في المدارس زمان – ضمن مقرر سنة تالتة ابتدائي (والكلام دا قاطعو من رأسي) كان ضمن مقرر اللغة العربية في حاجة اسمها (ادب المراوح). . وقت الدنيا بي خيرها (قبل ما يظهر الجلاكسي واضربني بي مسدسك). . ادب المراوح دا حاجة زي (الادب والمحفوظات) الان. . الله اتذكرت حاجة. . الباب فاتح. . باب شنو؟. . الباب البجيب الريح. . قايلنو شنو انتوا؟. . في ادب المراوح ..كانت هناك (فلسفة) كدا. . في فلسفات ..(قلت ليكم ح احدثكم كتير عن الفلسفة والطحنية). . الليلة ما يوم الطحنية. . الليلة يوم (الفلسفة). . في فلسفة الزول وقت يقوم الصباح من النوم يمشي يقيف قدام الشباك. . ما عارف (الفلسفة) شنو من دي؟. . مرات وقت ما تلقى (الفلسفة) ظاهرة في الموضوع ابحث عن (الطحنية). . في فلسفة ..الزول يكون حايم ...وواضع الموبايل في اضانو ومثبتو بي كتفو. . شفتوا (الحركة) دي. . نحن بنقول عليها (فلسفة). . انا يوم برفق ليكم (فيديو) مع العمود – عشان ما تقعدوا تستغربوا لي. . وعشان ما تقولوا الزول دا بتكلم ساكت. . بجيبها ليكم بالثابتة. . بجيبها ليكم بي (الفيديو) زي هدف صلاح الجزولي ...(موتيبا كيديابا) ، واقف زي الزول الما عندو موضوع. . تقول حارس بتاع اللبن. . انت يا كيديابا نحن الي الان ما قبلنا عليك. . يمين نقبل عليك ...تاني الكنغو من افريقيا الوسطى ما تفرزها. . موتيبا دا بذكرني ليك اغنية قدمها محمد أحمد عوض وكتب كلماتها الفاضل سعيد. . اغنية (ابوي انا ما تقول ليه لا – وافق عليه انا راضيه بيه – عليك الله ما تقول ليه لا). . (موتيبا ما تقول ليه لا). . ما تقول لصلاح الجزولي لا ..(إلّا يقولها ليكم واضحة كدا). . دي ما عاوزة ليها (كرتونة) فهم يا مريخاب. . هسع المريخاب الدخلهم شنو؟. . قالوا ليك طارق عثمان الطاهر (استقال). . هو طارق كان ماسك شنو؟. . وينو البصل وينو الفحم؟ (حاجة امنة اتصبري). . وينو الدقيق وينو العدس؟ (حاجة امنة اتصبري). . يا حاجة ناس الموية جووووك. . في صبر اكتر من البعملوا فيه ناس طارق عثمان دا. . ديل صبروا جنس صبر. . صبروا على ناس موسى الزومة. . انا ما عارف بتجيبوا ليكم صبر من وين للخروج من دور ال (64)؟. . الفريق طارق قالوا قدم استقالتو في قناة قوون. . انت يا طارق شغال في قوون. . بتقدمها في قوون ليه؟. . وإلا دا كمان (استعراض) جديد. . الفريق طارق قال بان العمل بالمريخ اصبح طاردا. . قديمة. . وقال كمان ان الاجواء لم تعد مثالية كما كانت في السابق. . عارفين. . وقال كلام اخطر من كدا قال شنو عليك الله؟. . قال المنظراتية كتروا وخليهم يجوا يمسكوا المريخ). . عارفين المنظراتية ديل منو؟. . ديل ناس عصام الحاج وبلة جابر. . انا قلت بلة جابر. . معليش ..انا غلطان ..الظاهر (بلة جابر) طفر ساكت في السطر الفوق دا. . شيلوا برة. . انا عندي حاجات بكون ما عاوز اقولها بتقوم (تطفر) غصبا عني. . انا هسع عاوز اقول المنظراتية عصام الحاج ونادر مالك..قمت قلت عصام الحاج وبلة جابر. . غايتو بلة جابر دا تعبان معانا. . بلة جابر دا لو شطبوه ..ومشى يلعب في هلال بورتسودان ..نحن إلّا نشجع حي العرب. . عشان نلاحقو ليكم في الساحل. . ما بنسيبو. . لكني بيني وبينكم انا ما غلطان عليه. . بلة جابر ذاتو قاعد ينظر زي عصام الحاج. . عصام الحاج دور ليك مقالات في جمال الوالي – طلع ليك جمال الوالي دا زي صديق علي صالح. . انت يا عصام الحاج وقت بتكتب مقالات (سخنة) كدا ..