الناس لايكة موضوع هيثم لبانة قرر هيثم ذلك لنفسه لا اقول وهو في كامل قواه العقلية ولكني اقول قرر بنفسه لنفسه ما حدث لا اعتقد ان المريخ يمكن ان يسامح هيثم او ان يفتح صفحة جديدة لهيثم لان هيثم الذي قابله المريخ بالوفاء لم يستطع ان يبادل المريخ ذلك الوفاء بالوفاء وان كان في الهلال رجل قوي اسمه الامين البرير قد اتخذ القرار في مواجهة هيثم فبالمريخ رجال اشداء اتخذوا القرار بالاجماع ما قرار رجل واحد قرار مجلس وشعب والرجعة عنه مستحيلة في الهلال وجد هيثم من بكى ووجد من أضرب عن الطعام ووجد من اعتصم ووجد من صعد الكشافات محتجاً على شطب هيثم ووجد من بكى واتدردق في شارع البلدية لكن في المريخ يا هيثم لن تجد من يسأل عن حالك لاننا نتخذ قراراتنا بعيداً عن العاطفة ولو كنا نريد بالهلال سوءاً لشطبناك وتنازلنا عن مقابل الشطب بل وسددنا لك حافز تسجيلك للهلال كانت الدنيا قامت كان الهلال اتفرتق لان بالهلال اناس لا يرغبون في سماع اسمك فهم يرون انك لم تقابل اعتصامهم بوفاء ونحن نرى انك لم تبادل وفاءنا بوفاء يبقى عدم الوفاء ده يا هيثم بجيب الوفاة كأنك مافيش لا عندنا ولا عند الاهلة حاتلعب بعد ستة اشهر ولكن ستلعب طاولة ولكن لن تجد من يلاعبك الطاولة فالشيش كلم البيش قال ليهو الزول ده وفاء مافيش حاتلعب طاولة براك بدلها بالسلم والثعبان بتتلعب ليك براك سلم يوديك السماء وثعبان يعيدك لروابط بحري ولكن هل يسعفك الزمن يا دفعة !!!! المهم ملف التسجيلات تعامل معه مجلسنا بشكل جيد فقط الباقي علينا نحنا في المساندة والصبر والتشجيع اما حكاية ذهاب الوالي دي فعندي فيها راي داير ليهو عمود براهو الراجل برضو ما شويه ويستحق ان نتناول شأنه بدقة وحيادية ووعي وعقلانية مع العلم باننا نحتاج لموية صحة بي ميتين الف جنيه في التمرين ونتمرن تمرينين في اليوم يعني اربعطاشر تمرين في الاسبوع اربعطاشر في ميتين الف بتساوي الكتير فهل نتمرن بي ريقنا يا صديقنا زي ما حصل ؟؟ ام يتحمل الموضوع ملاح كما تحمل من قبل راجعين بي روقة اها نجي لي شمارات والي الخرتوم كان شفت يا والينا في راسنا ختينا ايدينا يوم سمعنا بي ضبط خمور بالكونتينر حوالينا قالوا بتاعت سفارة جايه من بلدها لينا وقالوا التصديق بتاع عفش اتباع لتاجرا من عندينا وفي ناس بقولوا ما اتباع ده بتاع السفارة يبقى يا والينا في الحالتين الخمارة في السفارة وبيع التصديق من العوارة وترك السفارة جمب العمارة ببقى مزيد من العوارة سلك كهربا ننساك كيف والخمارة في السفارة بالكونتينر والى لقاء