(9) (3) (الباشا) مين يا عم – الباشا طلع (بكري المدينة) كورنرو بس ب (21) مليون زول كلف المريخ (3) مليارات جنيه – غير غرامة الفيفا المتوقعة على الاحمر – ما يكون (باشا) الهلالاب (شفوت) – البتلحوه كلو بخارجو ليك من البلد – ولا بتلفتوا في الحاجات الزي دي عارفين مليارات بكري المدينة دي لو فكيناها بتجيب ليها كم (ضفر) – على الاقل (120) ضفر زي (الدو) في بداية اللعب...الكوتشينة دي فيها كم (بلة جابر) – قدر ما نجر يجينا (دو) اول مرة في التاريخ اشوف لي (باشا) بعملوا فيه كدا. ليه انتوا بتستخفوا بي (الباشا) ؟. ما مالي عينكم يعني. بتعملوا كدا ليه ؟– احترام ساكت ما في. ذوق مافي. خلوه الذوق – نحن عارفين ما عندكم ذوق. (شعيرية) ما في. يا زول (الشعيرية) الدخلها هنا شنو؟. البعملوه المريخاب في احمد الباشا – حاجة ما كويسة. دي نحن عندنا في الهلال بنسميها (حقارة) – ولا بنقبل بيها. ولا بنجامل في الحاجات الزي دي – متل الفطور وقت يكون بي (طعمية) ينادوك الف مرة بتعمل فيها ما سامع. عارف (المثل) دا ما حتتو. ولا في مكان للطعمية هنا – مرات بتلخبط – بقوم ادخل ليكم (غلط). دي ما لخبطة – دا قصد عديل كدا. شغل (القصد) ظاهر. الباشا بتاع المريخ – احمد الباشا العديل دا – ليه بعملوا فيه كدا؟. المذلة لزومها شنو؟. وليه في الاساس الباشا بقبل بي كلام بالشكل دا؟. دي (شيخ غفر) ما بقبلها – خليه (الباشا). تلميذ ما بقبل بالكلام دا. بعدين انت يا الباشا – الباشوية حقتك دي (اعدادي). سؤال ساكت. باشويتك دي يا احمد حاصل عليها من (صندوق المعاشات). جايبها من كمينة طوب. حاصل عليها مقابل انبوبة غاز. ليه انت بتقبل في نفسك كدا؟. خلاص الهلالاب عاوزين يقبلوا على أحمد الباشا. عاوزين يستقصدوه. عاوزين يتلحوه. عاوزين يمرقوا للباشا نفسو من الكورة. والباشا اصلا نفسو مارقة من الكورة. المريخ ما واقع ليه. شايفوا كُتر – كُتر. بعاملوه معاملة موش حلوة (على قول المصريين). الهلالاب (شفوت) – البتلحوه كلو بخارجو ليك من البلد – ولا بتلفتوا في الحاجات الزي دي. اتلحوا ليك (باسكال) – طلعوا ليك ما عندو اي علاقة بالكورة. ما ناقش اي شيء. ناس المريخ بي قناعة كدا بقوا يقولوا ليك باسكال دا ما عندو كورة – وباسكال دا بتاع تنظير ساكت. وباسكال دا بخرب اللعب. وباسكال فاكيها في نفسو. الهلالاب طبعا عندهم قدرة عجيبة على الاقناع – يقنعوا ليك الحجر. يقنعوا ليك (القرد). ناس صعبين – وبقعدوا برة البيت. انا قلت (برة البيت) – معليش الجملة دي دخلت ساكت في السطر الفوق – ما عندها اي علاقة بالموضوع. مرات في حاجات بتدخل ساكت. لكن بتكون في الصميم. بتكون في حتتها. عشان ما تفتكروا نحن بنتكلم ساكت. المريخاب اقتنعوا ليك بي وجهة نظر الهلالاب – قاموا انهوا ليك التعاقد مع باسكال. في جن اكتر من كدا. باسكال دا مالو هسع؟. انتوا بتسمعوا كلام الهلالاب ليه؟. زول موقع (4) سنوات في المريخ – فات من الاربعة سنة واحدة – ينهوا ليك التعاقد معاه الآن. دا شنو دا؟. الناس ديل مالهم؟. يكونوا قاصدين بلة جابر...قاموا انهوا التعاقد مع باسكال – اصلهم عندهم جنس اللخبطة دي. يشطبوا ليهم لاعب – ويكونوا قاصدين ليهم لاعب تاني. يسجلوا ليهم لاعب – ويكونوا قاصدين ليهم لاعب آخر. الهلالاب بعد ما اتخارجوا ليك من باسكال – قبلوا على الباشا. الغريبة قاعدين نقول ليهم الكلام دا. الهلالاب قبلوا ليك على احمد الباشا – عاوزين يشوفوا الموضوع دا حاصل فيه شنو؟. بحتوا ليك في موضوع الباشا. بحثوا ليك في مناخرو. صفصفوه ليك حرف – حرف. استلموا الملف – عرفوا ليك اي حاجة. الحاصل شنو؟ ..