في أخر مقالتين متتاليتين (يمكن الرجوع إليهما) كنت قد وجهت سهام النقد (للإسعاف المركزي) فيما يختص بذلك الإعلان المسجل عند إستقبال (الكول سنتر) لمحادثات المواطنين والذي يخص شركة سوداتل للإتصالات والتي قامت بتشييد (الكول سنتر) وجعل الخدمة مجانية ، وقد كان إستهجاننا لهذا الأمر هو (إنو المسألة ما بتسمح لأنو دي أرواح مواطنين وكده) ، كما كان إنتقادنا (للإسعاف المركزي) هو بطء الخدمة إذ لا يمكن أن تصل سيارة الإسعاف لطالبها في زمن يقارب الساعة وكذلك عدم جاهزية العربة بتوافر الأدوية والأجهزة المنقذة للحياة وكذلك الطاقم الطبي .. في صباح الأمس تلقيت مهاتفة (راقية) من إبننا (خالد) بالإسعاف المركزي (333) يدعوني فيها لزيارتهم ومقابلة السيد المدير وطاقمه الذي يشرف على هذه الخدمة الهامة والوقوف ميدانيا على كل ما يخص هذه المؤسسة . على الرغم من إنشغالي التام عير أنني أكدت للإبن خالد بأنني سوف أسجل لهم زيارة في نهاية اليوم في مبانيهم بمستشفي أحمد قاسم ببحري ، وقد كان حيث وجدت الإبن (خالد) في إنتظاري وفي معيته الإبن الدكتور / حسام (مدير الإسعاف المركزي لولاية الخرطوم ) جلسنا على مكتب المدير .. وكانت الإسئلة والإجابات : س : كدي يا دكتور عرفنا بأنواع الإسعافات الفي البلد دي؟ ج : في خمسة أنواع من الإسعاف : 1- الإسعاف المركزي وهو يتبع لوزارة الصحة بولاية الخرطوم 2- إسعاف يتبع المنظمات (كالهلال الأحمر مثلا) 3- إسعاف يتبع المستشفيات الحكومية 4- إسعاف يتبع المستشفيات الخاصة 5- إسعاف يتبع مواطنين ! س : كم عدد العربات عندكم في الإسعاف المركزي؟ ج : لدينا 45 عربة موزعة على 32 مركز وهي مجهزة تجهيزاً كاملاً بكل الأجهزة والأدوية المنقذة للحياة وإذا كان المريض حالتو حرجة بيطلع مع الإسعاف طبيب وممرض أما إذا كانت حالة باردة (أي مستقرة) فيرافق الإسعاف كادر طبي مدرب ممرض أو تقني تمريض.. س: أجهزة زي شنو؟ ج: فيها 3 أنواع من النقالات لتناسب الحالات المختلفة ، جبائرالكسور، إسطوانتين أوكسجين ، ميزان ضغط وجهاز قياس السكر، جهاز الأزمة الرذاذ، وكل أدوية الطوارئ أما العربات فائقة العناية فيوجد بها علاوة على ما ذكرت جهاز مونتر دقات القلب وجهاز الصدمات الكهربائية للقلب وجهاز تنفس صناعي س: بتشيلو رسوم من المواطنين ؟ ج : الخدمة مجانية تمااماً في كل الحالات ما عدا الحالات الباردة ذي مثلاً مريض عندو مقابلة مع دكتور وعاوز يمشي من بيتو للعيادة .. وحتى هذه الحالات لدينا تعميم إذا كان المريض ما عندو قروش تقدم له الخدمة مجانية . س : ما هو متوسط عدد حالات الإسعاف التي تتم في الشهر؟ ج : حوالى 2000 حاله في الشهر س: نجي لحكاية الإعلان الموجود عند الإتصال ده هل تتفق معى في إنو الحاجة دي ما بتجي كولو كولو ؟ ج : (يصمت برهة) : والله يا أستاذ (الكول سنتر) ده إتبرعت بيهو لينا سوداتل ومن شروطهم طلبو إنو يشيروا لإسمهم .. وهو ما بيستغرق أكثر من ثواني س: لكن إنتا طبيب وبتعرف إنو جزء من الثانية ممكن ينقذ روح مريض ج : ح نتكلم مع المسؤولين في سوداتل ونحاول نعالج المسألة دي س : بطء الخدمة ناتج عن شنو يا دكتور؟ جارنا الذي توفي ونحنا في أم درمان رسلتو لينا عربية من بحري والمسألة إستغرقت قرابة الساعة توفي بعدها المريض في ظرف ساعة ج : كما ذكرت لك يا أستاذ بتكون في عربيتين إلى ثلاثة عربات في أم درمان في المراكز القريبة في حالتكم دي وبيكونو طلعو مهمات إسعافية فبنشوف أقرب حته للمريض. س : طيب وإنشغال الخط عند الإتصال ؟ ج : يا أستاذ إنتا ما ح تصدق لو قلتا ليك إنو بنستقبل مئات المهاتفات يومياً من مواطنين ما متصلين على الإسعاف .. لو ممكن تعال معاي (الكول سنتر) عشان تسمع بي نفسك .. (والبفعل مشينا الكول سنتر .. معظم المحادثات بيفتكرو إنو 333 هي شركة زين .. والبعض التاني عاوز يشاغل – أيوة يشاغل عديييل كده ما الرقم مجاني ) ! س : ح تعملو شنو للناس البتتصل ساي وتشغل الخط دي؟ ج : والله يا أستاذ نحنا محتارين نعمل شنووو لكن ح نتوصل في المشكلة دي لي حل س : آخر سؤال : شنو قصة مواطنين عندهم عربات إسعاف دي؟ ج : ديل مواطنين عندهم حافلات بيفرغوها من الكراسي بتاعتا ويختو فيها نقالة ويعملو ليهم إعلاانات فيها أرقامهم في المستشفيات ويقيفوا قداما .. وطبعا هم ما مرخص ليهم العمل كإسعاف وهنالك خطورة جداً من مسلكهم ده لإنو الإسعاف عندو شروط معينه بموجبها بيعطي ترخيص . عزيزي القارئ .. لقد تعرض هذا اللقاء لكثير من الموضوعات ولكن مساحة الزاوية لا تسمح بنشره كاملا .. التحية للإبن الدكتور/ حسام مدير الإسعاف المركزي بولاية الخرطوم وأركان حربه لتقبلهم نقدنا لهم بصدر رحب شاكرين لهم حسن الإستضافة . كسرة : ناس الإسعاف (الكيري) ديل شوفو ليهم طريقة يا ناس المرور (الفينا مكفينا) !! كسرة ثابتة (قديمة): أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و
