك *اوكراه صغير وموهوب *نحنا لنا فريق كرة وليس كارو *حتي نجري وراء الحصان الذي يستطيع جر العربه اليوم *لدينا فريق *يبقي نعرف نؤهل اللاعب اول *نزرع الصحة فيه *لنجني ثمار تخطيطنا وصبرنا *ايها الناس *موضوع اوكراه ده اقعدوا ليهو *فكروا كويس *المريخ ما حايقفل بعد شهر *المريخ باق مابقيت الحياه *فكروا تمااااااام *المهم *لجنة تسجيلات الهلال *قالوا عندها مؤتمر صحفي *برعاية كردنه *وقالوا حا يفتوا فيهو الموضوع *وتحت تحت سمعنا انهم دايرين يحجموا الناطقه وروشا *يعني تاني تشكيلة ابو الهل ما حايكون فيها تدخلات صحفيه *وبمناسبة كردنه *اعلن كردنه عن تفجير قنبلته يوم الخميس بالنيل الازرق *فجرها يا كردنه جمب البحر قنبلتك دي *عشان مباني التلفزيون براها ما ناقصه *لو انفجر زول من الضحك في التلفزيون *سته حوائط من حيطانه بتدق الدلجه *ولكن اخاف ان تكون قنبلة الكاردينال *هي اعلان مريخيته *وتاني نرجع للقصه بتاعت هيثم *سته يطلعوا الكشافه *وسبعه يعتصموا في النادي *ويقفلوا المسجد *وتمنيه يتدردقوا في شارع البلديه *المهم *التسجيلات ليس هدوم عيد كما اسلفنا *بس تشتري عشان تقول جابوا لينا هدوم العيد وحاجات حلوات كتاااااااار *التسجيلات رؤية وتخطيط واحتياج للاعب معين لوظيفة محدده *شايف الاهله فرحانين بكردنه *خمه ليهم بالكونتينر *وهم يقولوا *جابوا لينا وجابوا لينا وجابوا لينا *وجابوا لينا لعب وحاجات حلوااااات *ماعارفين كم اوتوبونج وكم عيد حب في الكيس *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *قالوا لينا وقالوا لينا وقالوا لينا *ان الملابس البتدخل البلد دي *غير مطابقه للمواصفات يا والينا *وقالوا لينا قماش الجيش وقماش المدرسه اذا اتحرق بتقلب زفت يا والينا *موش كفانا الزفت الفينا !!!! *وقالوا لينا عمر الزبادي مددوهوا لينا *وعمر المعلبات المن بره بتجينا *والبسكويت يا والينا *كلهم مدوهم لينا *لكن الرأي عندي يا والينا *زيادة عمر المواد الاستهلاكيه بقلل العمر الفضل لينا *ولا ما كده يا والينا !!!! سلك كهربا ننساك كيف والزبادي في البلد دي بقي طويل العمر ,,,طال عمرج بالفواكه وطال عمرج بدون فواكه والي لقاء سلك
