وليد طايشين نجم الهلال السابق صاحب الرأس الذهبية في زمن الكورة الجميل واحد من افذاذ المهاجمين الذين مرو علي الهلال من عام 83 حتي الآن وصعد للنجومية من الدرجة الثالثة مع فريق ابو كدوك الى الهلال مباشرة وهو صاحب مهارة عالية ومخترق بارع وله حاسية عالية مع الشباك كان احد الاشاوس الذين قادوا الهلال لنهائي ابطال افريقيا للاندية البطلة 87 امام الاهلي المصري باهدافه الرأسية المتقنة التي اهتزت معها المدرجات واشعلت النيران، يعد من افضل اللاعبين المجيدين للضربات الرأسية امام المرمى ولم تجد الملاعب بمثله على مستوى افريقيا في ذلك الوقت وهو صاحب الرأسية الاشهر في مرمى الاهلي المصري بطل افريقيا ولولا الحكم المغربي الراحل لاراش لنال الهلال الكاس الافريقية، نجم مثقف ،، مهذب ،، لبق ،، مهرضع لابعد الحدود ،، خجول بطبعه ودائم الابتسامة التي لاتفارق شفاهه، ذهبت اليه من غير ميعاد بمنزل الاسرة بحي ابوكدوك بامدرمان بالقرب من شارع الاربعين ولم اجده ثم ذهبت الى المنزل الآخر المجاور للمنزل الاول وعلمت انه يسكن هنا،، طرقت باب المنزل الفخيم ولم اجده، اتصلت عليه هاتفيا وسألته انت وين قال انا في المسجد صليت ولقيت المكيف بارد وهسع راقد مرطب،، قلت له والمسجد دا وين،، قال مسجد النيلين بشارع الموردة ولمن تصل اضرب لي اجيك طالع، وصلت مسجد النيلين وبداخله مجموعة من المصلين متكئين بعد اداء الصلاة وكان من بينهم النجم وليد طايشين، خرج لاستقبالي هاشا باشا مبتسما، والرأس اصبح اصلع *...... قلت له: يدك ساقطة شكلك مقيل هنا. والله انا بطلع من الصباح شغال سايق امجاد لامن يجي زمن الصلاة بجي المسجد دا بصلي ولقيت لي مجموعة اتعرفنا على بعض وبقينا بعد الصلاة نتلو ما تيسر من المصحف ونستمع للحديث في امور الدين والواحد بكون قريب من ربو وبعد داك باخد لي شوية راحة تحت المكيف وبعدين بصلي العصر مرة واحدة وبطلع بشوف لي مشاوير في الشارع لحدي زمن الفطور يقرب برجع البيت، *........ وامجادك موقف وين. البيضا الواقفة هناك نص العربات دي والومين دي شغال فيها شوية صيانة لانو حصل لي بيها حادث مع كريز والسبب انو انا كنت في مشوار في بحري وضرب لي اخوي قال لي امي تعبانة الله يرحما اتوفت ومع التلفون واللخمة جيت داخل الشارع بدون انتبه وحصلت لي ضربة في الرأس لحدي هسع مرات بحس بيها وبي صداع والحمدلله، *....... والامجاد دي شغال بيها من متين. من فترة طويلة بعد وفاة الوالد وهي اصلا حقت الاسرة وانا سايق شغال بيها *........ قبال الامجاد كنت بتشتغل شنو. انا اصلا مدرب ومع التدريب وفي فترات الفراغ بدقش بي الامجاد دي بالاضافة لي كدا عندي مطعم في العرضة بكون متواجد فيهو الامسيات، *........ عشاكم شنو. اي حاجة،، فول وفلافل وفته واي حاجة دايرا في، *........ حكاية النجومية دي ما مؤثرة معاك. بالعكس انا مرتاح وبحب الحاجات الزي دي انو كل يوم اعرف زول جديد واكون وسط الناس العاديين ديل واعيش معاهم همومم وبساطتم وحكاية النجومية دي انا شايلة برا راسي وناسيها دي ايام عشناها واستمتعنا بيها وفترة كان لازم تنتهي وبعد انتهت الزول بكون عندو مسؤوليات عيال ولازم يدخل الحياة العامة ويكون زي الناس العايشة ويمارس حياتو عادي مافي اي مشكلة في الموضوع دا، *....... ماقاعد تلاقيك مواقف. بتحصل انو يركب معاك زول وفجأة يعاين ليك كدا ويقول ليك ازيك ياخ انت وليد طايشين بعد يبدأ يستغرب يقول ليك كيف يعني وليد طايشين سايق امجاد وانت كان مفروض تكون وتكون وبحصل حوار لحدي نصل المشوار وهكذا انا مستمتع وراضي، وانا مما قمت بحب البساطة والحياة مع الناس وتعيش وضعيتك، وكويس انو الواحد عمل ليهو حاجة لقدام وقت اصلا نحن زمان ما قدرنا نعمل حاجة والحياة اتغيرت ولازم تعمل من اجل اولادك، *....... لقيت مجتمع الامجاد كيف. زمان كنت بسمع بالامجاد دي لكن جيت لقيت فيها مجتمع مختلف لقيت ناس كتار تلقى فيهم الاستاذ والموظف وناس زيك كدا كانو ولقيتا حياة جميلة بتعرفك بالناس والعمل عبادة لانو بكون في ناس وراك ودي قسمة كل انسان، *....... عندك عيال. عندي بت في كلية علوم الطيران والتانية في مدرسة ام درمان الثانوية وعندي ولد حالة خاصة السيد طه علي البشير ساهم في سفرو للعلاج بالقاهرة ربنا يزيدو وطلع المرض توحد وتبناهو الاخ صلاح ادريس رجل خير ربنا يدي العافية ونشكرو من علي البعد ولسع مواصل في رعايتو ما وقف اصلا وهسع بقرا في المعهد الخاص بيهم، والمرحوم الطيب عبدالله كان معايش معاي مرض الولد وهو الوصى صلاح ادريس يرعاهو، *....... اسباب دخولك انتخابات الهلال الاخيرة. انا بفتكر انو صلاح ادريس امتداد للراحل الطيب عبدالله لانو راجل عندو عقلية كبيرة في الكورة وهو الرئيس الوحيد الساهم في تطوير الكورة واتاح للسودان فرصة المشاركة باربعة فرق في البطولات الافريقية للاندية من خلال النتايج الحققا الهلال في بطولة الاندية الافريقية في فترتو ولامن عرض علي ادخل معاهو في تنظيمو وافقت ورغم الاخطاء البتكلمو عنها الناس مافي زول مابغلط في العمل العام لكن قدم،، لامن دخلتا الانتخابات كان بهدف خدمة الفريق واللاعبين القدام، ومن هنا انا بهني الكابتن والمدرب الكبير فوزي المرضي بفوزو وهو قادر انو يقدم ويخدم الكيان ونحن بنساعدو وربنا يوفقو، *........ بعد الاعتزال عملت شنو. انا ما اعتزلت بعد الهلال،، رسل لينا اسامة الثغر انا ومجدي كسلا مشينا ليهو في لبنان احترفنا معاهو في فريق برج البراجنا لموسم وانا كان عندي اصابة حرمتني ما اواصل بالصورة المطلوبة ومنها مشيت فريق الساحل لعبتا موسمين، *....... بعد رجعت السودان عملت شنو. بعد رجعت السودان اشتغلت فترة مع شركة حجار في سوق ام درمان وكان الوضع كويس عندي عربية،، قامو ظهرو لي عيسي صباح الخير وسانتو رفاعة قالوا لي نحن ماشين سلطنة عمان عن طريق التاج محجوب لاعب المريخ السابق وسافرنا انا وساتو بس عيسي ما سافر ولعبنا موسم فريق البستان وبعدو جاني قضروف وقفني نهائي من الكورة، *....... بعد السطنة رجعت السودان. رجعت وسكيت التدريب واشتغلت في اشبال الهلال وابوكدوك والعلمين وكان فيهو لاعبين مميزين منهم نصرالدين الشغيل ومدثر ومن العلمين دربت الرابطة ام درمانوالحلفاية وابوسعد ورجعت الحلفاية تاني ومشيت ودهاشم سنار واهلي وادي حلفا