* مثل (الشعرة من العجين خرج الهلال من عطبرة سالماً وغانماً) .. * كنا نظن أن خروج الهلال من عطبرة غانماً هو أشبه بخروج (الحِنة من ضفر العروس) ولكنها قوة الإرادة .. * وتبقى هذه أغلى ست نقاط لأنها جاءت في وقت سماء الهلال فيه مُلبدة بكثير من الغيم .. * نبارك لنجوم الهلال هذه (الرجاله) ونبارك لجمهور عطبرة هذا (الأدب) و(الذوق) .. * عطبرة لا تعرف (البُمبان) في حضرة الهلال .. * قال ليك الناس في عطبرة أول ما يعرفوا المريخ جاي عطبرة طوالي بيجيبوا (صفق شجر النيم) عشان يخفف عليهم (البُمبان) .. * والله صحي .. * البُمبان عشان ما يأثر معاك لازم تعمل صفق النيم في وشك .. * وإحنا على بالنعمة عارفين أي حاجة .. * عارفين البُمبان وعارفين المريخ قبل ما يسمو مريخ كان اسمو (نجمة فكتوريا) .. * يعني المريخ هو لقب وليس اسم .. * زي عندك مثلاً (الثعلب) ده .. * الثعلب اسمو (صهيب) لكن لقبو هو (الثعلب) .. * ومثلاً عندك (شيبوب) .. شيبوب اسمو شرف لكن لقبو هو (عبرت) .. * وعلاء الدين اسمو علاء الدين لكن لقبو (بصمة) .. * جمال الوالي اسمو جمال الوالي لكن أولاد حلتنا بيقولوا عليهو (عزو) .. * نفس الفهم .. المريخ اسمو نجمة فكتوريا لكن لقبو هو (المريخ) .. * يعني أنا عايزك تفهم حاجة واحدة إنو الفريق ده اسمو نجمة فكتوريا ولقبو المريخ وتحت تحت بيقولوا عليهو (الضل) .. * غايتو جنس غايتو !! * الذكرى في العادة هي أطول من العمر سوى كانت ذكرى جميلة أو عكس ذلك .. * وأسوأ ذكرى يحمل إنسان عن السودان هي ذكرى النجم المهذب سيسيه .. * سيسيه يعيش واقعاً تعيساً منذ شطبه من الهلال وحتى تاريخ اللحظة .. * سيسيه شطبه الهلال ولم يمنحه حقه وظل يطارد (إداريي الغفلة) بالهلال عبر الهاتف ولا يردون على مكالماته وهذا لعمري أمر مؤسف ولا يشبه الهلال .. * الكلام ده عيب يا الكاردينال .. والله عيب .. * عيب سيسيه يأكل من جيبه الخاص وحقوقه بطرف الهلال وجوازه بطرف الهلال .. * عيب والله يا الفاضل .. * الحاجة دي لا بتشبه الهلال ولا بتشبه القيم والأخلاق السودانية .. * ياخ أنت شطبتو يفترض تديهو حقو زي ما أديت ناس مكورو والباقين .. * بالجد الكلام ده شين في حق الهلال والله العظيم .. * سأعود لهذا الموضوع غداً ولكن أتمنى أن تحل مشكلة اللاعب اليوم لأنها حتى ليلة أمس لم تحل .. * نرجع ونقول .. * لو لم يكن يونس الطيب واثقاً من نفسه وإمكانياته لما تمكن من المحافظة على شباكه نظيفة في ثلاث مباريات .. * أربع مباريات اهتزت شباكه مرة وحيدة وهو رقم يمكن أن نعتبره انجازاً بالنسبة للاعب ظل حبيساً في الكنبة لأكثر من عامين .. * بعد هذا المستوى الطيب ليونس الطيب لا خوف على مرمى الهلال فقط نرجو أن نشاهد اعتباراً من المباراة القادمة الحارس العملاق مكسيم .. * أنا أخشى أن يصبح مكسيم معانا بجسمه بينما قلبه بعيد بسبب سوء المعاملة .. * كل المطلوب إحسان التعامل مع هذا النجم الكبير فهو من النادرين جداً في أفريقيا من حيث المردود الفني ومن حيث الأخلاق .. * بمناسبة الأخلاق .. * لحدي الآن الهلال قاعد يلعب بثعلب واحد .. * الثعلب التاني (بشه الصغير) قاعد في الكنبة .. * يعني تشكيلة الهلال لو بقت فيها (ثعلبين) القصة بتبقى ما أخلاقية .. * بتبقى ما إنسانية .. * نلعب بثعلب واحد والثعلب التاني بنخليهو لليوم الأسود .. * وفي الحقيقة هم ما ثعلبين، بل هم مجموعة