[email protected] سلام يا الحبان في كل مكان عودتنا حكومتنا صاحبة الأفكار الجهنمية والخطط البهلوانية والتدابير الشيطانية عودتنا على البدع ( بكسر الباء ) والمحن والهجائم والرجائم البقت فوق للتصور والتفكير والخيال ,,, يعني زمان في طفولتنا كنا بنقرأ للمغامرين الخمسة وقصصهم وخيالهم الخصب ,, وغيرهم من القصص الخيالية للتسلية ,, ده غير حبوباتنا كانوا بحجونا بي حجاوي من اسماء غريبة زي ( السعلوة و الغول اب نومة سنة ,) وغيرها من حكاوي نسرح معاها بخيالنا الصغير لعوالم تانية ,, تبدع الحبوبة في سردها بتشويق يجعلنا نغرق في نومة عميقة ونسرح سابع حلم بعد اول حجوة , مايصحينا إلا صياح ديك الصباح ونكتشف إنه الحجا الأمس بالليل كان مجرد حكاوي وقصص خرافية ممتعة ليس إلا ,, لكن حالنا هنا بختلف تماما ,, يجب علينا ان نصحا كل يوم من نومنا الحقيقي ونتوقع لينا هجيمة جديدة حقيقية , اصبح الوضع اكتر خطورة وواقع مرير يجب عليك وغصبا عنك ان تتقبلو وتتجرع مرو ولا على كيفك وكراعك في رقبتك ,,ولا تلحس كوعك !!! اصبحنا كل يوم نجد الأدهى والأمر من عجائب الإنقاذ الأكتر من 7 ملايين و التي لا حصر لها و الأبدعوا في تصويرها قرأت مساء امس في موقع سودانيز خبر تحفة عن إحدى عجائب الإنقاذ ودواهيهم , جزاهم الله ألف خير دايرين يعملوا كورسات تدريبية لحجاج بيت الله الحرام ,, وتجلوا في الفكرة الخطيرة ,, واحد منهم قلب الهوبة عشرومية مرة وطلع لينا بي فكرة بناء مجسم للكعبة المشرفة في الساحة الخضراء , والمجسم كلف مية مليون ,, المليون ينطح المليون !!! وإليكم الخبر كما هو والشكر مقرون للزميلة إزابيلا لنقله للقاريء المغلوب على امره ( اقامت وزارة التوجية والاوقاف والهيئة العامة للحج والعمرة ولاية الخرطوم مجسماً لبيت الله الحرام بقيمة 100 الف جنيه على الجزء الشرقي من الساحة الخضراء بغرض تدريب الحجاج على كيفية اداء مناسك الحج، وكشفت ان عدد حجاج الولاية بلغ 9522 حاجاً، وحذر وزير التوجيه والاوقاف عثمان الكباشي أمس، من وصفهم ب»المتنطعين وانصاف المتفقهين « من استصدار الفتاوي المضللة للحجيج ،ودعا امراء الافواج لجلب الحجاج الى المجسم للتعرف على كيفية اداء المناسك . من جانبه، اكد مدير هيئة الحج والعمرة ولاية الخرطوم، الدكتور علي شمس العلا ،ان الهيئة اقامت المجسم بتكلفة 100 الف جنيه الغرض منه تعريف الحجاح على كيفية اداء مناسك الحج لادائها بصورة صحيحة) عليكم الله ما بتوافقوني الرأي على عقول البشر دي وتفكيرهم الخطير في طريقة السلب والنهب وبعرفوا كويس جدا كيف تسرق اموال الغلابة والمهمشين ؟؟ يعني يا وزير التوجية والأوقاف ,, زمااااااااااااااااان اهلنا الحجوا على مرور السنين المضت , ولدوهم من بطون امهاتهم متدربين على الطواف ؟؟ بعدين ما قلت لينا السعي والمروة حا تعملوه وين ؟ وجبل عرفات يا ربي بتودوا الناس وين . جبال الفاو ولا جبل مرة ؟ مخير الله لقيت نفس الخبر في صفحات الفيس بوك , اكثر ما اضحكني هذا التعليق (وانتا قايلهم عملو المجسم من الأول ليه؟ بكرة صيانة، وبعدو توسعة، وقبر الرسول، وجبل حراء، وغار ثور، والصفا والمروة، ومجسم لكنيسة المهد للإخوة المسيحين عشان ما يحسوا بالاضطهاد ... ياخ دي عالم مبدعة الله لا يحرمنا منهم ) صدقت والله يا صاحب التعليق اعلاه ,فعلا عالم مبدعة جدا جدا ,, بدعتوا معانا واتفننتوا في عذابنا عمليتكم دي فضيحة عظمى ليكم في المجتمع الإسلامي يا مدعي الفضيلة والإسلام,, الشعب السوداني من اكتر الشعوب بتعرف تأدي شعائرها بدون إهانة منكم . في زول جاء إشتكى ليكم بقلة خبرته ومعرفته؟؟ دي إهانة واضحة وصريحة لي أي سوداني مسلم ,, بي إنه يجهل تماما حتى الطواف في بيت الله!! إنتو لو فعلا دايرين تساعدوا الحجاج وتحلوا مشاكلهم ' ما تسرقوا حقهم وتشيلوا قروشهم في البلد وتبهدلوهم في بلد الله ,, الحاج بعاني ما يعاني من مطار الخرطوم وميناء بورتسودان , إلا ان يرجع بلده , كل المناسك خلق الله في البلدان التانية بتأديها بي راحة نفسية وبدنية وبعثات حجهم وسفاراتهم بتريحهم على الآخر,, نحن اهلنا مساكين مغلوبين على امرهم , تذلوهم وتعذبوهم وتبهدلوهم بي حقهم , حجاج طاعنين في السن , لا بتأخذكم بيهم رحمة ولا رأفة ماكلين حقهم عينك يا تاجر ,, ده غير التزوير والرشاوي في إجرآءات الحج والعمرة المصائبها يشيب لها الولدان في المهد ... قلوبكم المحجرة دي ما خايفين من تضرع المساكين المظلومين ديل في بيت الله ربنا ينتقهم منكم !!! حسبي الله ونعم الوكيل عليكم جميعا ,, متاوقة ... نصيحة لي وجه الله تعالى غايتو لو دايرين تعملوا الصفاء والمروة , اعملوها لينا في شرق الله البارد ,شفتو حواشات القصب في الجنيد واسعااااات و ماهلااااااااات تعالوا جكوا لينا بي هناك , عشان نجككم حفايا وعرايا , والباقي خلوهو في سركم فضحتونا الله يفضحكم بركة جاه النبي يمهل ولا يهمل ودعتكم الله اسماء الجنيد نشر بتاريخ 28-09-2011
