بسم الله الرحمن الرحيم في السلك *الاهله حلوين شديد *مكنتهم وااااحده *اصلوا ما بغيروها *عشان كده لم يبارحوا مكانهم الصفري ابدا *اي هزيمة *في الملعب بره الملعب *المكنة البتشغل الجمهور وااااحده *عندنا شكوي وماشين الفيفا *فيتا يوم غلبهم قالوا ماشين الفيفا *لي اسي ماوصلوا *بكري المدينه يوم غلبهم يرجعوهوا *قالوا ماشين الفيفا *كروز القنبله يوم غلبهم يجيبوهوا *رجعوا لموضوع بكري المدينه وماشين الفيفا *اي فشل *ماشين الفيفا *كروز القنبله في تونس انفجر *قالوا ماشين الفيفا *وجمعه ود ابيي الاتسجل مجنس *لو ماسجلوهوا ليهم بالطريقه دي *كان قالوا ماشين الفيفا *والفيفا تعلم بان جمعه ماشاف ابيي بي عينو *معقوله زول مولود في ابيي يتجنس للعب في السودان ؟؟؟؟ *يعني ممكن نتوقع يا عماد زول مولود في حلفا *نجنسوا حتي نلعبوا في المريخ ؟؟؟؟ *الجنسيه بقت ولائيه ولا بالمحليات يا عمده !!!! *ولسه عند كلامي *مشتهي لي جبنه في نادي الهلال يشربها معاي روشا وتعملها فطومه *تعالوا نادي الهلال نتقهوج يا روشا *واتقهوجي *المهم *مكنة الفيفا مع اي فشل دي بقت ما بتقسم *القصد منها تخدير الشعب الهلالي الفضل *غيروا الفكر يمكن تمرقوا من الصفر *ايها الناس *ليست بدعه ان يسافر غرزه لقضاء اعياد الميلاد عند اهلو *واثارت الموضوع ده ما بتعفيكم من الاعتراف بفشلكم في تفجير كروز *كروز انفجر يا ناس *ونحنا انفجرنا من الضحك *قومي واتفجري سوي الجبنه يا بنيه *احمد بيتر جنا *الحصل في موضوعو شنو ؟؟؟ *وماذا حصل في البلاغ المقتوح بالقسم الجنوبي في الخصوص ده !!!! *ولا طلع برضو من ابيي !!! *المهم *قالوا سيراليون توجت سيمبو افضل لاعب للعام 2014 *ناس سيراليون ديل ماشافوا كورة التلاته *سيمبو ده كان متداخل مع ايمن لمن ايمن جاب التاني *سيمبو ده كان ناطي مع تراوري لما تراوري رقدها لي ضفر وضفر جاب القون الاول *سيمبو ده كان عندو ساقان ضمن الاتنين وعشرين ساق العبرتهم كورة ايمن لي راجي *وكان عندو ساق ضمن الواحد وعشرين ساق العبرتهم كورة راجي للشبكه *الوكت داك كان رافع واحده *مادايرين نظلموا ساي *كان ده افضل لاعب في سيراليون الموسم ده *يكون الموسم ده في سيراليون مجمد *المهم *هلالابي قال ماشي الحج *والناس يحكوا ليهو عن الحج *فرحان شديد *قال وروني الناس بعملوا شنو في الحج *حكوا ليهو *لما وصلوا حتت من مكه تمشي المدينه *قال ليهم من مكه امش وين ؟؟؟ *قالوا ليهو المدينه *قال والله ما امش *خليت الحج *ماشي الفيفا *اها *نجي لي شمارات والي الخرتوم *كان شفت يا والينا *عندنا قصيده دايرين نقولها بس انتو اصغوا لينا *حكومه جننتينا حكومه غشيتينا *حكومه واعدتينا ولما قشرنا وجينا *حكومه شريتينا *مفروض عليك مجاني تقرينا *في اكلنا تدعمينا *من رسوم علاجنا تعفينا *ولما نقرأ توظفينا *تشغلينا *موش تشغيلها لينا *الامل كان كبير في الحكومه يا والينا *في دعمها لينا *قبلها حكومات برغم الظروف ارضعتنا يا والينا *حكومه كنا راجينك ترضعينا *تقومي فجأه تفطمينا *اها انفطمنا يا والينا *يلا لحسينا *وباكر سنيناتنا بتقوم بتقدري تأكلينا !!!!! *اها فطمتينا *بتقدر علي صراخنا ونواحنا ولا بتجليدنا وتقهمينا وتقهرينا *وبالرجاله تفطمينا !!!! *والينا *الفطامه فيها كوراك وبكي وسهر ويمرقوا بينا الشارع يلولونا *بتقدر علي الكلام ده يا والينا سلك كهربا ما بننساك والفطامه حااااااااااره والي لقاء سلك
