بسم الله الرحمن الرحيم في السلك *زماااان *بدري الكلام ده *ايام الجاهليه الاولي *كان في بتاع خيال فاتح خيال اليوم كلو *قبل ما الخيال الفاتحو يقفل *يمشي يتم التنك *نايم فاتح خيال *صاحي فاتح خيال *ياخ ده مرة فاتح خيال ونايم *حلم ليك انو بقي رئيس جمهوريه *في الحلمه ديك عذب ليك الامة دي عذاب *عذبهم ليك لما عرفوا حاجه *في خيالو داك *في اليوم بطلع ليهم عشرة مراسيم دستوريه *يلخبط ليك المراسيم في بعضها *يرسمها ليك زي رسمات الحنه بتاعات اليومين دي *لا تعرفها صفق ولا تعرفها طبق *ويعمل ليها صبغه كمان *عشان تشيل سريع والشعب يشوفها حسب اعتقاده *ياخ ده في نومو داك مرة طلع مرسوم *الشعب ينوم يومين في الاسبوع *حسب الخيال *اها *الزول ده قال ليك فاتح خيالو ده من زمن عبود *عبود مسك بي جاي وهو فتح خيال بي جاي *عبود مشي وهو فاتح خيال ماجايب خبر *الديمقراطيه جات وهو فاتح خيال ماجايب خبر *نميري جا *وهو فاتح خيال ماجايب خبر *قعد اربعطاشر سنه وصاحبنا فاتح خيال ما جايب خبر *نميري اعلن الشريعه بعد الاربعطاشر سنه *وصاحبنا في خيالو *يوم قالوا كانت ظروفو كويسه *بعد سبتمبر تلاته وتمنين *نميري الوكتكت داك تم خمسطاشر سنه *قال يخلي الخيال البلدي ويشوف خيال افرنجي *مشي محل الخيالات جمب دار الخياله *محلات الخيالات دي كانت دائما جمب دور الخيالات *لافي لمن الفيلم انتهي *مالقي محل ببيع خيالات *قدر ما فتش *مالقي ليك اي محل بتاع خيالات *قام سأل ليهو زول *الزول قال ليهو الحاجات دي قفلوها بدري ليها قريب سنتين *صاحبنا وقف يتهوزز *وسأل الزول *منو القفلها الله يقفل شنو اقول ليك ؟ *واتلفت (تفه ) *قال للزول طالبني حيلفه ؟؟؟ *والله انا *اقول ليك شئ *اخو *انت اخو والله *لكن داير اسألك *ده منو ال....ال......ال..... القفلها ده ؟؟؟ *الزول قال ليهو قفلها الرئيس *صاحبنا قال ليهو عبود ده جن ولا شنو ؟؟؟؟ *صاحبنا ماعارف الرئيس منو *عايش في خيالو لما طشه شبكه *ياخ ده شدت ما ادمن الخيال *بقي لما تفك بتترتح *ولما يكبها بمشي عدييييييييييييييييل *الناس سموهوا النصيح *اها *الاهله امس ذكروني الزول ده *ذكروني النصيح *ربنا يهديهو لو كان حي ويغفر ليهو لو اصبح في رحمتو *المهم الاهله زي النصيح *ماشين يأيدوا ترشح السيد الرئيس *شايلين لافته مكتوب فيها *مجلس الادارة والجماهير *وكاتبين فيها *مجلس ادارة نادي الهلال وجماهيريه المليونيه *يساندون ترشيح الفريق عمر حسن احمد البشير *الناس ديل فاتحين خيال من زمن الريس فريق خلي بالك *الريس بقي مشير ليهو سنين يا *يا اخوتي الاهله *مافضل ليكم الا تكتبوا مجلس الادارة والجماهير يؤيدون ترشح الفريق عبود لدورة رئاسيه جديده *حيرتونا *مدرب فاتح خيال *ماقلنا شئ *كمان المجلس والادارة برضو فاتحين خيال !!!!! *كلكم نصيحين !!!! *المهم *امس في