من رأسي : لو كسرت (رقبتك) في البلد دي …بيدفوعك رسوم (كسر رقبة). من كراسي : إذا كنا هامشيين إلى هذا الحد فكريا وسياسيا فكيف نكون جوهريين إبداعيا؟ محمود درويش في قصة (الملنوخيا) الافرجنية – الاسم والقصة قاطعها من رأسي – في زول عندو (كديسة) في البيت. كديسة ما شايفة شغلتها. الكديسة اليوم كلو في (الواتساب). الفئران يخشوا ويطلعوا قدامها – وهي ما شغالة بيهم الشغلة. كأنها في منتجع دريم لاند. تقول كديسة (نباتية). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الزول صاحب الكديسة وقت (الفئران) كتروا عليه – قعد يشكي من (الكديسة). شال حالها. عندو صاحبو بيقعد معاهو قدام البيت..قال ليه والله عندي (كديسة) الفئران يجروا قدامها وينططوا فوق رأسها ما بتشتغل بيهم الشغلة. كديسة مثالية – عندها موقف من (الفئران). صاحبو قال ليه : وقف اللبن. كديستكم دي الظاهر عليها بتشربوها (لبن) كتير. شبعتوها (لبن) – الفئران بتعمل بيهم شنو؟. صاحبكم قال ليه : والله فعلا – في اليوم الكديسة دي بتشرب ليها سبعة ارطال لبن. نحن في اليوم بنشتري لينا تمانية ارطال لبن. رطل للبيت …وسبعة ارطال للكديسة. الكديسة ما عندكم لكن!!. كل البيت في رطل – والكديسة براها في سبعة ارطال. صاحبو قال ليه بتشربوها سبعة ارطال لبن في اليوم ..(هي داخلية طالبات) .. سبعة ارطال لبن وعاوزنها تمارس صلاحياتها في اكل الفئران …والله انتوا فايقين…وقفوا منها اللبن بس – خلوا الكديسة تشوف شغلتها. سبعة ارطال لبن لو انا القدامك دا بلقاها كل يوم بقدم استقالتي من الشغل. طريقتكم دي ذاتها – هي الخربت الخدمة المدنية. هي الوقفت حال البلد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). صاحبكم مشى طبق النظرية …منع (اللبن) من الكديسة. ولا (جغمة). طبعا استعمال مفردة (الجغمة) في رمضان ..شيء مستفز ..وبخلى ليك الزول من صباح الرحمن يعطش. اليوم الاول ما في حاجة. اليوم التاني ما في حاجة. اليوم التالت ما في حاجة. نقطة لبن ما بدوها ليها. اليوم الرابع ..زولكم قاعد مع صاحبو قدام البيت – صاحبو قال ليه ان شاءالله خير – اها (الكديسة) خبرها شنو؟. بتنطط في عيونك – متل الحكم الرابع وقت يرفع الزمن البدل الضائع. صاحبو قال ليه والله (الكديسة) وقفنا منها (اللبن) – بدل ما تقبل على (الفئران) ، قبلت على حاجة تانية. زولكم قال ليه اوعك تقول لي بقت تنتظركم في السحور. صاحبو قال ليه يا ريت. زولكم قال ليه بقت تشرب الشاي سادة. زولكم قال ليه يا ريت. صاحبو قال ليه طيب الحاصل شنو؟…قبلت على المال العام. صاحبو قال ليه ابدا. طيب الحصل شنو؟. زولكم قال ليه تتصور الكديسة بقت تفتح (التلاجة) تحشي ليها (سجوك) وترقد على كدا. والفئران يلعبوا في لعبهم. صاحبو قال ليه – برضو دي خطوة ما كعبة …وقت قبلت على (السجوك)…بتقبل ليكم يوم على (الفئران). الفئران والسجوك ما في فرق كبير بينهم في عرف (الكدايس). بس انتوا لو ساعدتوها شوية ..وبقيتوا تختوا ليها في التلاجة (فئران) جاهزة بدل ما تختوا ليكم (سجوك) …كان بتريحوها. زولكم قال ليه نحن وقت نخت (الفئران) في التلاجة – ما نختهم برة البيت، الكديسة على شنو؟. احسن نجيب ليها (اللبن) بدل اللفة الطويلة دي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس الاهلي شندي – هسع قاعدين يذكروني ليك هذه القصة. الاهلي شندي …امام المريخ بيلعب بدون (فعالية) – نحن ما بنقصد الفعالية الفنية ..وفعالية التكتيك والمهارات والخطة. دي حاجات يمكن ما عندهم ليها قدرة. نحن بنقصد ان الاهلي شندي عندما يلعب امام المريخ ..بكون من غير حماس وبيلعب بروح فاترة حيث يفتقد الروح والحماس. بيلبعوا بروح انهزامية. رغم ان الحماس والروح بتتواجد في (المدرجات) – اذ دائما ما تتوقف المباراة بسبب حماس المدرجات. لكن اللاعبين داخل الملعب تقول بشاركوا في مهرجان للاغاني الشعبية. كأنهم في حدايق الهيلتون. كأنهم في (متحف). يجرجروا في كرعينهم ..ويتونسوا مع لاعبي المريخ ..