بسم الله الرحمن الرحيم في السلك *طبعا الامارات دي في حقيقتها حلال صغيره *لموها شيوخها في لمه واحده عشان تبقي دوله *حلال صغيره *زي مثلا في الجزيره عدنا حلال برضو *الحله مرات بسموها علي اكبر زول في الحله *مثلا تلقي حله اسمها عباس *وفي حلة تاني اسمها قسم السيد *وفي مثلا اسماء بتدبل *يقوموا يفرزوها بي اسم تاني *زي التكله رفاعه والتكله ابشر *تكلتين عريقتين ومعالم بارزه في خارطة الجزيره (الكانت خضراء ) *المهم *الحله بسموها اماره *والاسم ده ماغريب لينا *عندنا برضو هنا امارات *لكن بالسوداني بنسمهيا بدل امارة عماره *العماره طه وعمارة اب ايد *المهم *الامارات لموها اهل عمك نهيان *عشان كده آل نهيان بقوا مرجعيه اماراتيه لا يمكن تجاوزها *نهيان الوطت داك كان صغير *يادوبك دخل المدرسه *دفعتوا في الفصل قاعدين لي اسي *حاتقول لي دفعتوا منو *اوريك *دفعتوا الناس اللعبوا امس ضد الهلال ديل *الزول اب دقن وصلعه بتاع النص ده *كان قاعد جمبو في الكنبه *وبشف منو كمان *ومتواصلين الناس ديل *بتلاقوا في الاسبوع تلاته مرات في مركز العلاج الطبيعي *اظن فطومه اختي لمن مشت تزور لاعبي الهلال في مركز العلاج الطبيعي قابلتهم هناك *وتكتكت معاهم كورة امس دي *اسي قال ليك اعمامك الرطوبه قامت عليهم *معقوله يا فطومه *زول بصلي في الكرسي تلعبوا ضدو كورة ؟؟؟؟ *وعلي ذكري فطومه *طبعا فطومه بتقول لي سلكوني *من اول امس *من كورة شالكا *كلما تجي تقول سلكوني *بتقول شلكوني *شلكوني لو تقيله عليك يا فطومه *قولي لي شلوكي *كلو شالكا يا اختي *المهم *قال ليك في كورة امس فطومه حيدروف بوصفها منشقه *صافحت اللاعبين قبل المباراه *قالوا اول واحد صافحتو قالت ليهو كيف يا حاج *قال ليها مليح يا بنيتي بس الرطوبه مرضرضاني *التاني شكي ليها من المصران *التالت السكري قايم عليهو *الرابع الرطوبه عسمتوا شديد *اعمامك الواحد فيهم يكون عامل ليهو تلطاشر حجه واربعين عمره *بعمروا شديد الناس ديل *وعشان بعمروا شديد بعمروا كتير *الواحد بعد يفوت الميه *عمرو بحسبوهوا ليهو بالعمره *تقول ليهو عمرك كم يا حاج ؟؟؟ *يقول ليك حجتين وثلاث وثلاثين عمره *طوالي تعرف عمرو ميه واحد واربعين سنه *ميه ثابته *وحجتين الواحده بي اربعه عمرات يعملن تمنيه سنين *والتلاته وتلتين عمره بي تلاته وتلتين سنه *ياها الميه واحد واربعين سنه *حياتهم ميسره *وامورهم شالكا *اقصد امورهم ساكه *المهم *بالامس خسرنا تجربتنا الوديه الاعداديه في قطر *اشركنا لاعبين جدد *واشركنا لاعبين في خانات ما بتاعتهم *كلو تجربه يفترض ان تفيد الجهاز لفني *لكن بصراحه *طريقة غارزيتو في اللعب *بتعتمد علي حركة شديده من المهاجمين *الراجل ببدأ الدفاع بي مهاجمنو *عشان كده اقل خطأ او تراخي من المهاجمين في دور المطارده *بعمل كاونتر اتاك في مساحات بتكون فاضيه في دفاعاتنا *لذا لااتوقع من غرزته الاعتماد علي لاعبي الوسط والهجوم الاشتهروا باللعب اللين *وهي طريقه اذا اجدتها تضمن الفوز *واذا اخفقت في تطبيقها *يبقي تتقبل الخسارة ولا علي كيفك *ايها الناس *دحين الزول الكرموهوا ناس الوصل امس ده *دحين ما لعب مع بشارة وسانتو وكسلا في الدوري الاماراتي ؟؟؟ *افيدنا يا روشا *الذاكرة خذلتنا *لانو في واحد مقيم هناك من زمن نميري *قال لي الزول الكرموهوا ده لما طلع من بطن امو *البترول في الامارات ماطلع *ايها الناس *بالهلال الشفناهوا امس ده *صدقوني *كردنه ماقاعد كتير *يا حليلك يا كردنه *حاتوحشنا *ايها الناس *الغريبه السنه دي ناس روشا ماقالوا فلان يطلب كاريكا *وعلان يطالب بضم مساوي *ومدرب عالمي (عالمي دي حارقاهم شديد) يقول ان نيمار مكانه برشلونه *السنه دي نسوا المكنات المعهوده *ياربي المانع شنو ؟؟؟؟ *ايها الناس *ان تنصروا الله ينصركم *اها *نجي لي شمارات والي الخرتوم *والينا *تفتكر في الشتاء ده كيس العيش بي صورتو دي بكفينا !!!! *تفتكر بنقدر نعيش شهر تاني يا والينا ؟؟؟ *طيب ليه مافي حد سائل فينا !!!!! *اهمالكم ده يا والينا *علي الطلاق بودينا *وكان مشينا يا والينا *هناك بنفتو ما تقولوا لينا *منو القدم شكوي فينا *بنفتو وبنحتو كان لينا كان علينا سلك كهربا ننساك كيف وكان حتيناهوا وفتيناهو مانعرف اللينا من العلينا ,,,هو انتوا شرحتوا لينا والي لقاء سلك