بعد إعلان بنك الخرطوم الأخير عن فتح تمويل الزواج وشراء المستلزمات المنزلية، وهي خطوة يشكر عليها البنك و(كتر خيرو)، يتوقع أن تنهي خطوة البنك الشجاعة حالة الركود في الإقدام على الزواج وقد تشجع الكثيرون على الإقدام على الخطوة، لكن السؤال، حول كيفية حصول البنك على ضمانات تمكنه من استرداد أمواله، مثلاً في السيارات الضمان للسداد قيمة السيارة نفسها ورهنها للبنك حتى اكتمال السداد وإذا فشل العميل يتم بيعها لسداد أموال البنك، وكذلك في التمويل العقاري، لكن العرس دا (ضمانتو صعبة)، يعني حيعملو شنو، أنا غايتو عندي فكرة عشان الناس ما تدور في (العرس)، وتملح البنك في قروشو، الشرط الأول حظر (ناس مثنى وثلاث ورباع)، لأنو إذا أنت ما عندك قروش (الشلاقة ليك شنو)، ثانياً أن يكون الزوج لديه وظيفة ويستطيع سداد قيمة التمويل، وأن يتم تحويل مرتبه شهرياً إلى البنك، لأنو إذا (خليتو مرتو مرهونة للبنك) يمكن عادي ما يفك الرهن ويكون قنع من (المدام)، ويمكن عادي يستغل النقطة شر استغلال وإذا نشبت أي مشكلة زوجية يقول لزوجته: (أوعك تكتري تقللي والله أسع أوقف الدفع للبنك وأخليهم يودوك السجن تحت بند تبقى لحين السداد)، والمسكينة طوالي تعمل: (حمد لبد)، وتقول ليه (أقول ليك بأمانة عمليتك جبانة)، وهكذا دواليك. الشرط الثالث وهو في مصلحة الزوجة بعدم الطلاق حتى اكتمال سداد التمويل، ودي يمكن تستغلها الزوجة شر استغلال وتأدب الراجل أدب المدائح، وإذا (عمل حركات)، تضحك وتعاين ليه بقعر عينها وتقول له: (أكان راجل طلقني عشان تشوف البنك بعمل ليك شنو). خطوة البنك بالجد شجاعة وتستحق الدعم والمؤازرة لكن قلنا ننبه كل الأطراف عشان (الموضوع يمشي كويس وما تكون في أي مخاطر للجميع)، ونصيحة للبنك: (كان بعدتوا من ناس مثنى وثلاث ورباع ديل العوجة تب ما بتجيكم)، وبتكسبوا ثواب في تسهيل الزواج للشباب وتساهموا في محاربة العنوسة، التي أخشى أن تؤدي في يوم من الأيام لما فعلته هذه الفتاة الصينية عندما يئست من محاولات البحث عن عريس بالطرق التقليدية، فنشرت صوراً لها بفستان زفاف أبيض على لوحات إعلانية ضخمة في الطرقات، مشيرة إلى أنها تبحث عن فارس الأحلام. وذكرت وسائل إعلام صينية أن هوانغ ليجوان (28 عاماً) أطلقت حملة إعلامية بتكلفة 165 ألف دولار تقريباً، (بزار شديد)، ونشرت صورها في العديد من الطرق ومحطات الحافلات على لوحات إعلانية ضخمة في مدينة شينغدو بإقليم سيشوان جنوب غرب البلاد. ووضعت الفتاة تعليقاً تحت صورة لها بالفستان الأبيض وهي تقف إلى جانب حصان قالت فيه: "أملك منزلاً وسيارة ومدخرات.. أبحث عن الرجل والمناسب وأريد أن يكون عام 2014 سعيداً". وأشارت هوانغ إلى أنها توصّلت إلى هذا القرار بعد أن تعرّضت للكثير من الضغوط من عائلتها كي تتزوج. ورفضت هوانغ التي تعمل في مجال التسويق التهم الموجهة إليها بأنها تسعى إلى الشهرة، وقالت إن انشغالها الدائم يمنعها من الخروج والاختلاط بالآخرين. والله يا بتنا إن جيتي هنا بلدنا دي (الدم بسيل ركب)، بيت وعربية ومدخرات، (بس إعلان)، صغير زي ملصقات الحفلات في مدخل الكباري، كان الخرطوم كلها جاتك، ومكان محتاجة تخسري المبلغ دا وهو بالسوداني يعادل أكثر من مليار جنيه، (الكتراااابة)، يا بتنا ستفي شنطتك وأحجزي في الإماراتية وتعالي الخرطوم ولو دايرة عريس صيني، سوداني، بتلقيه بدون الخسائر دي.