ثعالب .. * الرديف بتاعنا كلو ثعالب .. * ورغم (الظلام) الذي إجتاح ديار الهلال في أعقاب السقوط من الأبطال إلا أن القادم بإذن الله سيكون أحلى .. * الهلال عندو (بذرة صالحة) فقط يحتاج لتربة نظيفة .. * والتربة ح تنضف لو الكاردينال سمع (الكلام الببكي) وقفل أضانو من (الكلام البضحك) .. * الشباب الفي الهلال لا مثيل لهم في السودان .. * (العشري الكيسو الفاضي) قال : لا يوجد فريق في أفريقيا يملك مثل الشباب الذين يملكهم الهلال .. * العشري قال ذلك وهو (زعلان وهارب) .. * يعني قال الكلام ده بعد ما هرب من الهلال .. * وما قاله حقيقة ستظهر مع الأيام، اللهم إلا إذا الكاردينال عكس ذلك .. * والله يا جماعة أنا هروب العشري ده مزعلني من جووووووه .. * عليك الله زول (متواضع) زي ده يهرب مننا ؟ * ده الزول الوحيد الكان المفروض تتم إقالته قبل شهر .. * زول زي ده ما كان نديهو شرف (الاستقالة) .. * ده نديهو (إهانة الإقالة) لأنو بيستاهل .. * المهم .. * مازيمبي ثقيل ثقالة شديدة .. * قول لي كيف ؟ * والله صحي .. * مازيمبي عرف إنو المريخ هبط الكونفدرالية قام هو ذاتو هبط .. * ودي زي الزول لما يكون داير معاك مشكلة، يشوفك نزلت من حافلة المواصلاwت هو ذاتو ينزل معاك .. * هسه مازيمبي شاف ناس المريخ نزلوا من الحافلة هو ذاتو نزل معاهم .. * وبصراحة المريخ دخل في حتة ضيقة .. * المريخ لا عرف يستمر في بطولة الأبطال ولا هسه قادر يستحمل فكرة الكونفدرالية الفيها مازيمبي .. * وفي النهاية سينتهي المطاف بالمريخ في سيكافا .. * وسيكافا لو شارك فيها الهلال بالرديف يبقى المريخ إلا ينظم ليهو بطولة زي بتاعت (حوض النيل) ديك .. * أنا البيعجبني في ناس المريخ إنهم ناس (منظمين) وبيحبوا التنظيم .. * يطلعوا من الكونفدرالية بينظموا سيكافا، يطلعوا من سيكافا بينظموا (حوض النيل) ، يطلعوا من حوض النيل بينظموا (حوض البط) .. * ده نادي منظم وإستادو (حكومي) .. * ده نادي (لوحتو صفراء) يا مولانا .. * ده نادي طلع من الأبطال مرفوع الرأس .. * قال المريخ يودع الأبطال مرفوع الرأس .. * طيب والهلال لما ودع الأبطال كان خسران بالسبعة ولا شنو ؟ * لما طلع من الأبطال كنا غالبين ولا كنا مغلوبين بسبعة شلبياية ؟ * بعدين حكاية مرفوع الرأس دي ما بتشفع ليكم .. * إنتو شاركتوا من أجل رفع الرأس ولا شاركتوا من أجل الاستمرار في البطولة ؟ * قصة مرفوع الرأس دي بنعرفها لما تقابلوا مازيمبي .. * لما تقابلوا الخال بنعرف رأسكم مرفوع ولا ما عندكم رأس .. * وطبعاً إحنا الفريق المغربي ده ما بنحسبوا .. * فريق (البراقش) ده ما محسوب .. * فريق متزيل الدوري المغربي وبيلعب بدون (كنبة احتياطي) .. * عندهم حداشر لاعب وبس .. * عشان كده قلنا الأبطال زادها موية .. * والله يا جماعة وأنا ما بقول الكلام ده عشان الهلال طار لكن بالجد الأبطال مما بقى يشارك فيها المريخ زادوها موية .. * بطولة يشارك فيها المريخ دي بطولة رخيصة ساكت .. * البطولة دي ما بتشبه المريخ ولا جاية معاهو عشان كده كان من الطبيعي أن يغادر أمام الوفاق (الضعيف) .. * مرات الكلمة الشاذة بتتعرف من الوهلة الأولى .. * والمريخ في الأبطال كان كلمة شاذة .. * والحمدلله وفاق سطيف طلع الكلمة الشاذة .. * وعقبال (براقش السجمان) يطلع لينا الكلمة الشاذة من الكونفدرالية كمان .. * و..و.. * وأنا في شخصك بحترم ...(الثعلب) ..