] قصة الأسد نالت أكبر مساحات اهتمامات المجتمع في سودان الثورة. ] سمعنا بالأسد لمن يعجز. ] لكن كمان يعجز ويكرمش ويجوع؟. ] أسد مجدوع زي بشكير المسح!. ] لكن ليهو حق الأسد. ] مدام قاعد ليهو في بلد لحم الضأن فيها ولحم النعام ولحم أي شيء. اكلوهوا التماسيح. ] زمن ما زمن الأسود. ] أنه زمن التماسيح. ] لذا كان منظر أسد حديقة القرشي مخجلاً. ] ومنظرنا ونحن خجلانين مخجلا أيضاً. ] ومنظر الأسد هو نفسه منظر المرحوم الجنيه السوداني أمام العملات الأخرى. ] ولا يشبه أسد القرشي إلا المواطن في السوق. ] منظر المواطن في السوق مخجل شديد. ] ومنظر الحكومة أمام أزمات الناس أضحى مخجلاً ومخجلاً جداً. ] أخير منظر أسد القرشي من منظر الحكومة أمام المواطن. ] فالوثيقة الدستورية ياحكومة ماقالت ليكي أنسي المواطن وأسسي للدولة. ] أفرض ياحمدوك يا أخوي نجحتوا في تأسيس دولة وأنتشلتوا البلد من بئر الحرامية. ] حاتلقوا ليكم مواطن وين يستمتع بتلك الدولة؟. ] كلنا منظرنا بقي زي أسد القرشي. ] والمغالطني يعاين في المرايا. ] فالمنظر العام وكل المشهد مخجل مخجل مخجل. ] أيها الناس ] نعلم أن الكيزان خربوا القيم والنفوس قبل البلد. ] ولكن هذا ليس مبرراً لفشل الحكومة في تخفيف الأعباء على الناس بمجرد إجراءات رقابية بسيطة. ] وما كلو شيء يقبل تبرير عملوهوا الكيزان. ] حقو مانبقى زي بوش الأبن. ] قالوا جورج بوش في خطبه له من البيت الأبيض جاهو سكرتيرو الخاص وقال ليهو همساً. ] الكهربا قطعت في نيويورك. ] بوش قال ليهو ده بن لادن. ] وواصل خطابو. ] تاني السكرتير جاهو ودنقر فيهو وهمس ] سعر الدولار شكل هبوطاً مفاجئاً أمام الين الياباني. ] بوش قال ليهو ITS BINLADIN ] ده بن لادن. ] وواصل خطابو. ] تاني السكرتير دنقر فيهو وقال ليهو ياريس المدام حامل. ] بوش بدون تردد قال ] ITS BINLADIN ] ده بن لادن. ] أيها الناس. ] حقو مانبقى جورج بوش في التبرير. ] تفاقمت الأزمات التي يعيشها المواطن. ] والسبب ITS NOT BINLADIN ITS .. قصور الحكومة وبطئها ومحركتها . ] واعتمادها على شماعة ده بن لادن. ] لذا لم يختلف منظر الحكومة أمامنا ومنظرنا أمام أعيننا عن منظر أسد القرشي. ] المهم ] قالوا كردنة جاب عشرة خرفان لأسد القرشي. ] أخير ياكردنة. ] بدل الجماعه ياكلوها ويجلوها. ] ولا يصرجوها وفي نفسهم يدخلوها. ] أخير يترقع بيها الأسد لمن يشوف ليهو طريقة رقم وطني وجواز ومخارجة. ] فالثورة البعدها صابرين دي مااااامضمونة. ] أيها الناس ] إن تنصروا الله ينصركم. ] أها ] نجي لي شمارات والي الخرتوم. ] والينا ] تجارة العملة لسة مدورة فينا. ] ده بن لادن برضو!. سلك كهربا ننساك كيف والكلب قال ده أخاف على كلب يجوعلي أسد؟ وإلى لقاء سلك صحيفة الأنتباهة
