* أكثر ثلاث عبارات ستكون متداولة اليوم وسط جمهور المريخ هي : (نهواه في كل الظروف) و (المريخ طار مرفوع الرأس) و(المريخ ما زال في التنافس الأفريقي) .. * ولكن الحقيقة التي لا تقبل الجدال هي : ( المريخ طار أمام فريق ترتيبه في الدوري يضاهي ترتيب النسور عندنا) .. * في كل عام المريخ بيشارك في الأبطال (صحبة راكب) عشان يطير بينما (الراكب) يواصل المسير .. * وفي هذا العام (الراكب) الذي هو الهلال طار فكان من الطبيعي أن يلحق به (الصاحب) .. * عموماً .. نبارك للشعب الجزائري الشقيق هذا التأهل رغم ظروف فريقهم (التعبان) ونعلم أن الوفاق لو كان في يومه لجدد لنا ذكريات الحبيب إلى قلوبنا الأخ الفاضل (شلباية يوسف شلباية) .. * غايتو جنس غايتو !! * هيثم مصطفى في تاريخه الذي امتد ل(17) عاماً مع الهلال أشرف على تدريبه حوالي (12) مدرباً .. * وصهيب الثعلب في تاريخه مع الهلال والذي امتد ل(17) شهراً أشرف على تدريبه حوالي (19) مدرباً .. * عدد المدربين في سبعة أشهر يتفوق على عدد المدربين في (17) سنة .. * وبما أن ذلك كذلك يبقى من باب الاحتياط لازم نشوف (صباع أمير) للمدرب الروماني بيلاتشي .. * والله صحي .. * بيلاتشي ده لو دايرنو (يثبت) في الهلال إلا تعملوا ليهو (صباع أمير) .. * (صباع أمير) أو (نوكرين) .. * حاجة تكسف .. * ونحن في قمة الانفعال مع الأحداث الهلالية الساخنة يضحكنا أبو جريشة كثيراً .. * أبو جريشة في شكوى تقدم بها لمراقب المباراة قال فيها : (إذا قامت جماهير الوفاق بإطلاق شمروخ واحد سننسحب من الملعب) .. * شمروخ دي حلوة علي بالقسم .. * حلوة منك .. * قال بينسحب قال .. * أنت مش بتنسحب من الملعب أنت بتسقط من الأبطال يا مولانا .. * ناس المريخ فاكرين الأبطال زي سيكافا وزي البطولات الوهمية البينظمها جمال الوالي .. * فاكرين الأبطال زي حوض النيل .. * ومعذورين طبعاً .. * معذورين لأنو سيكافا خربت طبعهم .. * الأبطال أصلاً هي بطولة أكبر قامة من المريخ .. * الظروف هي التي جعلت المريخ (يمد كراعو أطول من لحافو) والغلط ما غلط المريخ الشارك في الأبطال الغلط غلط الظروف التى أتاحت للمريخ المشاركة في بطولة كبيرة زي دي .. * قالوا مراقب المباراة لما قرأ الشكوى أخد ليهو ضحكة لما عيونو دمعت .. * لكن المراقب إتعامل مع الشكوى باعتبارها شكوى جاية من فريق (برلوم) .. * إتعامل معاهو حسب فهمهم .. * أنت يا أبوجريشة من حقك تطالب بتحكيم محايد ومن حقك تطالب بتأمين وحماية لأفراد البعثة لكن ما من حقك تهدد بالانسحاب .. * بعدين ياخ الشعب الجزائري ده بيحبنا وإحنا بنحبو وبراكم بشلاليت ناس علاء الدين يوسف خربتوا علاقتنا مع الجماعة ديل .. * وفي النهاية ياهو طرتو.. * يعني ما كان في داعي للمساخة و(خراب الوش) .. * طيران المريخ ما عايز شماريخ .. * الشماريخ الفي دفاع المريخ أكعب من شماريخ المدرجات .. * والله صحي .. * المهم .. * احترام مدينة عطبرة للهلال لم يأت من فراغ .. * واحترام عطبرة للهلال أيضاً له أسبابه .. * عطبرة بتشبه الهلال والهلال بيشبه عطبرة .. * وللهلال ولعطبرة مواقف للتاريخ كل