نسيت يا سلك لمن كنت بتقول في قناة النيل الأزرق المعز الحارس البقع وما بقوم """""""""""""""""""""""""""""" كل الذين سجلهم المريخ من الهلال – كان الهلال قد شطبهم أو رفض التجديد لهم أو كان على الأقل ما عندو رغبة حقيقية في تسجيلهم """""""""""""""""""""""""""""""""""" هيثم مصطفى عندما انتقل من الهلال إلى المريخ – ناس المريخ خلوا قرايتهم وركزوا ليك مع البرنس """"""""""""""""""""""""""""""" جوائز سوداني للأسف فيها مجاملات شديدة – وموازنات وترضية وقسمة بين الهلال والمريخ """"""""""""""""""""""""""" • السنة دي ح نتعرض لخبطة كبيرة. • المشكلة ما في (النضارة) – المشكلة في (التسجيلات). • عندنا عمنا زول كبير في السن ، وصعب وما بتفهم في (المسائل) الزي دي. • مسائل شنو؟. • المهم (مسائل) وخلاص ما تسألوني. • خلاص عاوزين تفكوا أي حاجة وتمسكوا لي في (المسائل). • تفكوا الحاجات المهمة وتمسكوا لي في الحاجات الهامشية. • عمنا زول (شفت) ..أول ما يجيبوا ليه (الغداء) أول حاجة بسأل منها (الملَّاحة). • وقت يقولوا ليه : الملَّاحة يا ها دي يا حاج - قدامك...(ما بشتغل بيها) طوالي بحول الموضوع وبقول ليهم : (جيبوا الموية الباردة). • وقت كمان (الملَّاحة) تكون ما موجودة في الصينية ..عمنا بقوم ليك في (الأولاد). • قاعدين وكمان ما جبتوا (الملَّاحة) - القاعدين ليها شنو؟. • ما عندكم مسؤولية. • ما عندكم احترام للزول الكبير. • ما عندكم (دم). • جابت ليها (دم) كمان. • يسمعهم ليك مية كلمة فارغة. • عندو أهم حاجة في الصينية (الملَّاحة). • روحو ما بترقد لو ما شاف (الملَّاحة). • طبعاً بتكونوا من قبيل عاوزين تعرفوا علاقة (الملَّاحة) بالموضوع شنو؟. • الملَّاحة ما عندها علاقة بالموضوع. • لكن (الملح) الفي الملَّاحة هو موضوع عمودنا اليوم. • شفتوا كيف؟. • - نحن أي حاجة عندنا بي نظام. • أي لاعب سبق له اللعب في الهلال هو (ملح) الفريق البلعب فيه بعد الهلال. • هو (ملَّاحتو). • هيثم مصطفى عندما انتقل من الهلال إلى المريخ – ناس المريخ خلوا قرايتهم وركزوا ليك مع (البرنس). • اتخلعوا وعرفوا الفرق بين الهلال والكبير. • خلوا العجب. • مسكين العجب مرقها في الفاشر (سطر ما عاوزين يكتبوه عنو). • ونسوا ليك راجي عبدالعاطي ورمضان عجب ..وبقوا بفكروا بس في هيثم مصطفى. • ناس هيثم كابو بقوا يمنحوا ليك (جائزة) أي مباراة يلعبها المريخ لهيثم مصطفى. • حتى هيثم مصطفى عندما كان قاعد في بيتو ..(رافضاً للمريخ) ، إعلام المريخ كان بمنحو (جائزة المباراة). • رمضان عجب لمن اتعقد من الحكاية دي. • انتوا قايلين (الرباط الصليبي) الكان بشكي منو رمضان عجب من شنو؟. • من البتعملوا فيه دا. • هسع ناس المريخ خلوا أي حاجة. • طابقهم التاني. • وبيان جمال الوالي. • و(المحترفين) وبقى النجم الأول عندهم (المعز محجوب). • الكل في الكل. • نسيت يا سلك لمن كنت بتقول في قناة النيل الأزرق المعز الحارس البقع وما بقوم. • هسع المعز بقى يقوم. • قلنا ليكم قبل كدا جمال سالم دا لا حارس ولا حاجة ..