زمان ناس الهلال بينتظروا تعثر المريخ علشان يكتبو (الهلال يغرد في الصدارة). هسي بيغرد مدربهم بس في تويتر (لم ننهزم للمرة الثالثة علي التوالي). لا والله مدرب ختري ده الأجنبي الوحيد البيرضى من الهزيمة بالاياب بالطريقة دي بيعمل (تغريد) في وجهات النظر بين الارباب والكاردينال لانقاذ الهلال. تغريداتو لو مشت بالمستوى ده حا يكتب (لن نستسلم في مباراة السنترليق) يغرد ساااي. ده باتريك والا (بطريق) أنا من شفت صلعتو دي قلت ياهو مدرب الهلال هو علي الزيرو والهلال علي الزيرو (درون يعني) وأقول في نفسي التعادلات الفي المباريات دي جاية من فين؟؟ مفروض الناس يمنعوه من التغريد زي ما منعوا المدافعين من التقريش غرد قال كاريكا مثل ميسي قالوا الشغيل جا شايل صورة يايا توريه عايزو يقول والشغيل مثل يايا وباتريك التغريد ما بغلبو أي فريق يغلبو لكن التغريد لا ده كنار يا ناس غايتو ناس كادوقلي الليلة حظهم النقطة مضمونة لو عايزين نقطة والثلاثة قريييبة. ونحن بنقول غلطان (الخرطوم). مفروض فريق الخرطوم كان يفوز بسهولة الثلاث نقاط كانت حقتو براااحة كان اسمه الخرطوم تلاتة نقاط الهلال غير اسمو. باتريك قالوا غرد وقال (هاليفة لاعب الوطني هو مفاجأتي القادمة في التسجيلات). ناس فاطنة جروا عليه سريع مسحوا الكلام بتاع هو خليفة كان احسن من الحداشر اللاعبين بالهلال باتريك قالوا عملوا معاه عقد ما يغرد الا بموافقة المجلس يمكن يوم يقول أتمنى الوصول لمستوى المريخ والله يحصل الطيار الاردني. ناس هلال الجبال أمامهم فرصة تغريدة لتحسين وضعهم تغريدة ما بعد المباراة لباتريك حاتكون علي النحو التالي: (كنت أظنها تقسيمة داخلية) قالوا باتريك شغال تغريد والمجلس شغال تغريم كل تغريد بتغريم. آخر الشهر تطلع تعادل باتريك لما كان في بلجيكا قالوا جاهو هبوط عملوا ليه درب ملح رفض ياخدو الا ملح وسكر. باتريك افضل مدرب أجنبي بيعرف (يتعادل) مع المباريات. التعادل مع المباريات ده عاوز ليه زول بيعرف يغرد. زي التعامل مع الاطفال تماماً. الشافع لو ما صفرت ليه وغنيت ما بيضحك الغناء ما ياهو التغريد انتوا قايلين تيوتر ده عامل عصافير ليه عصافير زرقاء شعار الهلال علشان الرك كلو علي التغريد باتريك يغرد خارج السرب صدقوني الزول ده بيفرح بالقرعة وبيتعادل بي سرعة لكن والله معذور مفروض قلب الدفاع بتاعو يكون أمير ادوه أتير. ومفروض مهاجمو يكون بكري المدينة جابوا ليه كبي الخلا. شبكة الهلال جابوا ليها حارس القطن يعني شوال قطن. علشان يشيل اكبر كمية من الاهداف دفس. ويلا يا باتريك غرد بي نفس سيدي باتريك (غرد) علي كده.
