بسم الله الرحمن الرحيم في السلك • الساده اعضاء مجلس ادارة المريخ المحترمين • نحنا ما افهم منكم • ولا اعرف منكم • ولا مريخاب اكتر منكم • لكن اظن مشاغلكم الكتيره نستكم اشياء كتيره • دايرين نذكركم بس • تتذكروا لما اتمرمطنا بانفرادات من دائرة السنتر امام كانو بلايزر(الهدف التالت ) وامام زيسكو (الهدفين الاول والتاني ) وامام ناس كتار • سبب تلك الانفرادات كان غياب بله جابر • لانو بله سريع وكان ( بشيل ) خلف الدفاع • وعندما افتقدناهو للاصابه قتلنا في نص النهر • لو متذكرين لا والف لا لاعارة بله • نعود للباشا • الموسم الماضي لعب واجاد في وظائف كثيره وتنقل بين الطرف الايمن والمساك وآخر مدافع • كان جوكرا • ليه دايرننا الموسم المقبل نلعب بدون جوكر ؟ • يعني نتقبض هبابه ؟ اربعطاشر فوق ؟ ونحرق • انا مع الاحتراف الخارجي لاي لاعب سوداني • لان ذلك يفتح الباب لغيره من اللاعبين ويدخلنا في هيصة الدول المنتجه للخامات ويلفت نظر العالم الينا • وطبعا يستفيد اللاعب من الاحتراف غير الفائده الماديه فائده فنيه كبيره • ولكن • ماذا سيستفيد بله والباشا من النصر الليبي • فريق لايشارك دوليا • ولا ينافس داخليا • ولا حول له • لاتقتلونا وتقتلوا الطموح فينا ياناس • راجعوا الفكره • نحن ياوالي نسعي لتحقيق جويه جديده في الموسم المقبل • وفي طريقنا للمجموعات الترجي التونسي • واذا تمت الاعاره سنفقد بله والباشا لمدة سته اشهر ونفقد المجموعات • عشان كده لو مصرين علي الاعاره خلوها سنه • شهر سته يجونا لشنو ونحنا بنكون في الحتانه • قابلت لي زولا فنجري لابس عمه توتل جديييده وجلابيه بيضاء مكويه وراكب برادو • مامتأكد منو لكن يشبه لي عمك محجوب • بكون ياربي ! • تستاهل ياعم محجوب يافنجري • من زماااان مضيع نفسك سااااي • انا مصر جدا علي نجاح عبدو امبده وحمد الشجره • والايام بيننا • برنس عطبره الاصلي يا الناس البتسجلوا • الجماعه قالوا عندهم مفاجأه • سجلوا قلق • ضحكت • كايسين القلق مالكم ماكفاكم القلق العملوا ليكم الفسخ • كان فسخ عزو عمك محجوب البلزو ما يهزو • ابشر يا الجموعي • كاربوني قال اعيروا بله والباشا ؟ • كان قال يستحق الاعاره كاربوني شخصيا • لما يلعب بنغني بله يا بله • ولما يغيب ويتفردوا بينا الناس نغني وينو بله • لو اعرتوهو من اسي بنغني بره يابره • اخوتي اعضاء المجلس • ناس الشطب ظاهرين • كرموهم لما بذلوهو • وجددوا الدماء في خطوه شجاعه تجنوا ثمارها احترامنا وبطوله جويه تزين مجهوداتكم الكبيره • قال يسجلوا قلق • تسجلوا قلق في شريط كاسيت ! • امشوا لتمساح في فوراسكوفون ينسخ ليكم نسخه • بمناسبة نسخه دي • الجماعه حقو نستنسخ ليهم من كاس مانديلا في كاس الممتاز • يمكن يجيبوا جويه • لكن الخوف مانديلا يجيب الممتاز ويجينا • قالوا كاس السودان الحر فسخو • اسي الجاب سيرة الفسخ شنو • يا عزو الجماعه يا اكشكشوا يا اكشكشوا ( اكشكشوا الاولي من الكشكوش والتانيه حمانا الله ) • قول يا عزو شالوا مرابحات واعادوا تسجيلك , تتمرن وين ؟ • سمعنا تحت تحت قالوا المعز زاتو جاتو حساسيه ومابستحمل الكسبره والعطرون وريحة التراب • كلتشي رسل جواب لعزو قال ليهو عازوزي فاسوخي لاحوقي آنوني في الجانوني مانوني زاوغي مانوني قاوني داخولي جانوني • يعني ياعزو افسخ والحقني انا في الجنه منها تزوغ من اقواني ومنها تدخل الجنه سلك كهربا الرجوع للصواب لايقوم به الا العقلاء الشجعان والي لقاء
