[email protected] حاج بلة اصبح شغله الشاغل الذهاب لتركيا ... وزاد شغفه في مشاهدة حلقات المسلسل التركي ... بل اصبح يقلب القنوات بحثا عن مسلسل في قناة اخري ... وكل مرة تختمر في راسه الفكرة ولازال عمران ياتيه صباحا ... ويجلس معه في ظل بيته ليسمع افكار حاج بلة المتجددة عن تركيا ... وعن حكاوي حاجة السرة وتعلقها بمهند ... وتاثرها لدرجة حردان العشاء عشان مهند مصاب برصاصة او نور مُزعلاوهُ ... وكان عمران يستمتع بشدة حين يصل الكلام لحاجة السرة والغبيان الذي يصفها بها حاج بلة وفي صباح يوم وكالعادة يجلس حاج بلة في مكانه المعتاد وضهره لبيته جاءه عمران: السلام عليكم ياحاج بلة ... حاج بلة : وعليكم السلام يا عمران اتفضل مالك اليوم أتاخرت ... عمران يجلس ولا يرد على حاج بلة ... استغرب حاج بلة مالوه الزول ده الليلة ولاحظ ان عمران ليس كعادته كل يوم يسال عن ما حدث في حلقة الامس من المسلسل التركي !!! حاج بلة : مالك يا خرابة اليوم ماك طبيعي ... عمران : والله يا حاج بلة اليوم سمعت لي خبرا كدي لخبط لي كياني ... حاج بلة : خبر شنو يا داهية ... عمران : والله خبرا طير وعجم !!! واستدرك أظنها يا حاج بلة القيامة قربت ... حاج بلة : يازول ان شاء قيامتك براك انا لسع ما مشيت تركيا انت عايز تقوم القيامة ... عمران : يا حاج بلة تركيا شنو اللي ماشي ليها تركيا عديل جائتك في السودان ارتاح واقعد في مكانك ووفر قريشاتك ... حاج بلة اعتدل في كرسيه وازداد انتباه تركيا جاءت في السودان !!! ... حاج بلة: كيفين كلامك ده يا خرابة ؟ عمران : والله الخبر السمعته ده بخلينا اكعب من نسوان تركيا المفسخين ديل ... حاج بلة : الله يفسخ جلدك ده انت والسرة يازول ما تكلمني الحاصل شنو؟ عمران : الإيثار ... حاج بلة : انت يازول جنيت الليلة ولا شنو الخرابة الإيثار ده كمان شنو ؟ ... عمران الإيثار ده يا حاج بلة زواج جديد ... حاج بلة : يا زول والله انت طاشي شبكة عديل اليوم ... عمران : يا حاج بلة كلامي ده حقيقة والله كمان عنده فتوى من مجمع الفقه الاسلامي التابع لي وزارة الجمهورية ... حاج بلة : يعنى الكلام كلام حيكومة ساي ... عمران : كلام حكومة عديل يعني شيتن قانوي ومؤسس ... حاج بلة : كدي احكي خبرك ده يا خرابة امانة يالسرة ما جاك بلاه عديل... عمران : الله يجازي محنك يا حاج بلة اسع السرة مالك حاشرها ... حاج بلة : كيفين حشرها ليه ؟ ما القصة فيها عرس وكمان بقرار من الحيكومة ان شاء يعرسو ركبيانها المربطاهم دايلك تقول علاء الدين جبريل ... عمران : ههههههههه (يضحك حتى تبين نواجزه) ... عمران : الله يجازي محنك يا حاج بلة ... حاج بلة : كدي خلي محّني واحكي لي عن الإيثار ده ، انت خشمك فوقه اللبن ، تعرف يا عمران الايام دي ايام فك التسجيلات ناس المريخ و الهلال لقوا ليهم صغرة في قانون الاتحاد العام ، قاموا بقوا يجيبوا ليك في اللاعبين عن طريق الإعارة شئ من المغرب وشئ من الكنغو وشئ من نيجيريا ، اها الليلة عمك لاقى ليه صغرة في حاجة السرة وقوانينها والله يا جنه في شبه كبير بين حاج السرة وحاج فلسفة داك عرفتوه اب شعيرات داك ... عمران : ههههههه الله يجازي محنك يا حاج بلة الليلة بقيت عادل امام عديل.. حاج بلة : كدي يا مسخوط احكي عن موضوع فك التسجيلات والإعارة ده ... كدي فهمني الداهيه ده شرعي ؟ ... عمران : كيفين ما شرعي قلت ليك من مجمع الفقه الاسلامي يعني كلام علماء ساي ... كدي اسمعني اوهط ليك الكلام كتب في الجريدة بتاعت الحكومة خبرا عن فتوى لمجمع الفقه الاسلامي بالسودان يحلل ويجيز فيها ما اطلقوا عليه (زواج الايثار)... تعرف ياحاج ناس المجمع الفقهي بختار ليهم اسماء رنانة خلاص اسع عليك الله شوف الاسم ده تقول مسلسل تركي هههههه حاج بلة : اي والله الناس حقوا يعملوا مسلسلات بكونوا بس زي اسامة انور عكاشة ... عمران : والله لكن يا حاج بلة التلفزيون ده خلاك بقيت مثقف شديد ... حاج بلة : يا مصيبة انت قايلني أمي ولا شنو ؟ خلي الطماسة بتاعتك دي وقول باقي الخبر ... عمران : الخبر بقول تتنازل فيه الزوجة عن بعض او الكثير من الحقوق الزوجية ... مثل النفقة والمبيت والمسكن والمساواة بين زوجة (الايثار ) والزوجة الاولى او الزوجات الاخريات . حاج بلة : والله كلام سمح بالحيل ... عمران : وكمان جابوا ليهم دليل من السنة ... حاج بلة : صحي والله ديل الرجال ولا بلاش ... عمران : هههههه دليلهم على صحة فتواهم لزواج الايثار ضربهم المثل بأم المؤمنين السيدة سودة بنت زمعة ، وتنازلها للسيدة عائشة رضي الله عنهما في ليلتها هو مثال جانبه الصواب , فان الرسول الكريم تزوج السيدة سودة وكانت كبيرة في السن ، حيث كان عمرها ستون عاما وتزوجها بعد وفاة ام المؤمنين السيدة خديجة رضي الله عنها ، وتزوجها لكي ترعى وتربي له بناته رضوان الله عليهن جميعا ، وتزوجها قبل زواجه بالسيدة عائشة وتانزلت السيدة سودة للسيدة عائشة في ليلتها، لأنها كانت كبيرة في السن وتريد ان تبقى زوجا لرسول الله حتى تموت. حاج بلة : حرم ديل الرجال . يا سرة ما جاءك بلاء جديد أسمه الايثار كان أخير تركيا ساي... عمران يضحك مّل شديقيه وحاج بلة قام يعرض ساي ... .