بالعربى الكسيح محمد الطيب الكورة من كراعو بتطلع زي (البخة) من فتيل الريحة !! * أمبارح الهلال إتخيل (مريخ الفاشر) هو (مريخ العرضة).. * وفتحو ليكم فيهم.. * وبصراحة كده ناس الهلال معاهم حق.. * لأنو مريخ العرضة من مريخ الفاشر بيقينا ما بنفرزو إلا ب(العارف عزو مستريح).. * نفس الملامح والشبه و(العجب) ذاتو و(حسبو) ذاتو..
* ونفس الاسم ونفس الشعار العامل زي (كسبولات النزلة).. * وناس الهلال تشابه لهم (الحمام).. * إتخيلوا المريخ داك هو المريخ ده.. * وضربو (4)، هدف ينطح هدف.. * هسه عليك الله في فريق عاقل بيلعب قدام الهلال وهو لابس (احمر)؟؟ * اللون الأحمر ده في (تياب الشيلة) خلو.. * بقو يجيبو تياب ب(لون زينب).. * الروج زاتو بقى ما احمر.. * خليك من الروج، الكركدي زاتو لونو بقى (بصلي).. * المهم في الموضوع ده إنو الحصل امبارح ده (مناظر ساكت).. * دي المناظر يا مولانا.. * والفيلم قدام.. * الغريق قدام يا عزو.. * دي (قيدومة) والزفاف ح يكون مع (الاحمر الكبير) والحفلة باحمد الصادق.. * عشان يجى يغنى لينا: (ما شاف حاجة لسه ودي المناظر الاولى).. * دى المناظر الاولى يا محسن سيد.. * يا محسن عليك الله الهلال الشافتو عينك أمبارح ده بنقدر؟؟ * هلال هجومو زي (مطر الليل) ماشاء الله وتبارك الهلال.. * ومطر الليل طبعا ما بتعرفو (جاي من على وين).. * البرق يشلع من (غرب) والمطرة تصب من (الشمال).. * امبارح سيسيه يبدأ الهجمة من (اليمين) ونزار حامد يختمها ب(الشمال).. * حيرو ليك (خالنا العجب زاتو).. * العجب قرب يقول ليهم: (يا جماعة إحنا مريخ الفاشر ما مريخ عزو).. * والله ما رضيناها ليك يا عجبكو.. * ما تستاهل (المرمطة دي).. * العجب كل ما يشوف نزار حامد بيتذكر شبابو.. * وامبارح نزار بسم الله ماشاء الله.. * طول وعُلا.. * نزار الكورة بتطلع من (كراعو) زي (بخة العطر) من (فتيل الريحة).. * إتعطرنا أمبارح.. * عطر السرور.. * اهداف الشوط الاول التلاتة نزار حامد كان عندو فيها (بصمة).. * بصمة ما زي بصمة فييرا.. * نزار شارك في الهدف الاول وسجل الهدف التانى وساهم في صناعة التالت.. * ولو ما بخاف الكضب بقول نزار صنع هدف الجزولي الرابع مع إنو الوكت داك نزار كان في الكنبة.. * والعطر الذى خرج من (قدم) نزار اكمله سيدى بيه في الحصة التانية.. * قدم سيدي بيه عرض راقى وكورة بتشبه (كورة الدكاترة).. * والهلال يا جماعة شكلو بيكون كده لما يلعب بصانع لعب.. * اى مباراة يلعب فيها الهلال بصانع لعب شكل الهلال بيكون ظريف زي امبارح كده.. * والكلام ده قلناهو لما فترنا من القول.. * امبارح عاكف عطا إتوفق في المباراة دى بشكل كبير وادارها بذكاء وفكر عالى.. * هذا إلى جانب ان عاكف تعامل بشجاعة مع اللقاء خاصة فيما يتعلق ب(التبديلات) التى تمت في الحصة الثانية.. * قد يكون مهند لم يشكل الاضافة المطلوبة ولكن في الاخير عاكف حاول يمنح الفرصة ل(مظاليم الهوى) فكان الجزولى ووليد الذى لم يسعفه الزمن.. * مباراة الامس اكدت تماما ان (الهلال بمن حضر).. * القاعد بيلعب والهلال هو الهلال.. * يسعدنا معاوية فداسي بقوته وجسارته هذه الايام رغم رأينا فيه.. * معاوية فداسي خذل الهلال في عشرات المباريات ولكنه الان يقدم مستويات تستحق الاشادة.. * اما سيسيه (نجم المباراة) ونيلسون والشغيل وديفيد ومالك وبكرى فهم فرسان لا يزيدهم المدح شيئا.. * كل المطلوب ان يدرك كاريكا انه ليس كاريكا الزمان.. * قناعتنا ان مدثر هو احرف مهاجم سوداني.. * ولكن موهبة كاريكا وامكاناته الكبيرة تتلاشى مع هذه الفلسفة التى تعلمها مدثر حديثا.. * كاريكا يتفلسف وهو في الاصل لا يحتاج لهذه الفلسفة لأنه فيلسوف وزول فنان.. * ألعب كورتك يا (كركر) البتعرفها والبنعرفها إحنا وسيكون التألق من نصيبك بأذن الله.. * ما تكبر اللفة ولا تكتر التوم والشمار.. * خليك عادي عشان ترجع كاريكا زمان.. * المهم.. * لو النيلين بتنقل مباريات الهلال دي ناس المريخ بنسحبو.. * ما بقدرو على الشغل ده.. * الهلال بشكلو الحالى وبتشكيلة الامس ممكن يفرتق المريخ والشمس فوق.. * بنخلي المريخ في حتة وعزام في حتة.. * والحالة امبارح بشة ما لاعب.. * ده كلو وبشة ما في.. * يعني بمشاركة بشة ممكن جمال سالم تانى يوم يرجع بلدو ومحسن سيد يستقيل وبرهان تتم إقالته.