بسم الله الرحمن الرحيم في السلك *هروب الهلال من اهلي شندي بات واقعا وظاهرا جدا *بينما خالد عزالدين يطالب بتأجيل لقاء شندي لدواعي الاعداد *ولان الهلال بكون طالع من لقاء المريخ يا دوب *ومن قبله محمد عبدالماجد ردح ردحي شديد *منذ اعلان القرعه وهو بردح لي اسي *قال القرعه ملعوبه *اول مره نسمع بي قرعه ملعوبه *الطسه دي يلعبوها كيف يا ابو حميد ؟؟؟ *وجاء من بعد خالد روشا *ولان روشا لايعترف بالعجز الهلالي *فانه يبرره ومرات يزوغ بي هنااااك *قايل روحو بدس العجز الهلالي وبخفي المواسير *روشا في دي زي الشافع اللما يجي يدسه منك بغمض *يغمض في حتتو مفتكر انك ماشايفو عشان هو ما شايفك *العب غيرها يا روشا *سامعنك قلت الروب *وشايفنك *يااااااااااااك *وقرقرقرقرقر *اضحكي *جانا روشا امس في مانشيت كبير بي زوغه جديده من شندي *زوغه جديده والارباب شايل الحديده ؟؟؟؟؟ *الارباب قال الضرب يبدأ من الجيلي *تزوغوا وين عاد *مانشيت روشا بقول *هارد لاند النيجيري يتسلم التذاكر والفيز ويصل عقب القمه لمواجهة الازرق *شفتوا الزوغه دي حريفه كيف *يعني كردنه يدفع تذاكر بعثه كامله واقامتها واعاشتها *عشان بس يهرب من لقاء نمور الارباب *وين الفجيره والاعداد والاقمار ؟؟؟ *اقماركم صناعيه ؟؟؟ *الاقمار الصناعيه بتبوظ *مازي الطبيعيه *ايها الناس *اذا وصل هارد لاند النيجيري *يبقي كورة شندي اتأجلت غصبا عن عين الارباب *وتاجيل كورة شندي يعني بداية الموسم باللف والدوران *هارد لاند ليه *المك لاند افيد في الاعداد *الخايفين منو ده افيد ليكم في الاعداد *لذا ولذلك *حقوا ناسنا من اسي يلفتوا نظر الاتحاد *اي تأجيل لمباراة شندي بداعي الاعداد *دوري فرتك يا فرده *نختها بالواضح *مادايرين اي دوري في حالة تأجيل لقاء شندي *وعلي الاتحاد ان لا يوافق علي طلب الهلال باحضار هارد لاند الا بشرط *شرط عدم تاجيل كورة شندي *والشرط يكون مكتوب *الجماعه ديل بقوموا فوق *بقولوا ما قلنا *متين قلنا *بنطوا *ومع فطومه نهي اتفاق كهيه *حاتنط وتقول *مني دي ؟؟؟ *انا دي ؟؟؟ *انا اقول كورة شندي ملتزمين نلعبها ؟؟؟ *مالي جنيت ؟؟؟ *منو دي ؟ *انا دي ؟؟ *بري بري بري *بتنط فطومه اختي *ايها الناس *الاهله لقوا الدوله عينها حمراء في ما يخص مباراة الاستقلال *قالوا نقبل علي الاتحاد الموية عينو زرقاء *لكن تأجيل *العبوا الدوري براكم مع هلال الفاشر وهلال كادوقلي *نحنا بنمشي الدوري الالماني *هو الدوري الالماني شنو *موش ياهو بايرن ميونخ وشالكا وديل *لعبنا معاهم وبنعرفهم وبعرفونا *ايها الناس *لو قصة هارد لاند طرشقت عندهم سبب تاني للانسحاب من شندي والتاجيل *حاينقوا في التلفزه *الاتحاد يتفق مع قون يقولوا ما دايرين قون *الاتحاد يتفق مع الشروق يقولوا حقت الوالي *الاتحاد يتفق مع النيلين يقولوا ما دايرين مادايرين *الاتحاد يتفق مع اي قناة يقوموا فوق *يعني ننقلها ليكم بي درداقه ؟؟؟ *جنس جرسه *اي هلالابي تلقاهو برجفف اليومين دي *ما برجف من البرد *برجف من شندي *دخلوها وصقيره حام *اركزوا فطومه وراكم *لكن وقت الجري تلقوها قدامكم *المهم *استقبال الهلال زي استقبال مصلحه موظفنها مافيشين *وموظف الاستقبال نايم *زريبه ساااااي *استقبال لي شنو عاد بس ؟؟؟ *وبمناسبة استقبال الهلال دي *عباس خوجلي المحامي المريخابي *قابلني وقال لي ضحكت شديد في طاخ طيخ طوخ بتاعت استقبال الهلال *وقال لي استقبالهم ده ذكرني نكته *تقول النكته *ابكر اغترب بعد سنين من الضنك المستفز للمشاعر *وحشتو حبصه *وهو زاتو ماهين *وحش حبصه شديد *كلو يوم يمشي جده يدي اي زول راجع السودان جواب لي حفصه *وحفصه تقرأ وتشتعل شوق وود وحنين ومحنه لرفيق المحنه ابكر *كان يلفت نظرها دائما في خطابات ابكر *انو ببداها بي آه آه آه *-وبختمها بي آه آه آه *بس ابكر قادي عربي *ما كان بمد الالف *يوم حفصه لقت زول ماشي السعوديه *ادتو جواب لي ابكر *قالت ليهو ابكر الشوق دفرنا قربنا نقع في واطات الله والرسول دي *لكن الامل في نتلاقي يا ابكر هو البسندنا وبصبرنا *جواباتك وصلتي كلها يا ابكر *بس الماعرفتو انت واحد وخمسين واحد خمسين الفي البدايه والنهايه دي شنو يا ابكر ؟؟؟؟ *اقول ليك انا يا حبصه *ابكر خليهو *واحد وخمسين دي بتاعت كردنه *خلي الخمسه وعشرين *امس قال واحد وخمسين مليار حايدفعها للجوهره الزرقاء *اخير واحد وخمسين ابكر يا كردنه من واحد وخمسينك *غايتو لو عندك الواحد وخمسين يا كردنه *انزل طوالي *التربيزه دي فيها حرفا شديد *مقددنها *ناس الارباب ديل بقبضوك فوق *خمسين بتلاته كروت والجوكر بايظ تلاته كروت كده سته *وهبابه تبقي عشرين *ماخد من المريخ تلاته بي تلاته كده تلاتة وعشرين *خسرت المدينه بي خمسه كروت بقت تمنيه وعشرين *وجايب ليك تلاته مواسير بي تلاته *كده واحد وتلتين *كده حرقت عديييييييييييييل يا كردنه *كان عندك الواحد وخمسين انزل يا اخوي *طه قافل والارباب قافل *وفيهم واحد جوكرين في كرت *الا تطير يا كردنه *ايها الناس *ان تنصروا الله ينصركم *اها *نجي لي شمارات والي الخرتوم *قلنا يا والينا *السنه دي يمكن تحنوا علينا *اتاريكم يا والينا *ناونها من اولها علينا !!! *فاكين الضرايب تضرب فينا *تشيل هي السمينه *وحبة فتات تخليهو لينا *ربط شنو كمان الفاكنوا فينا *والينا *راجعوا القصه العلينا *عشان ما تندموا و عشان ما نندم وعشان ما تندموا علينا سلك كهربا ننساك كيف وفي التاريخ كل الممالك السقطت اسباب سقوطها كانت الضرائب الباهظه وتفشي الفساد والرشوه والمحسوبيه وانفراد الطبقه الحاكمه برااااااها بخيرات البلاد الكلمه ومعناها *ممالك: حكومات *الطبقه الحاكمه : الحزب الحاكم والي لقاء سلك
