[email protected] (1) حاج بله اصبح ممزق بين حلم الذهاب الى تركيا و زواج الايثار ويتكلم مع نفسه: الله يجازيك يا عمران خليتني ما عارف اركز كنت مفكر في تركيا اسع جبت لي زواج ناس الحيكومة ده اسع المراة دي يفتشوها من وين الله يجازي محنك يا عمران ، هو الخرابة ده مالوه أتاخر اليوم ؟ اسع انا خاتي الكراسي دي من الصباح وقاعد راجي المصيبة ولسع ماظهر. وبين حاج بلة كذلك تمر من جانبه (محاسن) وهي امراة في الاربعينات من عمرها مطلقة جميلة لونها اخضر ليموني وحاج بله ينتظر مرورها يوميا ليغني خضاري البي حالي ماهو داري ... ولكن كانت محاسن كل يوم تصدمه قائلة : السلام عليك يا عمي ... حاج بله : في سره (عمى كباسة للسرة ان شاء الله) اهلا يا محاسن . محاسن : حاجة السرة كيفنها ... حاج بله : يواصل حديثه مع نفسه قبل ان يرد عليها (ان شاء الله الكيف ما يغشاها) الحمد لله كويسة . وانت كيفنها امك ان شاء الضغط بتاعها نزل ... محاسن : الحمدلله كويسة . وتمشي محاسن ويتابعها عمها بلة بنظراته ويقول في نفسه ياهي دي ذاتها الايثار ... لكن عمى البتقول فيها دي المصيبة وكمان بتسالني عن المصيبة علاء الدين جبريل العندي في البيت دي ... الله يجيبك يا عمران . (2) عمران يظهر من بعيد ويلمح حاج بلة وملاحقته بنظراته لمحاسن . عمران : السلام عليكم ورحمة الله وبركاته حاج بله : جيت يا سودانير عمران يضحك بهستيرية فلقد كان يعلم بانه تاخر على حاج بله حاج بله : مالك يازول بقيت زي بص الحله عمران : اسع ما كنا كويسين بسودانير مالك حولت بسرعة . حاج بله : الاثنين زي بعض سوادنير تمشي خمس محطات حتى توصلك مكانك و بص الحله محل ما بشوف زول واقف بقيف . كدى خليني انت متاخر مالك . عمران : كدي قبال ما اقول انا متاخر مالي ، شايفك تعاين لمحاسن ساي... حاج بله : انت يا مصيبة ما بتفوتك حاجة ... والله البنية عاجبني كان قبلت بالزواج اللي الحكيومة السمح ده بعرسها لكن المصيبة شابكني يا عم بلة عمى كباس ان شاء يجئ للسّرة عمران : هههههههه والله السّرة دي تعبانة معاك اسع هي ذنبها شنو ؟ حاج بله : يازول خليني من الربربة وكلمني أتاخرت مالك . عمران : والله الليلة يا حاج بلة جايب ليك خبر تاني . حاج بله : يا مصيبة خبر أكبر من خبر الإيثار ... عمران : إيثار شنو والله ده خبر بنفعك معاك بس مفصل عليك ... حاج بلة : قول يا وش السعد خشمك فيه اللبن . عمران : على أبوها !!! (3) حاج بله : بسم الله الرحمن الرحيم ده شنو كمان ده ؟ عمران : كدي اصبر لي شوية . حاج بله : قول يا مصيبة طيرت علي رحلة تركيا بالإيثار واسع جايب ليك مصيبة جديدة . عمران : كدي يا حاج بله روق المنقة شوية . حاج بلة : اها صبرنا لمّا نشوف آخرك . عمران : في زواج جديد ... حاج بله : اركب الهوا نحن خلصنا من المسيار والايثار والمتعة كمان جايب ليك واحد جديد انت اصلك حا تجيب أجلي . عمران : ههههههه والله السّرة كان سمعت ونستي معاك الا تودينا غنتناموا . حاج بله : غنتناموا ان شاء الله يوديها ليها زي سامي الحاج . عمران : هههههه مش قلت ليك التلفزيون خلاك مثقف . حاج بله : كدي يا خرابة قول خبرك شنو . عمران : يا حاج بلة اليوم كنت ببحر في الانترنت . حاج بلة مقاطع عمران : بتسوي في شنو يا خرابة تبحر في شنو ؟ عمران : الابحار في الانترنت ده من لغة هذا العصر يا حاج بلة يعني كنت بتصفح في صفحات الانترنت يعني بشوف في عجائب الزمن ده الانترنت خلى العالم قرية صغيرة يعني الخبر اسع يطلع في الصين البعيدة ديك تقوم تلاقوه في الانترنت لو عايز سياسة بتلقها وكان عايزة رياضة تلاقها وكان عايز حتى الزواج تلاقيه في نسوان بعرضوا أنفسهم على صفحات الانترنت عايزين العرس . حاج بله : كان كده يازول انا عايز لي كمبيوتر فيوه الدهاية اللي اسمها شنو دي يا اخي البسبحوا فيها دي . عمران : ههههههههه ببحروا فيها يا حاج بلة اسمه الانترنت . حاج بلة : يسبحوا ولا يبحروا كله في البحر . عمران : يبحروا يا حاج بله في الفضاء الاسفيري ... حاج بله : عاين المطرطش ده هو انا عرفت ليك الاولي لما تقول الثانية . عمران : ههههههههه (4) حاج بله : كدى يا خرابة كمل لي موضوع على ابوها ده بعدين نشوف موضوع السفيري بتاعك ده . عمران : الاسفيري يا حاج بلة لكن نرجع ليك لموضوع على ابوها ... اليوم وانا بتصفح في الانترنت قريت لي موضوع لواحد اسمه سامي البحيري قال أضطرتنى الظروف الإقتصادية الأخيرة إلى أن أترك زوجتى وأسرتى للعمل فى مكان آخر، ومنذ أن أنتقلت إلى مكان عملى الجديد ، وجدتنى أشعر بوحشة ووحدة شديدة، وسمعت كثيرا عن أن هناك نوادى للتعارف، ولكنى إستبعدت الذهاب إلى مثل تلك النوادى، وواصل ياحاج سامي البحيري كلامه وقال وكذلك عرفت عن طريق الإنترنت عشرات المواقع للتعارف، ولكنى وجدت أن أفضل شئ هو أن أتزوج زواجا حلالا خلال الفترة التى أبتعد فيها عن زوجتى، حاج بله : والله زول شجاع طوالي قرر وعايز نفذ مش زي ناس قريعتي راحت عمران: قبلت على روحك كمان ، اها سامي البحيري قال ليك ولم أقرر بعد إذا كنت سوف آخذ رأى زوجتى فى هذا القرار التاريخى والإستراتيجى أم لا؟ حاج بله: ما تاخذ رايها اتوكل ساي عمران : ههههههههه مالك يازول انت فوت وله شنو كمان فاتح ليك حوار مع الراجل زي القاعد جنبك حاج بله: يا اخي بوصيوه ما عندي خبرة تركياميه عمران : هههههههههههه اسمها تركامية ما تركيا الجننتك دي حاج بله : خلاص ياسيبويه كمل قصة الراجل عمران: واصل سامي البحيري وقال : وقلت خلينا الأول نجد الزوجة المؤقتة وبعدها يحلها حلاّل، وسمعت عن عدة أنواع من الزيجات المؤقتة والتى يوافق عليها بعض الفقهاء، مثل زواج المتعة وإستبعدت هذا الزواج لأنه منتشر أكثر بين الشيعة وأنا لست شيعيا، لذلك بقى نوعين من الزواجات: زواج المسيار، والزواج الآخر هو ما يقال له زواج على أبوها، حاج بله: هييييييع انعل ابوها كترت اسماء يعني تقع في النص ما تطلع فاضي اصلوه ، اها وبعدين عمران : ياخي انت مع هضربتك دي ما بتخلينا نكمل ليك ، نرجع لكلام سامي البحيري وقال: ولكى أعرف الفرق وجدت إعلانا فى إحدى المواقع العربية ويسأل الإعلان صراحة: هل ترغب فى زوجة مسيار إتصل بنا على التليفون ***** ووجدتنى مدفوعا بحب الإستطلاع الغريزى وبتأثير