ايها السادة هل تذكرون المباراة التى جمعت بين المريخ والانهار النيجيرية ساعتها لعب المريخ مباراة عظيمة أعادت للوطن بعض هيبته.. وهزم الانهار النيجرية ب (رباعية الخيام) .. وعندما علمت ان حكم المبارة ما هو الا رجل أمن بالمعاش.. قررت ان اشاهد المباراة وانا الذي لم اشاهد مباراة كرة قدم وغير كرة قدم قرابة العشرة سنوات.. تحرك دافع الفضول لدي العبد لله ..وطرحت على نفسي سؤالا كيف سيدير رجل الامن المباراة؟.. لان كلمة ضابط امن ترتبط في ذهنية العالم الثالث باسره بالتعذيب والغلظة والقسوة.. و صدمات الكهرباء.. ونزع الاحشاء والاظافر.. لم اشاهد المباراة لظروف حالت دون ذلك.. سالت احد الذين شاهدوها اجابني بفرح غامر وسرور.. ان المريخ انتصر وهو يرقص طربا.. يبدو انه متعصب.. دار حوار بيننا اشبه بحوارات مسرح العبث.. سألته بتعجب :كيف كان الحكم؟.. - دسيس يافردة .. وطرحت عليه سؤالا ثانيا :طيب بين الشوطين لما اللعيبة دخلوا غرفة الاستراحة.. الحكم ما جاهو احساس دي غرفة اشباح.. وحاول يدقهم ..ويوريهم الويل وسهر الليل؟ - ممكن الجهور لما يكون زعلان يدق اللعيبة.. بي الحكم ما ممكن ؟ - اقصد الحكم يدق اللعيبة في بيت اشباح.. يبدو انه تعجب من طريقة سؤال فقال: يا زول انت بتتكلم في كورة المريخ وللا في شنو.. كيف الحكم يدق العيبة.. بي صراحة انا ما فاهمك.. - خلاص انسى.. طيب الحكم ما طالب يدوهو 70% من ميزانية المباراة .. اقصد دخل المباراة.. - دا حكم وللا فيفا؟.. قلت له وانا اتصنع البهجة: طيب انسى.. الحكم ما جاب زول اسمه احمدتي او خالدتى او حسن تي عشان يساعده في عمله.. و(يكربج) الميدان كله؟ - لا لا..الحكم عنده مساعد راية .. - غير مساعد الراية والحكم الرابع .. ادركت انه لم يقرأ اطلاقا لرواد مسرح العبث حينما قال لي :انت يا اخوي شارب حاجة ؟ - ابدا ما شارب حاجة .. طيب انسى.. المراقبة بتاعت الحكم كانت قبلية ولا بعدية ؟ بدأ صبره ينفد قال: يعني انت الكورة الجميلة بتاعت المريخ دي كلها والاهداف الاربعة ما عجبتك ماشي للحكم بس ؟ - طيب انسي.. الحكم كان عنده حساسية وجيوب انفية من اسم زهير السراج وعثمان شبونة؟ - يا ستار يا رب الكعبة الناس في شنو وانت في شنو.. - طيب انسي.. سؤال اخير ممكن .. - دا اخر سؤال ياريت مايكون عن الحكم .. - الحكم كان لابس الزي الرسمي بتاع الحكام.. وللا بالزي العادي عمة وجلابية.. قميص وبنطلون وطاقية ونظارة.. - هاهاهاها حكم يلبس عمة وطاقية دا كلام شنو يا عمك؟ طبعا لابس زي الحكام.. صرخت فيه: يا زول الانت شفته دا ما الحكم .. الحكم دا بالذات ما ح يلبس زي رسمي .. وكررت له : الحكم دا بالذات بيلبس ملكي.. انت ما شفت الكورة كويس.. امش اعمل ليك نظارة نظر يا ابني.. انصرف وهو يقول: يا عمك فكنا.. شابكنا حكم.. حكم .. ما في زول لما يشوف كورة بيتابع الحكم بس.. الناس بتشوف الكورة الحلوة .. قال احمدتي قال.. ايها السادة لما دخلت الفيس لأقيس الراي العام بخصوص مباراة المريخ والانهار الجارفة.. كتب احدهم ان (ضابط امن يحابى المريخ) وفي نفس الوقت (عصر شديد) على فريق الانهار.. اعتقد ان المدون كان هلالابيا.. هذا يؤكد ان المعايير الرياضية في الوطن المنكوب (بالبوت) تقدم الولاء للفرق قبل الولاء للوطن.. ايها الاحباب.. حتما توافقونني الراي ان الكاتب الفذ امير تاج السر ابدع غاية الابدع وهو يصوغ ويشكل شخصية (عبد الله حرفش) رجل الامن بالعاش وهو يبحث عن لقمة عيش كريمة بعدما نٌزِعَت عنه هيبة المنصب.. وقدم لنا في طبق من ذهب رواية كاملة الاستواء والمذاق والدسم.. بَحَت المؤلف بجرأة غير عادية عن سؤال لم يتردد بخاطرنا من قبل: ماذا سيعمل رجل الامن عند عتبات التقاعد والمعاش ؟.. لقد تقبل الجمهور في السنغال ان يكون الحكم رجل امن في المعاش وتقبل الاتحاد الافريقي والفيفا ايضا ان يكون رجل الامن حكما .. السؤال الاول : هل يتقبل جمهور كرة القدم في السودان و- الراسخة في اذهانهم حكاوي بيوت الاشباح- ان يكون حكم كرة القدم من رجل امن بالمعاش ؟ وعلى النطاق الشخصي اتمنى ان اري حكم مباراة يحمل لقب رجل أمن سابق.. هل ربما سيعيد الى الاذهان حكاية الحكم الفذ والفريد (لانقا لانقا) الذي يضع المسدس على خصره وهو يدير المباراة.. [email protected]