* الأطفال في العادة يحبذون (المكاواة) و(المحاكاة) وفي ذلك هم معذورين .. * الأطفال معذورين لان (المكاواة والمحاكاة) تشبع رغباتهم وتشعرهم بالإنتصار .. * الآن الكاردينال يريد ان يكاوينا ب(طارق العشري) * لو في (ضمير بيحس) طارق العشري الواطة ما بتصبح عليهو في السودان .. * والله صحي .. * يفترض ما يصبح في مصر .. * كافالي عندو (كيس) لكن (فاضي) حسب رواية المتخصصين في الأكياس وقد تمت إقالته بعد خسارة ودية إعدادية .. * والعشري ما عندو (كيس) أصلا ومع ذلك الثقة فيه تتجدد بعد كل فشل .. * الكاردينال ربما إقتنع بضرورة الإستقرار في الفني مع هذا العشري .. * الوقت الذي كان فيه الهلال محتاجا للإستقرار نسف الكاردينال الإستقرار والآن من باب (المكاواة) يريد ان يستقر .. * أنا أخشي أخشي ان يكون العشري قد اعطي الكاردينال (من طرف اللسان حلاوة) فصدقه وجدد فيه الثقة .. * الشعب المصري (لسانو حلو) وبيعرف (يكسر تلج) بصورة ممتازة والخوف ان يكون العشري قد (مدح) الكاردينال وتغزل في (كسكتته) فجدد فيه الثقة .. * كل شي وارد .. * واصلا الكاردينال بموت في التلج وفي الناس البيكسروا التلج .. * وشكلو كده بيحب التلج أكتر .. * ولا ما كده يا محمد عبد اللطيف هارون ؟؟ * محمد عبد اللطيف هارون مهمته في الهلال إنحصرت في قيادة (البعثات) .. * شغلو في الهلال رئاسة البعثات .. * ما عندو شغل تاني .. * اي بعثة مسافرة يجيب (بدلتو وكرفتتو ونضاراتو) ويجي يركب .. * ويركب قدام كمان .. * أ تقول بيعرف للهلال حاجة .. * وبعد ده ياريتو لو قادر علي القيادة .. * المهم .. * مرات بحس إنو طارق العشري يمارس كل هذا (الغباء الفني) حتى تتم إقالته .. * غباء فني غير منظور يمارسه العشري وكأنه حديث عهد بكرة القدم والتدريب .. * يمارس الغباء الفني حتى تتم إقالته لانه لا يريد دفع الشرط الجزائي في حال الإستقالة .. * في كل مباراة يصر العشري علي الإحتفاظ بالثعلب وايشيا في الكنبة .. * وحينما يشركهما في الشوط الثاني يحركان اللعب بشكل كبير .. * ورغم هذا لم يفكر العشري مطلقا في (عكس الأية) والدفع بهذا الثنائي اساسيا حتى يكون الهلال (نشطا) منذ الوهلة الاولي وليس في الربع ساعة الاخيرة من زمن اللقاء .. * ثم ان العشري هو الذي طالب باستمرار ايشيا وشطب موكورو .. * حينما طالب بشطب موكورو (حسب الرواية) كان وقتها ايشيا إحتياطيا .. * وبعد شطب موكورو ظل ايشيا احتياطيا مع العلم بأن موكورو كان اساسيا في جميع المباريات .. * مسكين العشري الذي يطبق وينفذ بيانا بالعمل مقولة (خادم الفكي مجبورة علي الصلاة) .. * مصلحة الهلال تتطلب ذهاب العشري الذي فشل فشلا مذهلا .. * العشري يرهق الهلال ماليا دون ان يقدم اي لمحة فنية حتي الآن .. * والكاردينال الذي كان قد أعلن انه يمكن ان (يشيل مدرب كل 24 ساعة) يتفرج الآن في العشري الفاشل .. * نعم قروش العشري يدفعها الكاردينال ولكن الرجل قال في حواره مع قناة (النيل الازرق) ان واحدة من اسباب شطب المحترفين (إقتصادية) .. * يبقي برضو شيل العشري لاسباب اقتصادية .. * مع إنو العشري من ناحية فنية المفروض يمشي بعد مباراة الأهلي الليبي مباشرة .. * قال حافظ الكرة الليبية قال !! * والله أنا خايف العشري ده يكون الكرة المصرية ما حافظها .. * العشري لاسباب فنية بيمشي ولاسباب اقتصادية بمشي ولاسباب انسانية برضو بمشي .. * يعني سبب واحد بيخليهو قاعد ما في .. * لا دارين سيكافا ولا دارين كاس العرب .. * السنة دي الممتاز وبس .. * ولو لقيتو طريقة إنسحبوا من كاس السودان برضو .. * الهلال بشكله الحالي لا يقوي المشاركة في أكثر من بطولة .. * يجب ان يركز الفريق في بطولة واحدة حتى لا يخرج من المولد بدون حمص .. * إذا شارك الهلال في سيكافا ولا قدر الله خرج من الدور الاولى ستتحرك الرمال من تحت أقدام الكاردينال .. * والهلال حاليا لا يحتمل جرح جديد .. * يعني ما عشان (تنسينا خيبة الأبطال) تقوم تشارك في سيكافا .. * انت ما عندك ضمانات تأكد ان الفريق سيحقق نتائج إيجابية في سيكافا .. * يبقي ما في داعي تشارك عشان تجرحنا في جرح لسه ياهو بينزف .. * اصلا ما في داعي .. * الناس لما تشارك في بطولة (بدل فاقد) يكون ذلك بسبب سوء الطالع الذي لازم الفريق في البطولة الرئيسية .. * ولكن الهلال ما عندو مشكلة في الطالع .. * ما عندنا سوء طالع .. * إحنا كعبين عديل .. * وبهذا المستوى لن نحقق اي شي في سيكافا .. * هذا بخلاف ان سيكافا تنقص من قدر الهلال .. * وفي حاجة مهمة يا الكاردينال .. * الحنك بتاع إنو البطولة دي بتجهز اللاعبين وبتجهز الشباب ده حنك ميت .. * لانو اصلا في شهر خمسة وشهر اطناشر انت ح تشطب (نص الفريق) الحالي .. * والتجربة في السودان اثبتت إنو حكاية الإحتكاك والتجهيز هي (كلام فارغ ساكت) .. * اللاعب السوداني ما قاعد يستفيد من الاحتكاك ولا بيستفيد من الخبرة .. * داير تدي الشباب خبرة خليهم يشاركوا في الممتاز وبس .. * ونحنا ما ناقصين وجع رأس وهزائم جديدة .. * الفينا مكفينا .. * بلا سيكافا بلا لخمة .. * سيكافا بتشبه المريخ والمريخ بيشبه سيكافا .. * والحاجات البتشبه المريخ مستحيل تشبه الهلال .. * المريخ سقط بالتعادل أمام الوفاق أمس .. * وهي بداية الخروج .. * وسيلعب المريخ مباراتين في الكونفدرالية ويخرج بعدها لتنيظم سيكافا او المشاركة في دورة (دبي الرمضانية) .. * بطولة ما مشى فيها الهلال المريخ ما بيمشي فيها .. * والله صحي .. * و..و.. * وقلنا ما ممكن تسافر ...(انت هنا متعادل 2-2) !! *