في مجاله .. * ولذلك عطبرة سعيدة ومحظوظة باحتضان الهلال لأسبوع كامل .. * طبعاً يا جماعة ده لو كان المريخ ما بقدر يقعد في عطبرة أسبوع .. * والله صحي .. * وبراكم ح تشوفوا المريخ لما يمشي عطبرة .. * ح يلعب المباراة الأولى وح يجي يعسكر في الدامر على أن يعود بعد ثلاثة أيام لعطبرة مجدداً .. * ناس عطبرة ما بيحبوا المريخ .. * ودجي حاجة من الله .. * قسمتكم كده .. * وقسمة الزول ما بتفوتو .. * وفي النهاية العارف عزو مستريح .. * عزو ب(الخا) .. * انفعال جمهور الهلال وتجاوبه الكبير مع قضية اللاعب عبد اللطيف بوي بالأمس يؤكد أن لهذا النجم محبة كبيرة في قلوب الجمهور العاشق لهذا الكيان .. * جمهور الهلال يحفظ لبوي كل تضحياته ومواقفه الكبيرة مع الهلال .. * وبالمناسبة .. ما سردناه بالأمس مصدره ليس عبد اللطيف بوي .. والله على ما أقول شهيد .. * وقبل بوي كنا قد تحدثنا عن مكسيم وقد كذبنا البعض ومع الأيام ثبت أن مكسيم يعاني من مشاكل ولم يزل .. * قلتها من قبل وأرددها اليوم : (الكاردينال يعاني من عدم توفيق عجيب يجعله يدهس كل الإشراقات دون مبرر) .. * وأقسم بالله أنا لا أخاف من شئ بقدر خوفي من أن تسقط الجوهرة فوق رؤوس الجماهير .. * عدم التوفيق الذي يصاحب مسيرة الكاردينال يحتاج لوقفة من الكاردينال ويحتاج منه أن يراجع مصدر وأسباب عدم التوفيق لأن بعض الأسباب هذه عندها علاقة بالنية والنفس والشلة والمقصد .. * قالوا إن مدرب الهلال الروماني قد طلب من مجلس الإدارة كتابة السيرة الذاتية لكل لاعب .. * ونحن نقول للكوتش : يا كوتش السيرة الذاتية بتاعت اللاعبين هينة كده أنت شوف السيرة الذاتية بتاعت أعضاء مجلس الإدارة وتحديدًا السيرة الذاتية بتاعت محمد عبد الليف هارون .. * إذا أراد الكاردينال استمرار المدرب الروماني عليه أولاً إقالة محمد عبد اللطيف هارون .. * بالنسبة لينا محمد عبد اللطيف هارون مكشوف وجا العشري وكشفوا زيادة .. * وزي ما العشري (كيسو فاضي) برضو محمد عبد اللطيف (كيسو فاضي) .. * ولا كمان حكاية الأكياس الفاضية دي حصرية على المدربين ؟ * غايتو جنس غايتو .. * بالمنطق كده ما ممكن الهلال يطير والمريخ يستمر .. * لكن بالمنطق ممكن المريخ يطير والهلال يستمر زي ما قاعد يحصل كل سنة .. * وطيران المريخ بالأمس هو (العادي) وتأهله لا قدر الله كان سيكون أمراً غير عادي. * كده يا حبايب باقي ليكم مباراتين في الكونفدرالية وبعد داك كل زول يشوف سيكافتو وين .. * مباراتين اتنين في الكونفدرالية تعالوا بعدها نظموا لينا سيكافا زي كل سنة .. * في مريخابي قال لي المريخ طار بشرف .. * شرف منو ؟؟ * شرف شيبوب ؟؟ * قال شرف قال ؟؟ * المريخ ما طار بشرف والمريخ طار ب(عبد المنعم جابو) .. * والله صحي .. * جابو لما جاب القون هنا المريخ طار .. * وبصراحة وفاق سطيف أمبارح فقد جهود أمير كمال .. * أمير كمال بالنسبة لوفاق سطيف لا يقل عن عبد المنعم جابو .. * عبد المنعم بيجيب قون وأمير كمال بيجب قون .. * وكلام يا عوض دكام .. * و..و.. * ومنايا ليك ما وقف وإتمنيت أنا ...(تقابل مازيمبي في الكونفدرالية) ..
