[email protected] وضربونا اولاد الهرمة،،،، دي اول عبارة بكون قالها وزير دفاعنا الخطير بعدما بحلق عويناتو لامن برقن، و فاتح فاهو تجاه الصقيعة . وتم الباقي جكة لامن وصل رفاقتو, والخوف معبيهو من راسو لي كرعينو ويكورك الرد.. الرد يا صهاينة الرد، ليكم يوم يا اولاد الهرمة هيع,, نحن السوس والوسواس ونحن نخرنا عضم الناس نحن هوراطين وجعجاعين ونحن لي شعبنا مجوعين كع,, نحن بنهدي للغريب خرفان وسيد البلد نرقدو جيعان,, نحن سرقنا البلد بالإلوف و وقت الحارة بنجري صوووف ' هيع نحن في بيوتنا نايمين ومكوعين ونصحا نلقى اهلنا مضروبين. نحن ملينا جيوبنا بالمليار ومليارين واهلنا مديونين, نحن اهلنا بنقتلهم بالملايين وعدونا بنسكت ليه وكمان راكعين,, يشمر جلابيتو ويجري على رئيسو , مهجومين ومخلوعين من الضربة الجاتهم ورا بيوتهم وهم في غيهم يعمهون, كل حصيدتهم في الجكة دي خوف ورعب وزعزعة والحال لسه مايل وحا يفضل إلا ان يحلو عن سمانا هؤلاء الأوباش... بستغرب في بعض الناس يقولوا ليك ويييين وزير الدفاع؟ ووين وزارة الداخلية ووين منو داك ما عارف؟؟؟ كيف يا جماعة وين ؟ هم اصلا كانو موجودين ؟ حصل سمعتوا صدوا ليهم اي هجمة ولا اي مصيبة جات على البلد ده؟؟ عندهم شنو غير التصريحات الكلها هرجلة ورجالة بالحلقوم وجعجعة في الهواء ؟ كلامهم كلو زي زبد التور الهائج في السلخانة , يهيج ويهيج وفي الآخر مضبوح وما يقدر يفرفر.. هل كانوا حاضرين ولا ليهم وجود في ضربة امدرمان؟ ولا ضربة مصنع الشفاء ولا ضربات بورتسودان ولا غيرها وغيرها ؟؟ ما كل المصائب دي بتجي وهم لافين صينية لا عارفين رأسهم من رجليهم ولا كوعهم من بوعهم, لكن عارفين يقولوا للناس الحسو كوعكم!!وعارفين يتعنجهوا في الفاضي وشتتوا في كضبهم داخل وخارج البلد!!! الجماعة ديل ما ناس حماية بلد ولا حماية دين ولا حماية روحهم زاتها, ديل تخصصهم ضربة اولاد البلد, وفلاحتهم في قتل وسحل وتدمير مصالح البلد, وسرقة قوت الشعب. مهمتهم الشعب يجوع ويمرض ويلف بي البلود يفتش رزقه ويفتش ليه على مأوى . وبعد كده ما مريحين حتى الطفشوا وهجوا من البلد.!!! مشاركين الخلوق في عيشتها شيء جبايات وشيء زكاة مغترب وشيء ضرائب !!! ده غير رسوم المطار البلهفوا فيها مطبوقة وبتمشي وين الله أعلم !!! حتى الطائرات اصبح الجراد الواحد ده جنحينو امتن منها كل يوم نسمع في حوادث الطائرات السودانية الأصبحت حوادثها اكتر من حوادث الركشات المالية البلد!! وقاطعين ليهم تجار دين من نافوخهم يسنوا ليهم قوانين تحلل ليهم الحرام البعجبهم على هواهم ويحرموا ما يحل لشعبهم الغلبان.. كل يوم أسوأ من القبلو ولا حياة لمن تنادي , شعب صامت خانع ويمارس احيانا الدهشة الغريبة!! كل العالم مستغرب كيف مكث هؤلاء القوم الفاسد في سدة الحكم كل هذه السنين؟؟؟ حسبي الله ونعم الوكيل عليهم أجمعين .في يوم عرفة هذا اليوم المبارك نسأله تعالى ان ينتقم منهم شر إنتقام بركة عزيز مقتدر ويخلص حق كل المطحونيين والمظلومين , اللهم آمين يا رب العالمين,, الرحمة الواسعة للشهداء والصبر وحسن العزاء لذويهم في فقدهم الجلل ولا حولة ولا قوة إلا بالله العلي العظيم متاوقة إنتو فاكرين اولاد الهرمة ديل ما بصلوكم في القصر الجمهوري؟؟ ولا حتى في قصوركم في كافوري؟ الخبتة الجاية قطع شك حقتكم براااااكم , ارجوا الراجياكم,, يمهل ولا يهمل