وليه بحصل كدا – والموضوع وراه منو؟. انتوا قايلين ناس دائرة الكورة بتاعين المريخ ديل ح نخليهم. فاكرين ح نرحمهم. اها جاييكم بكري المدينة – ح يفرتكم عضو – عضو. نحن اصلا كهلالاب كدا – ما عندنا حاجة ساكت. نحن اي حاجة عندنا بي نظام. عاملين لي كدا زي (التلاتة) في اول السطر. تلاتة شنو؟. وسطر شنو؟. انت عاوز تمقلبنا ساكت. نحن الحركات دي بقينا نعرفها. حفظناها حفظ. زي (الدو) في بداية اللعب. الكوتشينة دي فيها كم (بلة جابر) – قدر ما نجر يجينا (دو). بالطريقة دي عمركم ما بتفتحوا. نزول ما بتنزلو. ورقكم كلو بلة جابر. وبكري المدينة. الباشا المسكين – بدون مناسبة كدا الجهاز الفني يقول ليه قوم سخن. يقوم الباشا يسخن . (30) دقيقة قاعد يسخن. اول ما يمشوا على الحكم الرابع – بلقوا ليك اسمو غير موجود في الكشف. في استهبال اكتر من كدا. في استخفاف اكبر من دا. انت ليه يا الباشا بتقبل بالكلام دا. يقولوا ليك تسخن – تسخن تلقى اسمك ما في. ابراهومة بتاع الرديف – جاء المريخ اول امس – اسمو مكتوب. وكمان في التشكيلة. وانت يا الباشا بعد (تسخينتك) دي – اسمك ما مكتوب. مسحوك حتى من الكشف. ناس المريخ اصلا بعملوا في الباشا اكتر من كدا. مرة من غير مناسبة – الباشا دا كان مدور ليك زي الطلقة. قاموا قالوا ليه تمشي (ليبيا). ليبيا يعمل شنو؟. قالوا ليه تمشي (اعارة). اعارة في الثورة دي. الناس ديل عاوزين يكتلوك يا الباشا. في زول بمشي ليبيا في الظروف المشيت فيها ديك. لو ما قنعانين منك – ما بقولوا ليك تمشي. ومباراة القمة الاخيرة بتثبت ذلك. ابراهومة ود اول امبارح يلعب. رمضان عجب رجع من مصر مصاب – ولياقتو غير مكتملة يلعب. وانت يا الباشا اسمك في الكشف مافي. ويا ريت لو الموضوع لو كان مشى كتومي كدا. قالوا ليه قوم سخن. الاستاد دا كلو شافو بيسخن. السودان كلو – شافو في التلفزيون. وبعد التسخينة ديك – قالوا ليه اسمك غير موجود في الكشف. اسمو ما موجود كيف؟. بلعب في الموردة. لا. بلعب في الخرطوم الوطني. لا. طيب ليه اسمو غير موجود في الكشف. عشان الحاجات البعملوها فيك المريخاب يا الباشا – نحن قررنا نسحب منك لقب (الباشا). الباشا بكري المدينة. دا زول قادم من الهلال جديد. يعني الباشوية ماشه معاه. وبكري المدينة جاء للمريخ بامتيازات باشا. زول كلف المريخ (3) مليارات جنيه – غير غرامة الفيفا المتوقعة على الاحمر – ما يكون (باشا). يا الباشا أحمد – الزول دا ما بتنافسو معاه. عارفين مليارات بكري المدينة دي لو فكيناها بتجيب ليها كم (ضفر) – على الاقل (120) ضفر. بكري المدينة – كورنرو ساكت ب (21) مليون جنيه. بلة وموسى وقلق والباشا – اي واحد فيهم اعادوا توقيعو في المريخ ب (100) الف جنيه. وبكري المدينة براهو ب (3) مليارات. الشغل دا ما شغل (باشا). بعدين بكري المدينة قال طالب بتغيير (النجيلة). شكى من النجيلة. وطالب بصيانة المضمار. وطالب كمان يغيروا دائرة الكورة. واحتمال يكون عندو رأي في المجلس. .... ملحوظة : دفعتو ليه (3) مليارات من حقو يعمل فيكم اي شيء. هوامش ناس المريخ مفروض يلعبوا ليهم مباراة ودية سريع كدا. ألحقوا زمنكم. ألعبوا ليكم مباراة قبل ما الفيفا توقف نشاط بكري المدينة. بكري المدينة وجمال الوالي – عقوبتهم مسألة وقت. ناس فريق المهدية ديل مالهم؟. في زول بطلع ليه (بيان) بالشكل دا. اللاعب باختياره مع الهلال – تقولوا الهلال اختطفو. والدليل على ذلك ان اللاعب قابل ادارة المهدية. المهدية تكون عاوزة تودي اللاعب للاهلي شندي. قاموا طلعوا ليهم (بيان). بيان رأسو من قعرو ما معروف. الزول الكتبو دا يا ما عندي علاقة بالكورة. او ما عندو علاقة باللغة. قال شنو؟. قال بيان من نادي المهدية باغلاق باب التفاوض مع الهلال. هو التفاوض لو بغلقوه – بطلعوا ليه (بيان). عالم عاوز تظهر بس. عالم (بيانات). ......... عاجل : بكري المدينة ح يقعد في بيتو بأمر الفيفا. وإن طال السفر - محمد عبد الماجد صحيفة قوون