تاني تجاربنا بقطر *لعبنا مباراه كبيره *وفزنا بهدفي وانغا وراجي *وشارك اوكرا *وامتع واقنع *وشكل الفريق كان جيد *يعني المعسكر ماشي تمام *ونحمد الله *ايها الناس *قالوا البايرن طالب كورة ضدنا في قطر *من حقو *وغوارديولا ليهو حق يطالب بمقابلتنا دوحويا *الراجل بعرفنا وبنعرفو *وطبعا ما معقول يطلب لقاء ناس لا بعرفهم ولا سمع بيهم *يعني لو قلت ليهو الهلال *حايقول ليك يطرشني ويعميني *قلت لي الفريق عبود يا روشا ؟؟؟؟ *زول يفتح خيال لدرجة رئيسو البحبو القاعد معاهو خمسه وعشرين سنه *مابعرف رتبتو ؟؟؟؟ *خيالكم عجيب يا فطومه يا اختي *المدرب ده اثر علي الكيان اظنو *ياخ ناس المعارضه عارفين رتبة الريس *قلت لي عبود !!!! *المهم *بتاعت الفريق عمر حسن احمد البشير دي *مادايرهليها حلقه يا عثمان حسن مكي ؟؟؟ *اسي دي لو كتبوها ناس المريخ *كان المجال الرياضي لي اسي شغال *لكن صدقني *مقاطعة المنتجاتالدنماركيه *ومقاطعة الطبيه *قربن الاتنين *اها *روشا كتب مانشيت *رئيس سابق لنادي قمة مطلوب سبعه وعشرين مليون ريال *غايتو نحنا الاطناشر سنه الاخيره رئيسنا مامن الناس البتدينو *وقبل تلطاشر سنه ماهل ابو جنه السعوديه دي غير الحج ما مشاها *حتي قروشو بتاعت الحج جا راجع بي باقيها *شوفوا منو المديون *روشا زاتو عملها ظااااااهره *قال عندو اربعه كرعين وبضبحوهوا في الضحيه وبقول باع *باع ده ماعندنا يا روشا *المهم *الاهله لسه خايفين من كورة شندي الفي شندي الفي الشتا ده *احتمال يرموا الطياره بس ما يمشوا شندي *وحتي لوالحكم الفاضل ابو شنب *البقت بقت *خايفين يرجفوا *ولو لاقاكم محمد عبدالماجد برجف *ده مامن البرد *ده من شندي *شندي زاتها فيها فراد جيده *شيلوا ليكم فراد من شندي *وقفوا بيها الرجفه دي *بالله من قالوا ليهم شندي *الرجفه الياها *فرفرفرفرفرفرفر *اثبتوا *كتر البتاتب عيب *ايها الناس *ان تنصروا الله ينصركم *اها *نجي لي شمارات والي الخرتوم *الليله يا والينا *حانقرأ ليك الاخبار انتبه لينا *مع كلو خبر بنعلق يا والينا *استحملنا ما العمر كلو مستحملنكم تعلقوا فينا *اها *وزير الصحه قال ما نستحم بالمويه البارده يا والينا *قال تسخنوها اول عشان الجلطات ما تجينا *لا ياخ دي كانت فايته علينا *قول ليهو يا والينا *هو وينو الغاز البسخنها لينا *لو خايف علينا سخنها وجيبا لينا *وفي النشرة طائفه اخري من الانباء يا والينا *الخضر: الخرطوم ستودع قريبا كسورات الصرف الصحي *وكسورات السوق منو البودعها لينا *الماليه تدرس زيادة المرتبات لينا *يادوبك بتدرس يا والينا *الزيادات ليه ما بتدرسها طوالي بردلب ترميها لينا *يعني بقت دراسه ومماطله لما بقت علي زيادة مواهينا ؟؟؟؟ سلك كهربا ننساك كيف وبدون دراسه يزيدوا لينا والا بالدراسه لما يجوا يزدوا لينا والي لقاء سلك [email protected]
