فلاشات: وجدان طلحة مثير للجدل...صفة اقل مايمكن ان نطلقها على ذلك الرجل الذى احتل الصحف ووسائل الاعلام المختلفة بتصريحاته النارية وتعليقاته غير المعهودة، بجانب تفجيره لعدد من القضايا التى يرى البعض بأنها خارجة عن المألوف، وبالرغم من هذا لايزال العضو البرلماني (دفع الله حسب الرسول) يمارس إطلاق المزيد من القضايا التى يرى بحسب وجهة نظره انها (هامة جداً) ويتعامل معها بإعتبار أن (الساكت عن الحق شيطان اخرس)... فلاشات جلست معه وقلبت معه عددا من الاوراق.. وحاصرته بالكثير من الاتهامات حول نشاطه والقضايا التى ظل يثيرها متى ماسنحت له الفرصة...فماذا قال...؟؟ بداية حدثنا عن حكايتك مع (الكوندوم)..؟ وإثارة الجدل التى صاحبت تصريحاتك بخصوص هذا الموضوع..؟ الكوندوم ما سياسة وزارة توزعه على (الدايروا والمادايرو) , لان هذه المسألة تشجع الناس الذين لا يخطر ببالهم الزنا , لكن هل هم جادين فى هذا الكلام ؟ الله اعلم..!! اصابتك (حردة) في برنامج حتى تكتمل الصورة.. واخذت اوراقك وهممت بالمغادرة.. ماهو السبب في ذلك..؟ انا (ماحردت)...انا عندى حاجة وقعت خفت (الهواء يشيلا) فقمت عشان اشيلا شلت حاجتى دخلتها فى الشنطة , لانهم شالوا الشنطة ختوها بعيد، وقالوا لي عشان ما تظهر وفيها المستندات , وقالوا لى (اقعد اقعد), وقلت ليهم: (انا جاى)...بعدين ازعل ليه..؟؟ الناس معاي والشغل فى صالحى , والمشاهدين متفقين معاى.! اذن بماذا تفسر محاولتك إقتلاع المايكروفون..؟ ابداً..انا لما قمتا كان لازم أطلع المايك عشان اقدر اقيف. شيخ دفع الله يتناول موضوعات يرى من وجهة نظره انها تمس المجتمع, لكن الناس يرون ان هناك قضايا أخرى مهمة..لماذا لم تتطرق لمثل تلك القضايا..؟ الكلام دا يعتبر من (تلبيس ابليس) , انت قدامك قضية معينه للنقاش وقضية حساسة يعني (تشرد) منها.. ولا توضح رايك فيها ؟ والشخص فى طريقة الى الله تعالى يزيل أي خطأ صغير او كبير يعترض طريقه. قضايا مثيرة للجدل تبنيتها مثل الكوندوم وحفلة شيرين وغيرها.. لماذا انت دائماً دون سائر اعضاء البرلمان..؟ يوجد برلمانيون غير تناولوا هذه القضايا . مثل من تحديداً..؟ هم كُثر, وما اثيره يجد اجماعا من النواب . حتى قضية شيرين عبدالوهاب..؟ دى تحديداً النواب بالاجماع وافقوا على ما اثرته . الا تتفق معي انه من الغريب ان (رجل دين) مثلك يعرف فنانة مصرية ويثير القضايا حولها..؟ يابتي...انا ماشي فى الخرطوم شايف صورة بنت شكلها (جذاب جداً) موجودة فى اي (كورنه) , مشيت قريت الحاصل...ولقيت انها يوم الجمعة ستُقيم حفلا ساهرا بالخرطوم , طوالي (قلعت) الصورة وجيت دخلت بيها المجلس , وقلت ليهم: (دى حتغنى واولادكم بيموتوا فى هجليج)..؟؟...هسي الكلام دا (بسويهو) زول عندو عقل ..؟ كان دينا ناقص بنتموا (رجالة ساكت) , والنواب اتفهموا المسألة وإتخذوا القرار. انت (قطعت) صورة شيرين فقط، مع العلم ان هنالك صورا أخرى لمطربات سودانيات.. هل توضح لنا ذلك..؟ مافي اي صورة لبنت فى الشارع...القانون واضح بيتم بلاغ فى امن المجتمع ويتم بعده انزالها مباشرة , ونحنا عندنا مشاكل مع ناس الاتصالات لكنها حلت الان, والمشكلة مش صورة شيرين المشكلة انها ستقيم حفلا غنائيا ساهرا وراقصا في نفس اليوم الذى سقطت فيه هجليج. هل حُلت كل المشاكل التى يعاني منها السودان حتى تصبح القضايا المتناولة في البرلمان بهذه الشاكلة..؟ اعبد ربك حتى يأتيك اليقين , لكن يوم بتنتهي فيه المشاكل ما حصل وما حيحصل فى التاريخ . اقصد هل النزاعات انتهت..؟ انشا الله تنتهي. طيب..هنالك اخبار عن زيارة للفنان محمد منير للسودان بعد شهر وسيغني في حلفا..هل ستتصدى له ايضاً..؟ لحدي مايجي ربنا يحيينا...يمكن نموت..! بصراحة...هل لديك رأي فى ختان الاناث..؟ النبي صلى قال الختان سنة للرجال مكرمة للنساء) والائمة الاربعة مجمعين على مشروعية ختان الاناث , ونحن مشكلتنا مع الاممالمتحدة (دايرة توقف اي حاجة)... ودايرة تعمل قانون حتى لو انت اتبعت سنة النبى (ص) يدوك سبعة سنين سجن , نحن الختان الفرعوني ضده تماما , وعقوبتة الدية , وفي إغراءت كثيرة لبعض الناس جاية من الاممالمتحدة فيها دولارات والناس ما قدروا يصمدوا. الشباب يقولون انك (اشتهرت) بعد تناولك لقضية شيرين..؟ هم مبسوطين واللا ما مبسوطين ؟ انا متأكد ان (السفهاء) فيهم كذلك مبسوطين..!! كيف تنظر للشباب..؟ لا ارى فيهم الا كل خير , إستنهضوهم للجهاد ف(بطلوا) الجامعات وفيهم من تخرج وسلم شهاداتهم لاهلهم وهم شهداء فى سبيل الله , الشباب بخير لكن نحن (خايفين من ناس الايدز ديل يقرضوا لينا الشباب بي حاجاتهم البسووا فيها دي , ودى مشكلتنا معاهم). شيخ دفع الله...ماذا تحمل اجندتك البرلمانية غير الختان والعازل الذكري والفنانة شيرين..؟ انا اي حاجة غلط بصلحها وهي كثيرة طبعاً. صور تم التقاطها لنواب البرلمان وهم (نائمون)...وبدل نواب البرلمان قالوا عنهم (نوام البرلمان)..اين كنت..؟ انا كنت (صاحي) , وهم بتمنوا اني اكون نائم عشان يجيبوا صورتى. طيب انت الكنت (صاحي) تعليقك شنو..؟ والله بكونوا تعبانين ومرهقين وفيهم ناس كبار فى السن الواحد بياخد ليهو (دقسة) , لكن المصورين بكاميراتهم ماريحوهم، وكانوا حايمين حوالي.. وانا كنت (بحمر) ليهم عشان دايرني انوم ويقوموا يصوروني. (بتحمر) ليهم عديل كدا ؟ طبعاً... عشان اطيرهم..!!!
