بالعربى الكسيح محمد الطيب الأمين الما شافو ضاع والشافو إتخلم !! * في العادة (الذباب لا يموت بالتهديدات) .. * عمرنا ده كلو إحنا والذباب بنأكل في صينيه واحده وما حصل شفنا لينا (ذبابه كتلها تهديد) .. * وما يفعله المريخ الأن من تلويح بالانسحاب من الممتاز حال رفض قرارات (لجنة الاستئنافات) إنما هو تهديد لن يقتل (ذبابه) .. * تهديدكم ده على بالنعمه لا بكتل ذبابه ولا بجرح (باعوضه) .. * والله صحى .. * الحقيقه المثبته هى : (الفرق سته نقاط وأهلى شندي سيكون في المركز الثاني) .. * أنا والله مستغرب المريخ (هايج وزعلان في السته نقاط) مع إنو قبل خمسه سنين كان الفرق بينا وبينهم (18) نقطه .. * زي ما ال(18) ديك أكلتوها في حنانكم ال(6) نقاط دى برضو أكلوها في حنانكم .. * المشكلة وين يعنى ؟؟ * ما كل سنه (وصيف) وبتأكل في حنانك .. * ولا عشان السنة دى معاكم مريخاب الجنوب ؟؟ * جنوب ب(الضاء) .. * في التسجيلات القادمه يحتاج الهلال ل(الكم) و(الكيف) .. * الفريق عايز نصف دسته من اللاعبين وفق معايير دقيقه جدا .. * نقول نصف دسته من اللاعبين لان (كنبه الهلال) فقيره وهذا ما ثبت في مشوار الابطال هذا العام .. * واكثر ما يحتاجه الهلال بخلاف (طقم المهاجمين وطقم المدافعين) هو لاعب وسط ايسر بمواصفات خاصه يعوض غياب الغزال ويمنح منطقة الوسط مزيد من التنوع والحلول .. * ينقص الهلال نجم بحيويه وفكر ونشاط موبوتو .. * وافريقيا فيها اكثر من موبوتو بس كيف السماسره يخلونا في حالنا .. * السماسره والمصلحجيه لو خلو الهلال ما بتجينا عوجه والله .. * بعد خمسه ايام من خسارته بثلاثيه أمام مازيمبي جاء المريخ وحقق فوزا كاسحا على الميرغني كسلا بثلاثه اهداف نظيفه .. * ومن واقع نتيجة مباراه مازيمبي ونتيجة مباراه الميرغني فأن نهائي الابطال سيكون بين المريخ وإتحاد الجزائر .. * يعنى ريحه المطار لسه فايحه يا سلك .. * غايتو جنس غايتو ؟؟ * ورد في الاخبار ان الكابتن عاكف عطا قد تقدم بشكوى ضد الهلال مطالبا بحقه .. * والقال حقي غلب يا عاكف .. * وإحنا ما بنلومك طالما انت عندك حق وكلنا عارفين الظروف الاقتصاديه والحاله الماديه ولكن .. * ولكن يا عاكف عطا نذكرك ونقول : الهلال زي البحر والبحر لو غلط في حق (السباحين) ما في سباح بشتكى البحر .. * ان شاء الله حقك يصلك يا عاكف لكن كمان الفيك إتعرفت .. * في زمن شداد كان الاتحاد يُسمى (الاتحاد العام) ، وفي زمن معتصم جعفر إحنا واولاد حلتنا اطلقنا على الاتحاد اسم (الاتحاد الخاص) .. * اتحاد معتصم الخاص يجيد اللعب بالبيضه والحجر حتى إننا نرى ان يتم إستحداث منشط لألعاب القوى يسمى (البيضه والحجر) ليترأسه معتصم .. * بس يا دكتور موضوع (السته نقاط) ده لا فيهو بيضه ولا فيهو حجر ولا فيهو طوب .. * وإحنا ما زي المريخ (لحمنا مُر) ، لو عايز تجامل عزو يبقى جاملو في اى حاجة تانيه غير الدورى الممتاز .. * المجامله في (العرق) ما بنقبلها والفرق سته نقاط ورفعت الاقلام وجفت الصحف .. * غدا الاحد يصادف الذكرى الاسبوعيه ل(اليوم العالمى) للضحك .. * والله صحى .. * الأحد الفات افريقيا إحتفلت باليوم العالمى للضحك بمدينه لوممباشى وكان مصدر الضحك في ذلك اليوم هو (حنطور العرضه جنوب) .. * وإحنا بأذن اسبوعيا سنعمل على احياء ذكرى رفاق (ساماتا) .. * ساماتا في قلوبنا .. * لاعب شفت عملها فيهم وخلاهم يتشاكلو .. * ده يقول لداك انت ما بتعرف ترص العلامات ، وداك يقول للتانى انت جبت لينا سواق بص وعملتو مدرب حراس ، والبعض من الاعلام الاحمر السالب يقول غارزيتو باااااع .. * كل الناس ديل تبادلو الاتهامات وما في ولا زول عاقل قال : (ساماتا لعاااب) .. * غايتو جنس غايتو ؟؟ * وعلى فكره .. اليوم العالمى للضحك بيصادف اليوم العالمى ل(البودى قاردات) .. * كل عين ساحره إلا ما قالت (ماشاء الله) .. * حتى عين (ناس البيت) ممكن تسحر (ود البيت) .. * والزول ممكن يسحر روحو .. * وإحنا لا نملك إلا ان نقول : (ماشاء الله ، ماشاء الله ، ماشاء الله عليك يا صهيب يا ثعلب) .. * الثعلب أسم سيبدأ منه تاريخ الهلال الحديث .. * وقبل ايام كنت قد كتبت وقلت إننا في الاعلام نخاف على الثعلب من الغزل ولكن في نفس الوقت (أقلامنا) لا تستطيع ان تكتم إعجابها بموهبته الرفيعه .. * فهو (صغير في السن وكبير في الموهبه) .. * وأخطر ما في الثعلب انه يفعل بالكره ما لا تتوقعه حتى الكره .. * الزول ده لما يهبش الكوره بتحس إنو الكوره مبسوطه .. * مبسوطه منو لكن ما زي إنبساطت شريف نيجيريا من ندى القلعه .. * بالمناسبه دى عندي سؤال .. * هو شريف نجيريا مبسوط من ندى ولا ندى هى المبسوطه من الشريف ؟؟ * المهم .. اثبت الثلعب للناس ان (حاضر الهلال) في آمان ، نقول الحاضر ولا نقول المستقبل لان ثعلوب (دخل الشبكه) بالفعل .. * واكتر زول ممكن يورينا حجم موهبته الثعلب هو (موسى الزومه) الذى (إنطرح وإنجمع وإتخيط) في مباراه الهلال والاهلى .. * الثعلب .. الما شافو ضاع والشافو إتلخم .. * شكرا صهيب على هذا الألق وشكرا كاريكا على هذه الاخلاق والأدب الذى جعلك تتنازل عن (نجوميه المباراه) للثعلب وهذا قطعا لا يحدث إلا في الهلال .. * قالو غارزيتو بعد ما جاب (سواق بص) لتدريب الحراس يفكر الآن في احضار (الكمساري) لمساعدة (السواق) في تدريب (الصفايه جمال سالم) .. * عن اذنكم عايز أضحك .. * ممكن ؟؟ * ههههههههههههههه .. * والله إتذكرت (ريحه المطار) و(الخاتم اللقاهو غارزيتو مدفون في الفاشر) .. * غايتو الزكريات دى بعد مرات بتخلى الزول زي المجنون يضحك براهو .. * بالمناسبه .. في نقطه الناس ما إتكلمت عنها نهائي .. * المريخ لما سافر الكنغو قالو البعثه إتصلت على مجدى شمس الدين (40) مره وما رد عليهم .. * أنا والله ما بلوم مجدى لانو ما رد ولكن بلوم الزول الثقيل البيضرب (40) مره .. * اها قول مجدى رده الحيحصل شنو يعنى ؟؟ * يعنى ساماتا ح يقول الناس ديل مجدى رد ليهم انا ما أجيب فيهم قون ؟؟ * يعرفوكم حناطير كيف ؟؟ * قال ما رد قال ؟؟ * أنا اوريكم مجدى ما رد ليه ؟ * حسب خيالي إنو مجدى ما رد لانو إنتو معاكم (10) بودى قاردات .. * على حس البودى قاردات ديل مجدى ما إتوقع إنكم تعانو او تحتاجو لمساعدات عشان كده ما رد .. * متخيلو ما رد عشان كده .. * وطبعا اى زول حر في (خيالاتو) .. * ان شاء الله اتخيل أمير كمال قاعد في كنبه الهلال إحتياطي لسيف مساوى .. * انا حر .. * اتخيل زي ما عايز .. * وداير أقول حاجه بالمناسبه دى .. * نفسيا لما يقولو ليك (قروش) ما زي لما يقولو ليك (فلوس) .. * كلمة (فلوس) بتحس بيها أبسط من كلمة قروش .. * وكلمة (مال) اريح واعمق من كلمة (فلوس وقروش) .. * وبما ان ذلك كذلك فنحن نقول للأخ أمير كمال الهلال عندو (فلوس وقروش ومال) .. * يبقى يا (اميرون) يا تجى الهلال يا كمان تجدد عقدك مع المريخ ب(4) مليار .. * لو المريخ اداك (4) مليار طوالى بنبارك ليك ، لكن أقل من كده تبقى عوير لو وافقت .. * وعليك ان تعلم يا امير ان المريخ سجل بكري المدينه بأكثر من (3) مليار وبصراحه كده انت بتستاهل ال(4) .. * خليك نجيض واضرب ضربتك وتذكر ان الحياة فرص والذكى هو الذى يستغل الفرص يا امير .. * اللهم قد بلغت فأشهد .. * (تحت تحت) سمعنا وقالو إنو لاعبين المريخ الذين لا يشاركون في المباريات قد إحتفلو بهزيمة الفريق من مازيمبي والله أعلم .. * يبقى طالما (ناكسم إحتفلو) ، من باب اولى إحنا (نموت من الضحك) .. * والله صحى .. * ونركب صافنات ونجيبه (كنغوليه) واصلو الزول بموت والذكرى تفضل حيه .. * و..و.. * وأنا في شخصك بحترم …(الثعلب) ..