(حتى لو جاملوه ومنحوه جائزة أفضل حارس في الممتاز) – قعدتوا تغالطوا. • ما بتسمعوا الكلام. • لو جمال سالم حارس ممتاز – ما كان بتفرحوا الفرح دا كلو بي المعز محجوب. • بابكر سلك أمس قال طبيعي أنو الفريق الكبير يسجل من الفريق الصغير. • الكلام قولوا لي ناس المهدية. • ناس الأهلي الخرطوم. • لكن ما بقولوه للبطل. • هسع أنت يا سلك بتذكر آخر مرة فزتوا بيها بالممتاز..(اتحاسبت بي إسلام ساكت). • إسلام دي ألحقوها – أبوها قنعنا منو. • غايتو عبدالماجد عندو محاولات ب (الواتس آب). • كلام سلك كان يمكن أن يكون منطقي لو كان ذلك التسجيل من أجل ترقي اللاعب وليس من أجل تدميره. • ويحدث ذلك التسجيل إذا كان اللاعب المنتقل صغير في السن – وليس في آخر أيام حياته في المستطيل الأخضر. • كل الذين سجلهم المريخ من الهلال – كان الهلال قد شطبهم أو رفض التجديد لهم أو كان على الأقل ما عندو رغبة حقيقية في تسجيلهم. • سجل المريخ لاعب الهلال السابق مجاهد أحمد محمد بعد أن شطبه الهلال بعد أكثر من (8) سنوات لعبها مجاهد في الهلال وانتقل اللاعب إلى جزيرة الفيل. • وسجل المريخ لاعب الهلال السابق ريتشارد جاستن بعد أن شطبه الهلال بعد قرابة ال (9) سنوات لعبها ريتشارد في الهلال. • وسجل المريخ من الهلال الباشا وعلاء الدين بابكر وأكرم الهادي سليم – وديل كلهم (شطبهم) الهلال يا سلك. • ولم تكن هناك رغبة حقيقية في إعادة قيد كلتشي وتراوري وبكري المدينة فانتقلوا إلى المريخ بعد أن رفضهم الهلال. • وسجل المريخ هيثم مصطفى الذي شطبه الأمين البرير بعد (17) سنة حافلة لعبها هيثم مصطفى في الهلال انتقل بعدها هيثم زعلان إلى المريخ. • ليلعب موسم في المريخ ويقعد موسم في البيت. • وكان آخر المنضمين للمريخ من لاعبي الهلال (السابقين) المعز محجوب الذي لعب في الهلال (12) سنة وأصدر مجلس الهلال بياناً أكد فيه عدم رغبته في تسجيل الحارس المعز. • هذه نماذج من انتقالات لاعبي الهلال إلى المريخ وهي غير انتقالات لاعبي المريخ إلى الهلال. • حيث انتقل للهلال بابكر الحلو باكمبا وادوارد وحققا نجاحات كبيرة في الهلال بعد صدامات كبيرة مع مجلس المريخ. • وانتقل إلى الهلال علاء الدين يوسف نجم آخر مباراة لعبها مع المريخ ، انتقل بعدها للهلال بعد حادثة (البصمة). • وقبل فييرا كان حمودة بشير الذي سبب انتقاله للهلال صدمة كبيرة لجمال الوالي مازال يعاني منها حتى الان. • أما انتقال هيثم طمبل والذي قدم مواسم جيدة مع المريخ فقد كان ذلك بعد مماطلة مجلس صلاح إدريس. • طمبل حتى آخر لحظة من توقيعه للمريخ كان ينتظر تحركاً من الهلال. • اجمالياً كدا – نحن السنة دي بقى عندنا اكتر من (هلال). • عندنا الهلال (الكبير) هلال 2015م بسر العين وبفرح البلد (سيد البلد)...