بالعربي الكسيح - محمد الطيب الامين الزول لما خيالو يكون واسع ممكن يعتمد تسجيل لاعب ب(13) جنسية .. الخيال الواسع مشكلة .. ناس فيتا كلوب فاكرين (افريقيا لسه ما ودعت الظلام) .. جابو ليهم لاعب باكتر من جنسية وشاركوا بيهو في الابطال .. يعنى ناس فيتا ديل لو شاركوا في سيكافا ممكن يجيبو لاعبين ما مسجلين في الكشف .. زول بيعمل كده في الابطال قطع شك لو شارك في سيكافا ممكن يلعب ب(سفنجات) .. والله المفروض الفرق المشاركة في سيكافا تلعب ب(السفنجات) .. الخيال الواسع مشكلة كبيرة .. في تلفزيون الخرطوم أظهرت الكاميرا المذيع (حفيان) وهو يحاور الضيف .. حفيان عديل .. أ تقول بيحاور في المغنية محاسن لقيمات .. الخيال الواسع مشكلة .. طبعا سعة الخيال حاجة ربانية بتفيدك في حاجات كتيرة لكن كمان مرات بتخرب ليك .. هسه ضفر لما حلف قسم كان خيالو واسع في اللحظة ديك .. ما في سبب بيخلى ضفر يحلف قسم ويكسر الحليفة ويمشى يلعب للمريخ .. جمال الوالى برضو لما قال : (العارف عزو مستريح) كان خيالو واسع حبتين .. وتعاقد جمال الوالى مع نجاد البوسني برضو فيهو خيال .. قال ليك في (بت بايرة) بورة صعبة جدا .. البت دى بايرة وفي نفس الوقت خيالها واسع .. يوم على حس البورة دى البت شافت المطرة شايله والجو جميل قامت قالت : (يا الله المطرة تصب رجال) .. حسب البورة إتمنت إنو السماء تكب رجال بدل الموية .. المهم .. بعد ما قالت كده إتلفتت ورا شافت اطفال كتار جارين وبيلعبوا قامت قالت : (سجمى بدت تنقط) .. شفت الخيال ده كيف .. خيالها قال ليها السماء بدت تنقط (شُفع) وبعد شوية بتكب رجال .. غايتو جنس غايتو .. هسه ناس المريخ في سيكافتهم دى بيقولو يا الله الكأس .. ولو شافو (علبة) في الشارع بيقول : (سجمى بدت تنقط) .. ما علينا .. إحنا في العادة (كل ما نشتل الأفراح تجي الاقدار تمد إيدا) .. لو زرعنا لينا (شتلة فرح صغيرونة) بتجى الاقدار تمد ايدا .. مشينا الكنغو قلنا نجى باربع نقاط الاقدار مدت ايدا .. هسه (الكاف) رجع لينا (شتلة الفرح) .. قنعنا من الابطال جاء (الكاف) تانى رجعنا .. ودى أول مرة ما نشتل فيها الافراح ونتمني إنو الاقدار ما تمد إيدا .. المرة دى لا شتلنا فرح ولا شتلنا عشم عشان كده بنتوقع الاقدار تمسك يدها .. بس في حاجة لابد منها .. الناس ما تتعامل مع الموضوع على اساس إنو خلاص الهلال رجع الابطال .. إحنا تانى ما بنتحمل حزن .. جسمنا ده ما فيهو شبر ما فيهو (جرح) .. ما دارين نفرح ونتعشم ويجى الكاف يقول لينا صححنا مسار اللاعب .. الشكوى صحيحة وما فيها كلام .. لكن الكاف ما مضمون .. ممكن يخذلنا .. ولذلك مطلوب من جمهور الهلال العظيم ان يتعامل مع هذه الاحداث بشكل معقول .. وكذلك الاعلام لابد ان يكون واقعيا ولا يفرط في التفاؤل حتى إذا الموضوع فشل تكون الأمور عادية .. والهلال متضرر أكثر من الزمالك لان اللاعب شارك في مباراتي الهلال .. وده بيخلى الهلال يكون أحرص على الشكوى .. يا الكاردينال لازم تكون صاحى ومفتح .. الموضوع ده ما فيهو هظار .. وحقك لو ما وقفت فيهو ما في زول بيقيف ليك فيهو .. والهلال ده من زمان نفسو ما طويل في الشكاوي والقانون .. والمرة دى القضية دى نصل بيها (الفيفا) ذاتا .. فريق زي ده ما بيستاهل يلعب في الابطال .. ناس فيتا ديل المفروض حدودهم تكون (حوض النيل) و(سيكافا) .. وسيكافا وحوض النيل أولاد خالات .. قال ليك المريخ لعب مباراة العمر امام فيتالو .. الغريبة فيتالو بيشبه فيتا في الاسم .. (فيتا .. لو) و(فيتا) .. ناس المريخ فرحانين بالتعادل مع فيتالو مفتكرنو فيتا .. والله غايتو جنس غايتو .. يلعبو مع فيتالو يفتكرهو فيتا !! حلم الجيعان عيش .. المريخ في دور الثمانية سيواجه فريق (عزام) .. عزام ده أخو (كزام) يا سلك ولا شنو ؟؟ عزام ده فريق حلة .. زي حلة كوكو .. فريق حلة عشان كده ما تخافو .. كل فرق سيكافا هى فرق حلة عدا المريخ وكمبالا .. كمبالا مشارك بالصف التالت والمريخ مشارك بالصف الاول .. والله نحن نلقى فريق عزام ده نديهو (17) .. أقول ليكم حاجة .. عندى سؤال .. المريخ لو غلب فريق (عزام) بيقابل فريق (هشام) ؟؟ ده بس سؤالي .. وأى زول طبعا حر في (سؤالاتو) .. سؤالاتو ب(الغاء) .. و..و.. ومن حور الجنان أم انت ...(من الحاج يوسف الردمية) ..