بالعربي الكسيح محمد الطيب الأمين مشكلة الكاردينال في (أصبعو) فهل (يُحننه) ويريحنا ؟؟ * قالوا في إمتحانات الشهادة السودانية ورد سؤال يقول : (أذكر أسماء الخزانات بالسودان) ؟؟ * في واحد من الطلاب كتب الإجابة : خزانات (النخلة) و(تقيا) .. * والله صحي .. * وهسه إحنا في الهلال عندنا (النخلة) وعندنا (تيقا) .. * أما المريخ فهو زاخر ب(النخيلات والتيقات) .. * وأنا ما بفسر وانت ما تقصر .. * أعراض (الفلس) عند كل الناس بتظهر في الأتي : (زهج ، غضب ، كواريك ، نوم في البيت) .. * تقريبا دي أعراض الفلس .. * لكن الفلس عند تراوري بيظهر في (الأنكل) .. * تراوري أول ما يشكي من الأنكل ويطلع من التمرين يفترض بدل تودوهو رويال كير تودوهو أقرب صراف آلي .. * في النهاية الزول ده ولدنا وإحنا بنعرف (البيوجعو شنو) .. * زي شيبوب .. * ناس المريخ كانوا بيقولوا شيبوب عندو رباط صليبي وفي النهاية طلع بيحب الهلال من طرف واحد .. * الموضوع ما كان رباط صليبي .. * كان حب .. * والحب في أوقات بيكون زي الرباط الصليب .. * والله صحي .. * والحمدلله الكاردينال حقق لشيبوب رغبته وكلها (33) يوم وشيبوب يرتدي الشعار الأزرق .. * وتبكو بس .. عين قطرة وعين مس .. * قبل أيام كتبنا في هذه المساحة سلسلة من المقالات عن واقع الحال في الهلال .. * وكانت لنا وقفة جوهرية فيما يتعلق بالقائد المعتزل هيثم مصطفي .. * كتبنا عن هيثم من خلال معطيات (حقيقة) توفرت لنا من مصادر عالية الثقة ، وقد شكك البعض فيما ذهبنا أليه بينما صدق الكثيرين ما كتبنا .. * والحمدلله الحقيقة ظهرت بعد (72) ساعة فقط من اخر (عمود) تم نشره في هذه المساحة .. * أصدر الكاردينال قرارا شجاعا بتحويل هيثم لقطاع الشباب وهو قرار كان يجب ان يكون منذ الوهلة الأولي .. * من الأول هيثم بدل يجي الفريق الاول كان يتم تعيينه في قطاع الشباب .. * الكاردينال يقع في أخطاء متعددة ولكنه سريع المعالجة وهذا يحسب لصالحه رغم ان تكرار الخطاء لا يحسب لصالح المخطئ .. * يعني يا الكاردينال كونك تشطب أبيكو دي (معالجة سريعة وكويسة) وتحسب لصالحك ، لكن كونك السنة الجاية تجيب زول زي أبيكو ده (تكرار للخطاء) وبالضرورة يخصم منك ومن تجربتك .. * المهم .. * علي المستوي الشخصي تجدني أنظر باعجاب شديد للكاردينال وهذا الإعجاب سببه الأموال الطائلة التي دفعها من اجل (الجوهرة الزرقاء) .. * ما يقوم به الكاردينال يعتبر عملا نبيلا يثبت محبة الرجل الكبيرة للهلال ولجمهور الهلال .. * هذا لا شك فيه .. * ولكن إنتقادنا للكاردينال سببه انه في كثير من المرات يختار (أكبر اصبع) من (اصابعه الخمسة) ثم يطبظ به عينه في عملية تشبه (الإنتحار) .. * وقد يكون هنالك من يحرك (أصبع الكاردينال نحو عينه) ولكن يفترض الكاردينال يمنعه لان الأصبع أصبعه والعين عينه .. * الأصبع أصعبك والعين عينك يا كاردينال فلا تسمح لاي انسان ان يطبظك باصبعك .. * ولابد للكاردينال ان يفهم جيدا ان (الإقالة والشطب) لن تكون حل للمشاكل .. * يعني شهر خمسة يفترض نجيب محترفين هم يشردوا مننا بدل ما نشرد منهم إحنا .. * والله صحي .. * دايرين لينا محترف زي (زولو) .. * محترف يشرد مننا عديل .. * كل سنة إحنا بنشرد من المحترفين لانهم (عطالة ساكت) .. * والقصة دي يا الكاردينال والله ما صعبة .. * كل