بقيادة نزار حامد وبشه وكاريكا. • وعندنا (الرديف) هلالي سوداني خالص بقيادة بشه الصغير والصيني والجعلي ..شباب في مقتبل الحياة ينتظرهم مستقبل كبير. • مواهب ما فيها أي كلمة ..وطموحات لا نهاية لها. • وعندنا هلال 2007م – ديل ناس أهلي شندي. • هلال 2007 بقيادة حمودة بشير وكلتشي ونادر الطيب وصدام أبوطالب ومهيد خالد إدريس. • هلال 2007 اكتمل في أهلي شندي بي قايدو هيثم مصطفى. • بل بي الراعي الرسمي صلاح إدريس. • دا غير طبيب الفريق واختصاصي العلاج الطبيعي ومدير الكورة عبد المهيمن. • أها عليكم الله هلال 2007 بقى ناقص شنو؟. • أما هلال 2002 م وديل متأخرين شوية – ديل أخوانا ناس المريخ. • انتوا قايلين عندكم (مريخ). • فريقكم دا هو هلال 2002. • شوفوا الصورة واحكموا براكم. • هلال 2002 بقيادة المعز محجوب. • أخوانا ناس تراوري وبكري المدينة (الما ح يلعب) والباشا ما بقصروا مع المريخ. • بعملوا العليهم. • بس خلوا ناس (الزهور والورد) علي جعفر والريح علي ينستروا وما يبهلوها. • الهلال الكبير مشرف عليه رياضياً الخبير أمين زكي. • والرديف الأسد فوزي المرضي. • شوفوا لينا جماعة يشرفوا على أولادنا في الأهلي شندي والمريخ. • الأهلي شندي ودوا ليه (الفاتح النقر). • وجيبوا عاكف عطا يشرف على أولادنا في المريخ. • كدا نكون ما قصرنا معاكم. • ....... • ملحوظة : أنتوا وين الباشا؟. هوامش • جوائز سوداني للأسف فيها مجاملات شديدة – وموازنات وترضية وقسمة بين الهلال والمريخ. • لا جمال سالم ولا نيلسون يستحقان جائزة أفضل حارس وأفضل لاعب وسط. • جمال سالم ونيلسون شاركا في الممتاز في نصفه الثاني أي في الدورة الثانية – كيف يفوزا بجوائز سوداني. • الدعيع وجاهد وحافظ كانوا أحق بالجائزة من جمال سالم. • والشغيل وعماري أحق من نيلسون. • لا يعقل أن تمنح الجائزة للاعب شارك بنسبة 50 % فقط في مباريات الممتاز. • هذه مجاملات. • جوائز سوداني يفترض أن تلغى إذا كانت توزع بهذه الطريقة. • الشغيل هذا الموسم يعتبر نجم الموسم. • مع ذلك ذهبت الجائزة لنيلسون. • الجماعة ديل عندهم عقدة (أجنبي). • مهندس الصوت مجدي عبدالقيوم بفرقة الفنان محمد النصري هذه الأيام لا تسعه الفرحة بتسجيلات الهلال وبصعود فريق الوحدة أرقى في منافسات كأس السودان ويتقدم بتهانئه للوحدة أرقى. • الفنان محمد النصري طبعاً مبسوط أيضاً بتسجيلات المريخ. • النصري ح يغني للمريخ – لكن مجدي عبد القيوم الهلالابي ح يلخبط الصوت. • يا النصري أنت غنيت لرفيق النسمة – ح تغني لرفيق الكتاحة مالك؟. • خليك أحسن في (النسمة). • ...... • عاجل : عضو في غرفة تسجيلات المريخ قالوا طلع وجاء راجع – قال ليهم (وليد طاشين) كيف؟.
