طبعاً كلنا شفنا كورة ألمانياوالبرازيل أو كورة البرازيلوألمانيا أياً كانت التسمية التي يحبها الواحد فينا درس جديد يقدمه كأس العالم لنا السامبا بالسلم السباعي حكاية البرازيل تتغلب تلاتة في كاس العالم كانت من خامس المستحيلات وتحقق سابع المستحيلات طلعت البرازيل خط بارليف ساي قادلة في فارغة ولو الحظ وقف مع المانيا شويه ولو مسعود اوزيل بطل أنانية كان السلم بتاع السامبا بقى سلم تلطاشري درس اليوم يقوم على تلاتة نقاط هامة ما تعتمد علي زول زولين في فريقك القدر ما معروف ينط ليك فيهو كولمبي فاتح خيال وتقعد ساي وغياب الزول بفرعن عليك اوزيل النقطة التانية المهارة براها ما بتأكلك عيش التكتيك والالتزام به والقوة البدنية اهم اسلحة الانتصار النقطة التالتة وانت في الملعب تسد دي بي طينة ودي بي عجينة شغل عديل كده ما بعرف ارض وجمهور وأخيراً لا تحتفل الا وانت على المنصة والكاس بين ايديك وصدقوني المنطق بقول الكأس ألماني لا خوف من ميسي ولا من روبن فالتكتيك يستطيع ان يحبس المهارة عند صاحبها وصدقوني روبن اذا قابل المانيا حايجري في حتتو زي جاري الشحن حته يجري فيها ما بلقاها اولاد هتلر ديل زي خال فاطنة حكر حبس الفجج فجه يجري فيها روبن مافي والارجنتين برضو فريق الرجل الواحد يبقى ما مؤهلة لنيل الكأس أخير منها هولندا بتعتمد على الجماعة زائداً مهارات وسرعة ناسا لذا المنطق بقول الكأس ألماني ولو كان تحكيم النهائي سوداني يخطئ زي ما شايفين ولا يظلم برضو الكأس ألماني أيها الناس لاقاكم ألماني حالق نيمار ؟؟؟ لاقاكم ألماني داقي سيستم ؟ لاقاكم ألماني لابس معولق ؟؟؟ جادين وجايين لي شغل ما شغالين بالشو والحركات والتقليعات بالله عندنا كم لاعب حالق حلاقة قاطعها من راسو ؟؟؟ عندنا كم لاعب مغير مشيتو؟؟؟ عندنا كم لاعب بنطلونو ناصل؟؟؟ طيب عندنا كم لاعب طموحوا يحترف في أعتى الدوريات ؟؟؟ عندنا كم لاعب بتمرن براهو لينمي مهاراته ولياقتو ؟؟؟ يبقى علينا كم سنة عشان نلعب في كأس العالم ؟؟؟؟ أيها الناس الكورة بقت شغل وصناعة واستثمار كبير ونحنا الاستثمار الاجنبي طفشناهو من بلدنا عشان كده كوننا نمشي كأس العالم إلا في الأحلام واطرد الأحلام يا جميل واصحى نومك تقيل يا بلد المهم بكن حسان البرازيل بل ناحن على المدرجات حسرة ثكلن عديل كده ما قلتو .... برازيليات !!! تبكو بس وسالت الدموع اربع اربع زي ما قال نبيل شعيل ووضعت البرازيل يدها على ايادي من سبقوها في الخروج كولمبيا وكوستاريكا وغنت ايدي في ايدك يا حبيبي من الفجر حتى المغيب برغم ان كولومبيا خرجت مرفوعة الرأس وكذا كوستاريكا ومن قبلهم الجزائر القوية وكرواتيا المظلومة في الافتتاح ولكن فضيحة البرازيل بجلاجل لكنها فضيحة سننساها سريعاً لأنو الهلال ماشي الكنغو اها نجي لي شمارات والي الخرتوم كان شفت يا والينا سخنت شديد علينا وكسير التلج في رمضان ده شينة والصيام صعب بالغبينة واتبشتن الحال علينا وكان شفت يا والينا البلد كلها بقت أكل يا والينا سلطة الدكوة شغالة بالنهار فينا ومطاعم غير المسلمين الفاتحنها فينا غير المسلمين ما لاقين حته يقعدوا ياكلوا السمينة المسلمين مالين على غير المسلمين المكان لاهطين الدكوة والسخينة ويمرقوا يقشوا خشومهم وصايمين عاملين لينا سلك كهربا ننساك كيف وتاكل وتقش خشمك عاااااااادي وتحمد ربك كمان والى لقاء