ما تكتب ليك مقال في (حلايب). . بدل ما تعملها لينا كلها هجوم على جمال الوالي. . اها هسع ناس طارق ديل قالوا عاوزين يقدموا استقالاتهم..وعاوزين يخلوا المريخ للمنظراتية ..نشوفهم بعملوا شنو؟. . المنظراتية بعملوا ليهم (فرن). . احسن استثمار في الدنيا. . الواحد يعمل ليه (فرن) ويقعد يحرس (الرغيف) بالكرسي قدام الفرن. . نحن الهلالاب (الشفوت) القاعدين فوق رأس البيت ...بندعوا المريخاب الي ربط الاحزمة. . بندعوا المريخاب الي ضبط النفس – موش في المناسبات الزي دي بقولوا الكلام دا. . وبندعوهم الي الاستماع الي اغنية عقد الجلاد التى كتبها عبدالوهاب هلاوي (حاجة امنة اتصبري). . اصبر يا طارق. . اصبروا الحركات البتعملوا فيها دي ما صاح. . انستروا. . اثبتوا كدا غلط. . نحن عارفنكم وقت الهلال يتقدم ..ويقدم عروض ساحرة وخلابة ..عارفنكم القعدة بتغلبكم. . دمكم بفور. . واستقالاتكم بتكتر. . يتخابطوا في بعض. . احمد حسام ميدو المدير الفني لفريق الزمالك المصري ..هو ذاتو قال لو الزمالك ما انتصر على الهلال ح يستقيل. . استقيل ساكت يا اخوي. . ابقى متخارج. . فريقك دا ما بنستر قدام الهلال. . نحن جاينكم ناس انتصار ساكت. . ما عندنا ليكم غير انو الهلال ينتصر عليكم. . تعادل ما بنفع معانا. . يا كاريكا ..يا نزار ..لازم تحسموا الزمالك وتنتصروا عليه..عاوزين نشوف (استقالة) ميدو. . كلموه يجهّز البدلة. . بدلة الاستقالة. . ويكتب ليه (تصريح) اخر كدا ..عشان يقولوا بعد الخسارة من الهلال في الفضائيات المصرية. . ولو كمان جهّز ليه (سنتدوتش طعمية) مع الاستقالة يكون ما قصر. . (المصريين) جنهم (طعمية). . نحن نكشف ليكم الموضوع من بدري. . نقدمو ليكم بي (التفاصيل المملة). . الزمالك ح يخسر ان شاءالله من الهلال. . وميدو ح يستقيل. . ومرتضي منصور ح يجيب ليه مدير فني اجنبي. . الحاجات دي كلها نحن عارفنها. . وحافظنها. . في زول ممكن يغالط على (استقالة) احمد حسام ميدو. . عامل (بدلتك) دي. . البدلة مالها كمان؟. . نرجع ليكم لبداية العمود لو بتذكروا ..(تلقاكم نسيتو). . الواحد فيكم انا ما عارف بنسى ليه؟. . فيكم زول بنسى (الفطور). . زمان (الاساتذة) وقت نقول ليهم نسينا (رسوم الحصة) بقولوا ليك فيكم واحد بنسى (الفطور). . ما عارف علاقة (الرسوم) بالفطور شنو؟. . جنكم (رسوم). . في بداية العمود قلت ليكم زمان كان بدرسونا (ادب المراوح). . قمت خشيت ليكم في (الفلسفة) قام الموضوع راح علي. . في ناس بشغلوا (المروحة) في تلاتة – دا نظام براهو. . دي (فلسفة) عديل كدا. . الناس البشغلوا المروحة في تلاتة بكون عندهم رأي واضح وصريح في شوربة العدس. . ما عاوز اقول ليكم حاجة تانية. . وفي ناس مع (المروحة) بفتحو (الشباك) عشان يكون في تداخل بين هواء المروحة مع هواء الشباك. . اها دا (ادب) مختلف في ادب المراوح. . وفي ناس (المروحة) بفتحوها مع (المسجل). . الواحد يشغل حمد الريح ..ويدور المروحة. . انت تعال هنا (المراوح) دي شنو المساكها لينا الايامات دي؟. . يكون عندك قصد تاني. . والله ما عندي اي قصد – ما تقعدوا تشرعوا لي من رأسكم. . اصلو (المراوح) دي ما بتجيبها ساكت. . فكيت (الروس) وقبلت على (المراوح). . الشيء المدهش في الحتة دي..