ولا شغالين بالموضوع الشغلة. زي الزول الماشي (استديو) – وخايف هدومو تتوسخ وتتكرفس على (الصورة). الاهلي شندي عندما لعب في الدورة الاولى امام الهلال في (الجوهرة الزرقاء) – الحماس الذي لعب به لاعبو الاهلي شندي يكفل ليهم بطولة الاندية الافريقية ..ناهيك عن بطولة الممتاز. ضرب ..وكسير ..وكروت ملونة ..وتصريحات قبل وبعد المباراة ، كأنهم في حرب. وامام المريخ نفس (النمور) بتصبح (نعام). لا بهشوا ولا بنشوا. الاهلي شندي ..يعيد لنا تجربة (جزيرة الفيل) و(النيل الحصاحيصا)…محاور المريخ في الدوري الممتاز. الاهلي شندي الآن بقوم بنفس المهمة – وهو سوف يلحق بجزيرة الفيل والنيل الحصاحيصا ان استمر على هذه الطريقة، حتى ولو كان ينافس على المركز الثالث والرابع. هذا الاسلوب الذي يلعب به الاهلي شندي امام المريخ اسلوب (الحنية والرقة) دي ما بتقعّد ليها فريق في الممتاز. اسألوا جزيرة الفيل والنيل الحصاحيصا..اين هما الآن؟. مغادرة نهائية للممتاز رغم الدعم الذي كان تجده تلك الاندية من جمال الوالي والدولة ورجال الاعمال. الروح (الانهزامية) التى يلعب بها فريق (الاهلي شندي) امام المريخ بالطبع ما طالعة من فراغ. الروح الانهزامية طالعة من ان ادارة الاهلي شندي وراعي النادي عندما يلعب الاهلي امام المريخ لا يهتموا به. لا معسكر…ولا مباريات اعدادية ..ولا حتى حوافز ..وتحفيز على الانتصار كما يحدث عندما يواجه الفريق الهلال. ادارة الاهلي شندي اهملت بقصد واضح احضار هداف الدوري الممتاز (كلتشي) الذي غاب عن مباراة فريقه امام المريخ رغم ان جدولة هذه المباراة موضوعة قبل (40) يوم. يعني البرمجة دي ما وضعت (فجأة). حتى اللاعبين الموقوفين في الاهلي شندي …تحس ان ايقافهم هذا كان مرتب له والاهلي يفقد (مزمل مويس) احد افضل لاعبيه امام المريخ. المريخ ..لعب عدد من المباريات الودية قبل لقاء الاهلي شندي ..اخرها كان امام فريق هلال الابيض. ولعب فريق الخرطوم الوطني عدد من المباريات الاعدادية قبل مواجهة الهلال ، اخرها ايضا كان امام (المعد) الاول لكل الاندية التى تواجه الهلال فريق هلال الابيض. فريق اهلي شندي لعب مع منو؟. الناس ديل ما شغالين بالموضوع. مباراة الاهلي شندي والمريخ كانت زي (حفلة التعارف). ما في اي فعالية. وما في اي روح. هل نظر فريق الاهلي شندي لفريق الخرطوم الوطني ..وكيف لعب الفريق امام الهلال. فريق الخرطوم الوطني بنفس الروح التى لعب بها امام المريخ لعب امام الهلال. حتى ان لاعبي الخرطوم الوطني من روحهم الحماسية نال لاعبيه (6) كروت صفر..وارتكبوا ضربة جزاء من الحماس الزايد الذي لعبوا به. لذلك قدم فريق الخرطوم الوطني تجربة حقيقية للهلال …بينما ضلل فريق الاهلي شندي فريق المريخ. انظروا للمريخ كيف سوف يكون امام الهلال. متى سوف ينتصر الاهلي شندي على المريخ اذا لم ينتصر عليه وهو في هذه الحالة. فريق يقوده ابراهيم جعفر والوك ..ومحسن سيد وبرهان ..ينتصر على فريق يقوده ريكاردو. ريكاردو ذاتو المباراة كلها في وادي تاني. ينطط في عيونه – زي الدكان الما فيه (طحنية). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). نمور الاهلي شندي ..مفروض يسحبوا منها (الشنبات). النمور دي طلعت (نعام) ساكت. نمور على الهلال وامام المريخ (نعام). ……….. و الهلال استفاد استفادة كبيرة من مباراة الخرطوم الوطني. بعد مباراة القمة ..واستعدادا للدورة الثانية ..يفترض ان يلعب الهلال مباراة اعدادية امام الخرطوم الوطني. يملك الفريق خامة طيبة من اللاعبين وادارة محترمة وجهاز فني قدير. لذلك الاستفادة سوف تكون كبيرة اذا لعب الفريق امام الخرطوم الوطني قبل انطلاقة مباريات الدورة الثانية. مباراة الهلال امام الخرطوم الوطني اثبت فيها (بلاتشي) انه مدرب كبير. الهلال كسب مدرب عالمي. بصمة بلاتشي واضحة. وقون بشه ح نشوفو يوم 20 يونيو. وحركات سادومبا بتظهر يوم 15 رمضان. الهلال جاهز (موية ونور)…رغم ان البلد كلها لا فيها كهربة ولا فيها موية. الاهلي شندي سوف يفقد فرصته في تمثيل السودان افريقيا ..وهو يفشل في تحقيق فوز على فريق المريخ. الثمن سوف يكون غاليا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. السيدة (ل) – خصخصة (العيون) المتضرر الاول منها (عيونك). وقرّط على كدا.
