بالعربي الكسيح محمد الطيب الأمين أهم حاجة عندنا يكون عندك رباط صليبي !! * شعار الهلال هو : (الله الوطن الهلال) .. * ده الشعار الذي إشتهر به الهلال علي مر التاريخ .. * وشعار الهلال الذي ظهر حديثا هو : (أرفع رأس أنت هلالابي) .. * كونك تكون هلالابي فهذا يكفي ان (ترفع رأسك) حتى لو كنت (خجول) .. * (الهلال) مبرر كافي لرفع الرأس .. * وطبعا من الحرج أن تسأل عن شعار المريخ .. * أنا والله بصراحة مما عرفت المريخ ده ما سمعت ليهم شعار .. * وأصلا أنا عرفت المريخ بعد ما بقيت كبير .. * في حاجتين أنا عرفتهم بعد بقيت كبير : (المريخ وعصير القصب) .. * زمان ما كنت بعرف المريخ ولا بعرف عصير القصب .. * ما كنت متوقع إنو القصب ممكن يبقي عصير .. * والله صحي .. * ما كنت فاكر إنو العلم ممكن يتطور لدرجة إنو القصب يبقي عصير ونجمة فكتوريا تبقي مريخ .. * المهم .. * المريخ ما عندو شعار .. * لما تجي تقرأ (لافتة نادي الهلال بتشوف الهلال مكتوب ومرسوم وتحت الرسم بتقرأ الله الوطن الهلال) ؟؟ * ولما تشوف (لافتة المريخ) ما بتلقي شعار مكتوب والله أعلم .. * اللهم إلا يكون شعارهم هو : (نهواه في كل الظروف) .. * شعارهم : (نهواه في كل الظروف) أو (العارف عزو مستريح) .. * وأعتقد ان (العارف عزو مستريح) هو أنسب شعار بالنسبة للمريخ .. * أعتقد ذلك .. * واي زول طبعا حر في (إعتقاداتو) .. * أمبارح المريخ أمام الخرطوم الوطني حافظ علي (الرأس المرفوع) .. * ورفعت الرأس دي بدت مع المريخ في الجزائر أمام وفاق سطيف .. * في الجزائر المريخ ركز علي (رفع الرأس) ووفاق سطيف ركز علي التأهل .. * وفي النهاية الفريق الجزائري تأهل والمريخ طار .. * وأمبارح برضو المريخ دخل المباراة بخطة (رفع الرأس) .. * الخطة إسمها : (أرفع رأسك وخلي اليحصل يحصل) .. * وهذه خطة بلجيكية إستفادة منها بلجيكا في كاس العالم وفي كثير من البطولات والمناسبات .. * وبصراحة نجوم المريخ نفذوا هذه الخطة بتركيز عالي وفهم متقدم .. * كونو الفريق يرفع رأسو في الجزائر ويطير ، ويجي في المباراة التانية علي التوالي يرفع رأسو ويخسر نقطتين أمام الخرطوم فهذا مؤكد تنفيذ جيد لخطة رفع الرأس .. * ناس الكورة بيقولوا : (الدوري نقاط) .. * وعند ناس المريخ : (الدوري رفع رأس) .. * ولذلك نتوقع إنو المريخ يركز تركيزا كبيرا علي رفع الرأس في مبارياته القادمة .. * ونطلب من الأخ مهند الطاهر الذي سيقود فريقه أمام المريخ الثلاثاء القادم ان يضرب الرأس .. * ضربة خفيفة كده .. * لانو الرأس ده بأذن الله مازيمبي ح يقطعوا رسمي وشعبي .. * بطريقتكم بتاعت رفع الرأس دي مازيمبي بيحلق ليكم صلعة .. * والله صحي .. * واجب علينا ان نهنئ فريق الخرطوم الوطني علي هذا الأداء القوي والمميز .. * الخرطوم الوطني فريق محترم خانته النجاعة الهجومية ولولا ذلك لخرج الفريق منتصرا ومرفوع الرأس.. * الحكم منح المريخ ركلة جزاء (فتح شهية) مع إنطلاقة الشوط الثاني فذهبت من حيث جاءت .. * ذهب من حيث أتى .. * والبركة في علاء بصمة .. * علاء الدين ما قصر والله .. * فييرا ربما هو قصد إهدار ركلة الجزاء حتى يجعل رأس الفريق مرفوعا .. * بمناسبة مرفوعا .. * وين الأخ بكوري المدينة ؟؟ * بكوري مالو كورتو بقت زي ألوك اللسه ما في زول شاف كورتو ؟؟ * قالوا ألوك أمبارح سافر جوبا .. * قنع خلاص .. * مسكين خمسة شهور بيتمرن وينوم .. * ألوك من كترت التمارين جاتو صلعة .. * وده كلو من الكاردينال .. * الكاردينال إستلم ورق شيبوب وسفرو تونس للقيروان .. * وإستلم ورق ألوك وسجلو في المريخ للتمارين .. * وشهر خمسة بأذن الله وسط الهلال سيكون فيه شيبوب وأبوعاقلة وأمامهما الثعلب و(ولدنا دااااااك) .. * وسط زي الوسط .. * وسفر ألوك لجوبا لا علاقة لنا به .. * إحتمال يكون سافر عندو مواعيد مع الرباط الصلبي .. * مش شيبوب لما سافر جاهو رباط صليبي في الفندق الكبير بجوبا ؟؟ * هسه ألوك برضو ح يجيهو رباط صليبي .. * وإحنا اصلا بنحب اللاعب العندو رباط صليبي .. * الله خلقنا كده .. * مما قمنا عندنا غرام مع الرباط الصليبي .. * دي قسمتنا عاد نسوي شنو ؟؟ * شلنا منهم حمودة بشير قالوا عندو رباط .. * شلنا منهم علاء الدين قالوا عندو رباط ومرة قالوا عندو بصمة .. * شلنا الشغيل قالوا عندو رباط .. * شلنا شيبوب قالوا رباط .. * عشان كده من هسه (ولدنا) الشايلنو منكم شهر خمسة ومن (جوة الكشف) عندو رباطين واحد صليبي والتاني ما صليبي .. * بس شدوا حيلكم .. * والله الموسم الجاي رأس ما يكون عندكم عشان ترفعوهو .. * وأسمعوها مني .. بكري المدينة إعتبارا من الدورة التانية ح يكون زول تمارين ساكت .. * ح يكون زول كنبة وبس .. * بمناسبة الكنبة .. * أنا حقيقة مهموم جدا بموضوع يوسف بلايلي .. * وبشوف إنو (الكاف) كان قاسيا مع يوسف بلايلي الذي تمت محاكمته بعدد من السنوات بعد ان ثبت تعاطيه للمنشطات .. * نرجو تخفيف عقوبة بلايلي حتي يعود للمارسة كرة القدم مع بقية أخوانه .. * غايتو جنس غايتو !! * أمس وعدنا بالعودة لموضوع سيسيه الذي وجد معاملة قبيحة جدا من الهلال ولكن الخرطوم الوطني فرض علينا هذا العمود .. * سيسيه ما هو اللاعب البيستاهل هذه المعاملة القبيحة .. * وليس هنالك ما يبرر ما فعله الهلال تجاه سيسيه الذي لم يزل معلقا في إنتظار الأستاذ الكبير والإداري الرقم (الفاضل) لكي يرد علي مكالماته .. * سيسيه (ود ناس) وهو من اللاعبين البسطاء الذين لا يعرفون درب الفيفا ولا يعرفون الشكاوى .. * ومن باب الذوق والأخلاق يفترض الهلال يمنح هذا اللاعب مستحاقته كاملة ودون اي مماطلة .. * سيما وان الكاردينال هو القائل : (نحن القوة المالية الضاربة في البلد دي) .. * قال : (لو شئنا لسجلنا ميسي) .. * ميسي ما دايرنو يا الكاردينال بس أمنح سيسيه حقو عليك الله .. * ما تخلو الزول يندم علي أي لحظة جميلة عاشها مع جمهور الهلال .. * سمعة الهلال دهب فلماذا يصر الكاردينال علي تشويه هذه السمعة ؟؟ * نحن البيفوتنا بنشكرو وبنتمنى ليهو التوفيق وبنديهو أجمل ما عندنا .. * ودي أبسط حاجة في أصلو التربية السودانية .. * و..و.. * والكنت قايلو فات زمان …(لسه قاعد في بيت اللعيبة وبيتصل علي الإداري القامة الفاضل)