مرة مشيت لي ناس في السخانة دي. . قمت قلت ليهم شغلوا (المروحة). . واحد من الجماعة قام فتح المروحة..المروحة ما اشتغلت. . قلت ليه مفتاح المروحة دي (حالج) وإلّا شنو؟...انت ما شغلت المروحة. . قال لي شغلتها ودي اعلى حاجة في المروحة. . قلت ليه : لكن هي ما شغالة. . قال لي : عارف ..اعلى من كدا ما بتشتغل. . قلت ليه خلاص (ارخي) المروحة شوية...وكت دي اعلى حاجة فيها. . وطلعت قعدت برة. . عاوزني اقول ليكم شنو تاني؟. . ما بقول ليكم. . افهموها براكم. . تموها (موية فول). . اقول ليكم حاجة تختصر ليكم العمود دا كلو. . حاجة بتريحكم في عضمكم. . في الفشفاش. . عندنا زول (شليق) زي مفتاح انبوبة البوتجاز..طقتو كهربة خلتو ليك متل (علبة الالوان). . شلناه وجري على الحوادث. . الدكتور قال لينا : الزول دا مالو؟. . قلنا ليه : (طقتو كهربة). . قال لينا : دي ما ضربة كهربة. . قلنا ليه : طيب شنو؟. . قال لينا: دي (الاسعار). . سكتنا ما قلنا ليه حاجة ..وطعلنا على كدا. . الاسعار بتعملها. . ملحوظة : يا طارق استقالتك ما بتفيدك ، العملتو كان بي ايدك. هوامش . في رعاية الله وحفظه يغادر الهلال اليوم الخرطوم في طريقه الي القاهرة من اجل مباراة الزمالك المصري. . نسأل الله لهم التوفيق والسفر من القاهرة الى الكنغو بالنقاط الثلاثة. . فريق الزمالك ..كما اشار الاخ خالد الوزير هو اضعف فرق المجموعة. . والانتصار على الزمالك في القاهرة ..يمكن ان يحسم امر تأهل الهلال من مرحلة المجموعات. . اذا كان الهلال يبحث عن (الصدارة) لا بد له من الانتصار على الزمالك في القاهرة. . صدقوني ما في اسهل من الزمالك. . ذلك ليس تقليل من الزمالك ..ولكن ايمان بقدرات لاعبي الهلال وامكانية الفوز على الزمالك في القاهرة. . تذكروا ان الزمالك يلعب بدون جمهور. . ولو لعب بحضور (5) الاف مشجع برضو ما فارقة كتير. . كما ان الهلال سوف يلعب امام الزمالك في ارضية جيدة. . وهذه عوامل كلها تؤكد انتصار الهلال ان شاءالله. . اهم من كل ذلك ..ان الانتصار على الزمالك في القاهرة ..سوف يجعل مباراة الهلال الاخيرة في الخرطوم بالنسبة للزمالك (اداء واجب). . سوف يكون الزمالك ان شاءالله فقد فرصة التأهل للمجموعات. . وهذا سوف يجعله يلعب امام الهلال في الخرطوم بدون دوافع. . لذا نقول لا بد من الانتصار على الزمالك في المريخ. . مباراة الهلال امام الزمالك في القاهرة اسهل من مباراة الهلال مع الزمالك في الخرطوم. . لا بد من الانتصار. . تعادل ما بنفع معانا. . لاعبو الهلال يجب ان يكونوا عارفين هم عاوزين شنو في مباراة السبت القادم. . نسأل الله التوفيق والانتصار لهلال السودان. . فرق البطولات لا تخسر. . اذا اراد الهلال ان يفوز ببطولة عليه ألا يخسر خارج ارضه. . وهذا امر مفروغ منه. . خسر الترجي في ارضه امام وفاق سطيف. . واسهل من ذلك ان يخسر الزمالك امام الهلال في القاهرة. . الانتصار – الانتصار – الانتصار. . ونحن نثق في ذلك تماما. . عاوز تقول شنو تاني؟. . ما عاوز اقول حاجة. . .... . عاجل : قالوا ليك الواحد لو (اتسمم) يضرب تلاتة تسعات ..اقصد تلاتة برتقالات. وإن طال السفر - محمد عبد الماجد صحيفة قوون
