بسم الله الرحمن الرحيم الهكرز • طبعا الهكرز بخترقوا مواقع الناس ويهكروها • يبشتنوها بشتنه • وكلمة هكر كلمه قدييييمه عندنا بنقول فيها قبل ظهور الشبكه العنكبوتيه • تلقي الزول العجز ونظروا ضعف وسماعات اضنينو بقت ما بتجمع يقولوا ليك فلان ده هكر • العربيه القديمه بقولوا عليها هكره • وناس دلالات العربات بسموا العربات التعبانه الهكر , وبرضوا بقولوا عليها صارقيله , يعني طعم ( بضم الطاء ), يقايضوا بيها عربيه سمحه كون سيدها مفلس ومحتاج لقروش بسرعه , وسيدها بسموهوا الرهينه , المهم في الآخر الرهينه بشيل هكره ومجبور الرهينه علي قبول التهكير • اسي بعد ظهور الشبكه العنكبوتيه انتشر مصطلح الهكر , وكل يوم يخترقوا موقع يهكروهوا , طفل قبل كده اخترق موقع عسكري امريكي ضخم وهكروا • المهم مقبوله حكاية تهكير المواقع داخل الشبكه العنكبوتيه لان السريه فيها عباره عن كلمة سر ومدخل • لكن الهكرز الايام دي دخلوا حياتنا وهكروها • قرارت لاندري كيف ومتي ومن اين ولماذا • السكر يزيد بقرار • من اصدر القرار ؟ لاالحكومه عارفه ولا الشعب عارف • تعفي رسوم جمارك لبن البدره بقرار من وزارة التجاره , ويعلن القرار في الصحف • السيد وزير التجاره لم يصدر القرار • وماعارف منو الاصدر القرار • لا الشعب عارف ولا التجار • نتجادل بكره اجازه ولا ما اجازه ؟ • لا الحكومه عارفه ولا المواطن عارف ولا الوطن • فقط الهكرز • وكثير من القرارات لا ندري من اين تصدر ولكن الهكرز يدرون • هكرتووووووووووووونا يا هكرز • كفااااايه • شوفوا ليكم محل تاني وموقع مناسب • موقع دبليو دبليو دبليو مواطن سودان دوت كوم ده طلعتوا عينوا • شكيتكم علي الله يا هكرز • مافي رهينه غيرنا ؟ سلكتد يا مهكرني طول اليوم اريتك بالفايروس الاقفل ملفاتك والي لقاء