لعبنا تأهيلي وتاني جيت راجع الرابطة موسمين، *...... سجلت للهلال متين. في موسم 83/84 من فريق ابو كدوك درجة تالتة وكنا خمسة لاعبين انا وعمر النقي والتجاني ابراهيم مدافع ابوكدوك وماجد مهدي جناح الحرية وسيف العيلفون وكان التسجيل في الوقت في الهلال ما بين 4 الي 5 لاعبين ما زي هسع والخانات كانت محدودة واللاعبين كانوا مميزين وببكرو وبلعبو اكبر وقت من الزمن ووجدنا قدامنا في الهلال طارق احمد ادم ومصطفي النقر واحمد ادم عافية وصلاح ابوروف وجميل وجعفر عبدالرازق، *....... اول مباراة ليك مع الهلال. ضد الاملاك وكانت ودية واول مبارة خارجية ضد المطابع الصومالي في الصومال والمباراة دي عندي فيها ذكري لاتنسي،، جاتني فرصة احرز هدف ونحن محتاجين نفوز ولعبت الكورة بعيد من المرمي وكان وراي سيماوي قام ضربني من الخلف وقال لي مابلعبوها كدا، *......... اجمل هدف احرزته في شباك الاهلي المصري في نهائي افريقيا للاندية بالقاهرة وفي المباراة دي انا كنت لي فترة ما احرزت اهداف وكنت مصر انو اسجل في النهائي واحرزت هدف كان برجح كفة الهلال ونحرز كاس افريقيا لولا الحكم المغربي الذي حرم السودان والهلال من الكاس وانت عارف المصريين ما مكن يفرطو في الكاس جو بلدم، والهدف دا انا بعتز بيهو شديد وكان هدف جواي قبل المباراة حاسي بيهو، *........ اول هلال مريخ تلعبا. عام 84 وانا في فترة كنت مصاب وعملت عملية وموسمين ما كنت بلعب وفي كتير من هلال مريخ ما لعبتها وكان مفروض انشطب لكن المدرب ناقويرا رفض وقال دا لاعب مميز جدا مهما ما كان ووصي انو ما انشطب، *........ افضل حارس مرمى واجهك. حامد بريمة طبعا واحرزت هدفين في شباكو في موسمين ورا بعض مباراة فزنا فيها 2/صفر انا وشمس الدين والمبارة القبليها كانت تعادل 1/ وطرد فيها حمد دفع الله، *....... اقوى مدافع واجهك. كلهم في الزمن داك كانو ماشاالله اقوياء والكورة صبر والواحد كان بصبر وبعرف الوقت المناسب للشباك، *........ صديق من المريخ. عيسي صباح الخير وكنا بنلعب سوا في الثانوي في مدرسة الانجيلية لام درمان واجمل مبارياتي وادائي كان في المرحلة دي كنت بستمتع باللعب والاختراق والضربات الرأسية واحراز الاهداف وكنت بحس انو انا لاعب مميز، وحصلت لي قصة تنبؤ انا حالعب في الهلال ، وكان عندي صديق في المدرسة اسمو مامون من ناس الشيخ حمد النيل عندو كراس في المدرسة خاتي فيهو صور لاعبي الهلال الكبار في الزمن داك وخاتي صورتي معاهم وقال لي انت حتلعب في الهلال مع الناس ديل وبالفعل سجلت في الهلال ودي كان حاجة محيراني، *....... بديت الكورة وين. من فريق الزمالك برابطة ابو كدوك للناشئين وكان فيهو جابر البدري وعماد مبارك ومنو سجلت لابوكدوك درجة تالتة ولعبت ليهو تلاته مواسم وفي الموسم الرابع خططت انو لازم امشي واسجل للهلال، *...... قاعد تقرأ جرايد. لا لانو الاعلام هسع خلي ساي عكس زمان دخلت ناس وظهرت حاجات دخيلة علي الرياضة، الاعلام كان ليهو وضعيتو ومكانتو وكان النقد بناء بدون غرض عشان كدا وقفت منها، *....... قبل الوداع شكرته واخذ عدد صحيفة قوون الذي كان بيدي ودخل المسجد مرة اخري،