شعور الوحدة أتصل بالتليفون، وإكتشفت أن المكالمة سوف يتم تحصيل قيمتها من تليفونى ويتم الحساب بالدقيقة، وقلت لنفسى مش مهم نصرف كام دولار، لأننى أبحث عن زوجة ولا أشترى فرخة، فالموضوع يستاهل التضحية رغم الأزمة المالية العالمية. (5) ودار بينى وبين شخص ما هذا الحوار التليفونى: - مساء الخير، معاك سامى - أهلا مساء الخير، معاك \"قرنى أبو ثور\"من شركة \"مسياركو للزواجات السريعة\" - كنت قريت إعلان عن زواج المسيار وزواج على أبوها عن طريق شركتكم، شركة مسياركو - أيوه ده الإعلان بتاعنا، إنت عارف طبعا إننا بنسجل المكالمات وذلك لأمور قانونية وأيضا سوف تكلفك المكالمة دولار ونصف للدقيقة الواحدة، - فهل توافق ؟ - أوافق بس لو سمحت ممكن تتكلم بسرعة شوية - طلباتك إيه؟ - أولا عاوز أعرف إيه الفرق بين زواج المسيار وزواج على أبوها؟ - زواج المسيار إنت بتتجوز واحدة ويكون عندها بيت ومستقلة بنفسها أو إنك بتفرش لها بيت وكل ما تحب تعدى عليها، تعدى عليها تبات معاها ليلة أو ليلتين أو أى عدد من الليالى زى ماإنت عاوز وبعدين تسيبها وترجع لبيتك وولادك. - طيب وزواج على أبوها؟ (6) - زواج على أبوها، إن البنت ما تسيبش بيت أبوها، وإنت تعدى عليها كام يوم ولما توصل (وفى وجود أبوها وتحت إشرافه) تدخل غرفة النوم معاها، وتمارس معاها ما يمارسه الأزواج، وبعدين لو حبيت تستنى للعشاء ما فيش مانع أو لو حبيت تمشى بسرعة عشان تلحق تتعشى مع مراتك وولادك، ده شئ يرجع لك. - طيب وده كله فى مقابل إيه؟ - فى مقابل إنك تصرف على الزوجة مصاريفها الشخصية بالكامل إلى جانب مصروف إيد يوميا يتم الإتفاق عليه، وبعدين كل لما تزورها ليلة تديها إللى فيه النصيب. حاج بله : ده كلام شنو ده يا زول ده ما دعارة عديل اعوذ بالله من الشيطان الرجيم . عمران : تعرف يا حاج بلة سامي البحيري ده قال للراجل نفس كلامك ده . حاج بلة : اها ورد ليه قال ليه شنو ؟ عمران : قال ليه - لا يإ أستاذ: دى زيجات موثقة بالشهود وبموافقة الأهل، وعلى سنة الله ورسوله، وفيه شهادة زواج زيها زى أى زواج آخر، وبعدين دى زيجات حللها الشرع، وعندى فتاوى من كبار علماء المسلمين ممكن أبعثها لك بالإيميل على ملف (بى دى اف) حاج بله : ده كمان شنو (بى دى اف ) جهاز استخبارات جديد ولا شنو ؟ عمران : هههههه لا يا حاج بلة ده برنامج في الكمبيوتر برسلوه ليك فيه المواضيع يعني زي الفائل بكون فيه مستندات . حاج بله : تعيش كتير تعرف كتير يعني اسع يا خرابة العرس ده ما فيه مشكلة يعني حلال ... عمران : حسب كلام الناس ديل بقولوا صحيح مائة في المائة . حاج بله : والله حيروني عديل كده اسع يعني الواحد بقي عندو خيارات زي برنامج جورج قرداحي . عمران : هههههه ثقافة تلفزيونية . حاج بله : امانة ما جايك بلاء يالسرة كل يوم فن جديد الراجل قال عندو فتاوي في ملفات (بي دي اف) . عمران : هههههههههههههههههه . حاج بله : والله ياعمران العلماء ديل بقوا آخر عولمة . عمران : هههههههههههه شائف وقعوا ليك في جرح . حاج بله: يازول انت باين عليك مع العدو عمران: سمح فتك بعافية حاج بله: الله يعافيك
