* شعار الهلال هو : (الله الوطن الهلال) .. * ده الشعار الذي اشتهر به الهلال على مر التاريخ .. * وشعار الهلال الذي ظهر حديثاً هو : (ارفع رأس أنت هلالابي) .. * كونك تكون هلالابي فهذا يكفي أن (ترفع رأسك) حتى لو كنت (خجول) .. * (الهلال) مبرر كافي لرفع الرأس .. * وطبعاً من الحرج أن تسأل عن شعار المريخ .. * أنا والله بصراحة مما عرفت المريخ ده ما سمعت ليهم شعار .. * وأصلاً أنا عرفت المريخ بعد ما بقيت كبير .. * في حاجتين أنا عرفتهم بعد بقيت كبير : (المريخ وعصير القصب) .. * زمان ما كنت بعرف المريخ ولا بعرف عصير القصب .. * ما كنت متوقع إنو القصب ممكن يبقى عصير .. * والله صحي .. * ما كنت فاكر إنو العلم ممكن يتطور لدرجة إنو القصب يبقى عصير ونجمة فكتوريا تبقى مريخ .. * المهم .. * المريخ ما عندو شعار .. * لما تجي تقرأ (لافتة نادي الهلال بتشوف الهلال مكتوب ومرسوم وتحت الرسم بتقرأ الله الوطن الهلال) * ولما تشوف (لافتة المريخ) ما بتلقى شعار مكتوب والله أعلم .. * اللهم إلا يكون شعارهم هو : (نهواه في كل الظروف) .. * شعارهم : (نهواه في كل الظروف) أو (العارف عزو مستريح) .. * واعتقد أن (العارف عزو مستريح) هو أنسب شعار بالنسبة للمريخ .. * اعتقد ذلك .. * وأي زول طبعاً حر في (اعتقاداتو) .. * أمبارح المريخ أمام الخرطوم الوطني حافظ على (الرأس المرفوع) .. * ورفعت الرأس دي بدت مع المريخ في الجزائر أمام وفاق سطيف .. * في الجزائر المريخ ركز على (رفع الرأس) ووفاق سطيف ركز على التأهل .. * وفي النهاية الفريق الجزائري تأهل والمريخ طار .. * وأمبارح برضو المريخ دخل المباراة بخطة (رفع الرأس) .. * الخطة اسمها : (ارفع رأسك وخلي اليحصل يحصل) .. * وهذه خطة بلجيكية استفادت منها بلجيكا في كأس العالم وفي كثير من البطولات والمناسبات .. * وبصراحة نجوم المريخ نفذوا هذه الخطة بتركيز عالي وفهم متقدم .. * كونو الفريق يرفع رأسو في الجزائر ويطير، ويجي في المباراة التانية على التوالي يرفع رأسو ويخسر نقطتين أمام الخرطوم فهذا مؤكد تنفيذ جيد لخطة رفع الرأس .. * ناس الكورة بيقولوا : (الدوري نقاط) .. * وعند ناس المريخ : (الدوري رفع رأس) .. * ولذلك نتوقع إنو المريخ يركز تركيزاً كبيراً على رفع الرأس في مبارياته القادمة .. * ونطلب من الأخ مهند الطاهر الذي سيقود فريقه أمام المريخ الثلاثاء القادم أن يضرب الرأس .. * ضربة خفيفة كده .. * لأنو الرأس ده بإذن الله مازيمبي ح يقطعوا رسمي وشعبي .. * بطريقتكم بتاعت رفع الرأس دي مازيمبي بيحلق ليكم صلعة .. * والله صحي .. * واجب علينا أن نهنئ فريق الخرطوم الوطني على هذا الأداء القوي والمميز .. * الخرطوم الوطني فريق محترم خانته النجاعة الهجومية ولولا ذلك لخرج الفريق منتصراً ومرفوع الرأس.. * الحكم منح المريخ ركلة جزاء (فتح شهية) مع انطلاقة الشوط الثاني فذهبت من حيث جاءت .. * ذهب من حيث أتى .. * والبركة في علاء بصمة .. * علاء الدين ما قصر والله .. * فييرا ربما هو قصد إهدار ركلة الجزاء حتى يجعل رأس الفريق مرفوعاً .. * بمناسبة مرفوعاً .. * وين الأخ بكوري المدينة ؟ * بكوري مالو كورتو بقت زي ألوك اللسه ما في زول شاف كورتو ؟ * قالوا ألوك أمبارح سافر جوبا .. * قنع خلاص .. * مسكين خمسة شهور بيتمرن وينوم .. * ألوك من كترت التمارين جاتو صلعة .. * وده كلو من الكاردينال .. * الكاردينال استلم ورق شيبوب وسفرو تونس للقيروان .. * واستلم ورق ألوك وسجلو في المريخ للتمارين .. * وشهر خمسة بإذن الله وسط الهلال سيكون فيه شيبوب وأبوعاقلة وأمامهما الثعلب و(ولدنا دااااااك) .. * وسط زي الوسط .. * وسفر ألوك لجوبا لا علاقة لنا به .. * احتمال يكون سافر عندو مواعيد مع الرباط الصلبي .. * مش شيبوب لما سافر جاهو رباط صليبي في الفندق الكبير بجوبا ؟ * هسه ألوك برضو ح يجيهو رباط صليبي .. * وإحنا أصلاً بنحب اللاعب العندو رباط صليبي .. * الله خلقنا كده .. * مما قمنا عندنا غرام مع الرباط الصليبي .. * دي قسمتنا عاد نسوي شنو ؟ * شلنا منهم حمودة بشير قالوا عندو رباط .. * شلنا منهم علاء الدين قالوا عندو رباط ومرة قالوا عندو بصمة .. * شلنا الشغيل قالوا عندو رباط .. * شلنا شيبوب قالوا رباط .. * عشان كده من هسه (ولدنا) الشايلنو منكم شهر خمسة ومن (جوه الكشف) عندو رباطين واحد صليبي والتاني ما صليبي .. * بس شدوا حيلكم .. * والله الموسم الجاي رأس ما يكون عندكم عشان ترفعوهو .. * واسمعوها مني .. بكري المدينة اعتباراً من الدورة التانية ح يكون زول تمارين ساكت .. * ح يكون زول كنبة وبس .. * بمناسبة الكنبة .. * أنا حقيقة مهموم جداً بموضوع يوسف بلايلي .. * وبشوف إنو (الكاف) كان قاسياً مع يوسف بلايلي الذي تمت محاكمته بعدد من السنوات بعد أن ثبت تعاطيه للمنشطات .. * نرجو تخفيف عقوبة بلايلي حتى يعود لممارسة كرة القدم مع بقية أخوانه .. * غايتو جنس غايتو !! * أمس وعدنا بالعودة لموضوع سيسيه الذي وجد معاملة قبيحة جداً من الهلال ولكن الخرطوم الوطني فرض علينا هذا العمود .. * سيسيه ما هو اللاعب البيستاهل هذه المعاملة القبيحة .. * وليس هناك ما يبرر ما فعله الهلال تجاه سيسيه الذي لم يزل معلقاً في انتظار الأستاذ الكبير والإداري الرقم (الفاضل) لكي يرد على مكالماته .. * سيسيه (ود ناس) وهو من اللاعبين البسطاء الذين لا يعرفون درب الفيفا ولا يعرفون الشكاوى .. * ومن باب الذوق والأخلاق يفترض الهلال يمنح هذا اللاعب مستحقاته كاملة ودون أي مماطلة .. * سيما وأن الكاردينال هو القائل : (نحن القوة المالية الضاربة في البلد دي) .. * قال : (لو شئنا لسجلنا ميسي) .. * ميسي ما دايرنو يا الكاردينال بس أمنح سيسيه حقو عليك الله .. * ما تخلو الزول يندم على أي لحظة جميلة عاشها مع جمهور الهلال .. * سمعة الهلال دهب فلماذا يصر الكاردينال على تشويه هذه السمعة ؟ * نحن البيفوتنا بنشكرو وبنتمنى ليهو التوفيق وبنديهو أجمل ما عندنا .. * ودي أبسط حاجة في أصول التربية السودانية .. * و..و.. * والكنت قايلو فات زمان ...(لسه قاعد في بيت اللعيبة وبيتصل على الإداري القامة الفاضل) .. *