المطلوب منك تجيب واحد من قدامي اللاعبين وتخليهو يرصد ليك الدوريات العربية والإفريقية وحتى العالمية .. * يكون متابع وشايف .. * لا (سي دي) ولا (كاسيت) .. * لاعب ترصدو وتتابعو ولو دعت الضرورة تسفر زول يتابعو من داخل وطنه .. * القصة ما صعبة .. * والسماسرة ديل لو قعدت تباريهم كده ما بتكمل (خريفين في الهلال) .. * انت يا الكاردينال ما شاء الله عندك قروش وربنا يزيدك والحمدلله ياهو اشتغلت شغل في الجوهرة الزرقاء (خرافي عديل) .. يلا مهم جدا إنك تكون حريص علي قروشك وتكون حريص إنها ما تمرق إلا للبستاهلها .. * القروش تمرق للبستاهلها .. * بعدين في حاجة .. * انت شطبت كل المحترفين ما عدا إيشيا .. * وحكمة الله إيشيا هو المحترف الوحيد الما قاعد يلعب .. * طيب انت ما شطبت ايشيا ليه ؟؟ * عشان لعاااب ؟؟ * عدم شطب ايشيا اقرار بانه لعاااب .. * طيب كويس .. * ايشيا ما كان قاعد يلعب ليه ؟؟ * قاصدنو ؟؟ * ولا صغير في السن ؟؟ * كونك ما تشطب ايشيا ده إعتراف صريح بانه لعااب ومظلوم .. * يبقي سؤالنا ليك : (الظالمو منو) ؟؟ * الغريب في الأمر الهلال لما يجي يشطب بيشطب من جوة التشكيلة بعد داك بيجي علي الإحتياطي .. * والحاجة دي ما قاعدة تحصل إلا في السودان .. * في الشطب البداية بتكون من الكنبة بعد داك بتشوف الأقل مستوى في التشكيلة بتشطبو .. * لكن عندنا هنا بنبدأ بالتشكيلة بعد داك بنشطب من الكنبة .. * ومرات بنشطب من التشكيلة بس وبنخلي ناس الكنبة .. * وناس الكنبة الما شطبناهم السنة دي السنة الجاية بيكونوا هم ناس التشكيلة وآخر الموسم بنشطبهم عشان الموسم البعده ندخل ناس الكنبة التشكيلة وهكذا تدور الساقية .. * المهم .. * ولو جيت للجد يا الكاردينال موكورو ما بنشطب .. * ما بنشطب مش لانو هو (منقطها) .. * لا .. * موكورو ممكن يكون عادي بس ما كعب .. * أهلنا بيقولوا ليك : (ما أبوك لكن بربيك) .. * وموكورو اثبت نجاح كبير في الدوري المحلي .. * صحيح إحنا ما جبناهو للدوري المحلي .. * جبناهو للابطال اي عارف .. * لكن كمان وكت فشل في الابطال نخليهو ينجح لينا باقي الموسم ده وشهر اطناشر عليه يسهل وعلينا يمهل .. * مكورو شارك في جميع مباريات الهلال الرسمية والودية .. * ما غاب ولا مباراة .. * كان كعب في ثلاث مباريات وهى مباراة الاهلي الليبي (ذهاب واياب) ومباراة (النسور) .. * كل المباريات شارك .. * والحصل .. شطب موكورو وتجديد الثقة في ايشيا الما لعب اصلا .. * ويجي العشري (الما بخجل) يقول ليك : انا أطالب باستمرار ايشيا .. * طيب مالك ما كنت بتلعبو ؟؟ * غايتو جنس غايتو !! * عموما .. السقوط من الابطال جعل الكاردينال يسير الآن في الاتجاه الصاح .. * ومن حقه علينا ان نساعده بالكلمة الطيبة حتي ينجز ما وعد به .. * ومن حقنا عليه ان يستمع لأهل الهلال الذين لا غرض لهم ولا مصلحة بخلاف (سيد البلد) .. * وكل من يخدم كبير البلد سنساعده بالصفقة والموية الباردة والكلمة الطيبة لاننا نحب كيان ولا نحب اشخاص .. * ولا نفرق بين الكاردينال والصحاف إلا بدرجة حبهم للهلال .. * وبعد قرار (سيدا) ده ممكن نرفع ليك (الكسكتات) تعظيم سلام يا كاردينال .. * ونبشرك إنو الهلال ح يمشي صاح .. * ولا يصح إلا الصحيح .. * و..و.. * وجناي البريدو أحضر جديدو وأحننو في …(أصبعو عشان ما يطبظ عينو) !!